*ແຂວງຄຳມ່ວນເປັນອີກແຂວງໜຶ່ງຢູ່ພາກກາງຂອງປະເທດລາວເຮົາ ທັງເປັນແຂວງທີ່ມີແຫລ່ງທ່ອງທ່ຽວຫລາຍແຫ່ງ ທີ່ໜ້າດຶງດູດນັກທ່ອງທ່ຽວພາຍໃນ ແລະ ຕ່າງປະເທດເຂົ້າມາທ່ຽວ, ພັກຜ່ອນຍ່ອນອາລົມກໍວ່າໄດ້ ໂດຍລວມທັງໝົດແຫລ່ງທ່ອງທ່ຽວ ທີ່ຖືກພັດທະນາແລ້ວ ແລະ ຍັງບໍ່ທັນພັດທະນາມີເກືອບ 210 ແຫ່ງ. ໃນນັ້ນ, ແຫລ່ງທ່ອງທ່ຽວທຳມະຊາດ 145 ແຫ່ງ, ວັດທະນະທຳ 33 ແຫ່ງ ແລະ ປະຫວັດສາດ 31 ແຫ່ງ. 

ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ໃຫ້ສຳພາດຕໍ່ນັກຂ່າວໜັງສືພິມປະເທດລາວເມື່ອບໍ່ດົນນີ້ວ່າ: ແຂວງຕົນກໍມີທ່າແຮງຫລາຍດ້ານ ໃນການພັດທະນາເສດຖະກິດ-ສັງຄົມ, ແກ້ໄຂຄວາມທຸກຍາກຂອງປະຊາຊົນ ໂດຍສະເພາະແມ່ນໄດ້ກຳນົດ ເອົາ 3 ທ່າແຮງພື້ນຖານ ໃນການພັດທະນາເສດຖະກິດ-ສັງຄົມຄື: ທ່າແຮງທາງດ້ານກະສິກຳ, ທ່າແຮງທາງດ້ານອຸດ​ສາ​ຫະ​ກຳ ພະລັງງານ-ບໍ່ແຮ່ ແລະ ທ່າແຮງທາງດ້ານການບໍລິການທາງຜ່ານ ແລະ ການທ່ອງທ່ຽວ. ສໍາລັບວຽກ​ງານ​ທ່ອງ​ທ່ຽວ ທັງແຂວງ​ໄດ້ ມີ​ຄຳ​ຂວັນ “ ພະທາດສີໂຄດຕະບອງງາມສະຫງ່າ ລຳພະຫຍາມະຫາໄຊ ກຳແພງໃຫຍ່ພູຄັນນາ ຜາຫີນໜາມໜໍ່ ບໍ່ໄຟຟ້ານ້ຳເທີນສອງ ກອງລໍ-ນາຕານນ້ຳລອດຖ້ຳ ວິລະກຳ 21 ມີນາ 1946”. ໂດຍໃນ​ທົ່ວ​ແຂວງ ມີແຫລ່ງທ່ອງທ່ຽວເກືອບ 210 ແຫ່ງ. ໃນ ນັ້ນ, ແຫລ່ງທ່ອງທ່ຽວທາງທຳມະຊາດ 145 ແຫ່ງ, ແຫລ່ງທ່ອງທ່ຽວທາງວັດທະນະທຳ 33 ແຫ່ງ ແລະ ດ້ານປະຫວັດສາດ 31 ແຫ່ງ, ໄດ້ປະກອບເປັນບັນຊີຮຽກການລົງທຶນ ມີ 23 ແຫ່ງ. ປັດຈຸບັນສະຖານທີ່ທ່ອງທ່ຽວ ທີ່ເອກະຊົນສໍາປະທານແລ້ວ 7 ແຫ່ງຄື: ສະຖານທີ່ທ່ອງທ່ຽວຖໍ້ານາງແອນ, ຂຸນກອງແລງ, ທ່າຝຣັ່ງ, ພູຜາມ່ານ, ຕາດຊຽງລື, ແຫລ່ງທ່ອງທ່ຽວຕາດຟ້າ ເມືອງຄູນຄໍາ, ຂຸນນໍ້າຄໍາດິບ. ພ້ອມນີ້, ຍັງມີບາງແຫ່ງກຳລັງສຶກສາຄວາມເປັນໄປໄດ້ ເພື່ອສະເໜີຂໍອະນຸຍາດສຳປະທານ ໂດຍສຸມໃສ່ ປະຕິບັດ ຕາມສະໂລແກນຂອງການທ່ອງທ່ຽວທີ່ວ່າ "ທ່ອງທ່ຽວດ້ວຍຄວາມສຸກໃຈ ມີຄວາມປອດໄພຮອບດ້ານ”.

ເຈົ້າແຂວງຄຳມ່ວນກ່າວຕື່ມວ່າ: ໃນປີ 2022 ຜ່ານ​ມາ ມີນັກທ່ອງທ່ຽວເຂົ້າມາທ່ຽວແຂວງຕົນທັງໝົດ 362.395 ຄົນ. ໃນນັ້ນ, ນັກທ່ອງທ່ຽວພາຍໃນ 223.854 ຄົນ, ສາ​ມາດສ້າງລາຍຮັບໃຫ້ແກ່ແຂວງ ກໍຄືປະຊາຊົນໄດ້ຫລາຍກວ່າ 251 ຕື້ກີບ. ໃນ ຈຳນວນແຫລ່ງທ່ອງທ່ຽວຫລາຍແຫ່ງນັ້ນ ທັງ​ແຂວງ​ພວກ​ເຮົາ​ ໄດ້​ສະ​ເໜີ​ພູ​ຫີນ​ໜາມ​ໜໍ່ ​ເຂົ້າ​ເປັນ​ມໍ​ລະ​ດົກ​ໂລກ​ທາງ​ທຳ​ມະ​ຊາດ​ ແຫ່ງ​ທຳ​ອິດ​ຂອງ ສ​ປ​ປ ລາວ ທາງ​ດ້ານ​ນິ​ຕິ​ກຳ​ແມ່ນ​ມີ​ຄວາມຄືບ​ໜ້າ​ ຫລາຍກວ່າ 70% ​ເຊິ່ງ​ຍັງ​ຢູ່​ໃນ​ຂັ້ນ​ຕອນ​ການ​ຮອງ​ຮັບ​ຈາກ ສສ ຫວຽດ​ນາມ ໃນ​ການຢັ້ງ​ຢືນ​ຮ່ວມ​ຊາຍ​ແດນ​ ເປັນ​ມໍ​ລະ​ດົກ​ໂລກ ເພື່ອ​ສົ່ງ​ໄປ​ຍັງ​ທາງ​ອົງ​ການ UNESCO ຮອງ​ຮັບ​ຕາມ​ຂັ້ນ​ຕອນ​ລະ​ບຽບ​ຫລັກ​ການ. ແນວໃດກໍດີ ເພື່ອກຽມພ້ອມຮອງຮັບນັກທ່ອງທ່ຽວ ທັງ​ເປັນ​ການ​ດຶງ​ດູດ​ ແລະ ໂຄ​ສະ​ນາ​ກ່ຽວ​ກັບການ​ທ່ອງ​ທ່ຽວ ນັບ​ແຕ່​ການ​ແພ່​ລະ​ບາດ​ ຂອງ​ເຊື້ອ​ພະ​ຍາດ​ໂຄວິດ-19 ຜ່ອນ​ຄາຍ​ລົງ ທາງແຂວງ​ ກໍ​ໄດ້​ມີ​ການ​ຊຸກຍູ້ປັບປຸງ, ຟື້ນ​ຟູ​ບູ​ລະ​ນະ ແລະ ຍົກລະດັບ​ບັນ​ດາ​ແຫລ່ງ​ທ່ອງ​ທ່ຽວ​ຕ່າງໆ ໄປ​ພ້ອມ​ໆກັບ​ການ​ຝຶກ​ອົບ​ຮົມ ​ໃຫ້​ບັນ​ດາ​ຜູ້​ປະ​ກອບ​ການ​ໃນ​ຫົວ​ຂໍ້​ຕ່າງໆ ເພື່ອ​ຊຸກ​ຍູ້ສົ່ງ​ເສີມ​ ໃນ​ການ​ຈັດ​ມາດ​ຕະ​ຖານ​ຄືນ​ໃໝ່ ເປັນ​ຕົ້ນແມ່ນໄດ້ຝຶກ​ອົບ​ຮົມ​ ໃຫ້​ແກ່​ພະ​ນັກ​ງານ​ ເຮັດ​ໜ້າ​ທີ່ດ້ານ​ການ​ບໍ​ລິ​ການ ຢູ່​ຮ້ານ​ອາ​ຫານ, ໂຮງ​ແຮມ ແລະ ສະ​ຖານທີ່​ທ່ອງ​ທ່ຽວ​ຕ່າງໆ ໃຫ້​ມີ​ຄຸນ​ນະ​ພາບ​​ຫລາຍ​ຂຶ້ນ; ຢູ່ບັນດາດ່ານ ເຂົ້າ-ອອກເມືອງ ກໍ​ໄດ້​ມີ​ການ​ສ້າງ​ເງື່ອນ​ໄຂ ​ອຳ​ນວຍ​ຄວາມ​ສະ​ດວກ,​ ປະ​ຕິ​ບັດ​ນະ​ໂຍ​ບາຍ ​ໃຫ້​ແກ່​ນັກ​ທ່ອງ​ທ່ຽວ ທີ່​ເດີນ​ທາງ​ເຂົ້າ​ມາ​ແບບກຣຸບ​ທົ່ວ, ແບບສ່ວນ​ຕົວ ແລະ ອື່ນໆ ລວມ​ທັງ​ການ​ຕິດ​ຕາມ​ຄຸ້ມ​ຄອງ​ລົດ​ເຊົ່າ, ລົດ​ຕູ້​ບໍ​ລິ​ການ​ຕ່າງໆ ໄດ້​ມີ​ການ​ກຳ​ນົດ​ລາ​ຄາ​ຄັກ​ແນ່ ໃນ​ການ​ໄປ​ທ່ຽວ​ສະ​ຖານ​ທີ່​ຕ່າງໆ. ນອກນັ້ນ ກໍຍັງ​ໄດ້ມີ​ການ​ໂຄ​ສະ​ນາ​ ດ້ວຍ​ຫລາຍ​ຮູບ-ຫລາຍ​ສີ, ຜະລິດປື້ມແນະນໍາການທ່ອງທ່ຽວ (Guidebook) ແລະ ແຜນທີ່ທ່ອງທ່ຽວ (Tourism map) ໄປ​ພ້ອມ​ກັບ​ການຈັດ​ເທສະ​ການ ​ໃນ​ງານ​ບຸນ​ປະ​ເພ​ນີ​ປະ​ຈຳ​ປີທ້ອງ​ຖິ່ນ ແລະ ຜ່ານ​ສື່​ສັງ​ຄົມ​ຕ່າງໆ.

ນອກຈາກທີ່ກ່າວມານັ້ນແລ້ວ, ພວກ​ເຮົາຍັງ​​ໄດ້​ສຸມ​ໃສ່ເ​ນັ້ນ​ໜັກ​ການ​ທ່ອງ​ທ່ຽວ​ແບບ​ວົງ​ຈອນ (THE LOOP) ໂດຍເລີ່ມ​ຈາກ​ເມືອງ​ທ່າ​ແຂກ, ມະ​ຫາ​ໄຊ, ຍົມ​ມະ​ລາດ, ນາ​ກາຍ, ຄູນ​ຄຳ, ຫີນ​ບູນ ແລະ ກັບ​ມາ​ເມືອງ​ທ່າ​ແຂກ ມີ​ໄລ​ຍະ​ທາງ​ເຂົ້າ​ຫາ​ແຫລ່ງ​ທ່ອງ​ທ່ຽວ​ໃນ​ແຕ່​ລະ​ຈຸດ ​ທັງ​ໝົດປະ​ມານ 450 ກິ​ໂລ​ແມັດ ເຊິ່ງ​ຜ່ານ​ມາ​ທາງ​ຜູ້​ປະ​ກອບ​ການ ກໍໄດ້​ມີ​ການ​ຈັດ​ໂປຣ​ໂມ​ຊັ້ນ ​ໃນ​ແຕ່​ລະ​ໄລຍະ, ພ້ອມ​ທັງ​ການ​ສົ່ງ​ຕໍ່ ນັກ​ທ່ອງ​ທ່ຽວ​ເຊິ່ງ​ກັນ ແລະ ກັນ ແບບ​ມີ​ສ່ວນ​ຮ່ວມ​ ຂອງ​ບັນ​ດາແຫລ່ງ​ທ່ອງ​ທ່ຽວ ພາຍໃນ ແຂວງມາເປັນໄລຍະໆ. ແນວໃດກໍດີປັດຈຸບັນນີ້ ເຫັນວ່າການທ່ອງທ່ຽວຢູ່ແຂວງຄຳມ່ວນ ມີບັນຍາກາດຟົດຟື້ນ ໂດຍມີທັງນັກທ່ອງທ່ຽວພາຍໃນ ແລະ ຕ່າງປະເທດ ກໍເລີ່ມມາທ່ຽວໃນແຕ່ລະມື້ ຢ່າງຫລວງຫລາຍ ແລະ ຄາດວ່າໝົດປີນີ້ ຈະມີນັກທ່ອງ ທ່ຽວເພີ່ມຂຶ້ນ ຫລາຍກວ່າປີຜ່ານມາ. ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນກ່າວ.

ຂຽນໂດຍ: ຢາຕົ້ງ

KPL