ຂປລ. ໃນວັນທີ 1 ມີນາ 2023 ນີ້, ທ່ານ ສັນຕິພາບ ພົມວິຫານ ລັດຖະມົນຕີ ກະຊວງການເງິນ ລົງເຄື່ອນໄຫວຕິດຕາມ, ຊຸກຍູ້ການຈັດຕັ້ງປະຕິບັດ ວຽກງານວິຊາສະເພາະ ຂອງຂະແໜງພາສີ ແລະ ການຫັນເປັນທັນສະໄໝ ກ້າວໄປສູ່ດີຈິຕອນ, ພ້ອມ​ທັງ​ໃຫ້​ທິດ​ຊີ້​ນໍາ ພະນັກງານຫລັກແຫລ່ງຂະ ແໜງພາສີ ຕ້ອງໄດ້ເອົາໃຈໃສ່ຕື່ມ ຕໍ່ວຽກງານວິຊາສະເພາະ ໃຫ້ຖືກຕ້ອງຕາມພາລະບົດບາດ, ຮັບປະກັນວຽກງານ ເກັບລາຍຮັບໃຫ້ໄດ້ຕາມເປົ້າໝາຍ; ຕ້ອງສ້າງກົນໄກໃນການ ເຮັດວຽກ, ການປະສານງານ ລະຫວ່າງສູນກາງ ແລະ ທ້ອງຖິ່ນ, ຫັນເປັນທັນສະໄໝ ໃຫ້ສະດວກຂຶ້ນກວ່າເກົ່າ; ສືບຕໍ່ປັບປຸງ ໜ້າວຽກຕ່າງໆ, ແກ້ໄຂບັນດາບັນຫາ, ຂໍ້ຄົງຄ້າງ ແລະ ບັນຫາອື່ນໆ.

​ໂອກາດ​ນີ້, ທ່ານ ພູເຂົາຄໍາ ວັນນະວົງໄຊ ຫົວໜ້າກົມພາສີກະຊວງການເງິນ ກໍໄດ້ລາຍງານໂດຍສັງເຂບ ກ່ຽວກັບສະພາບ ການຈັດຕັ້ງປະຕິບັດ ວຽກງານຂອງຂະແໜງພາສີ ໂດຍສະເພາະ ການຈັດຕັ້ງປະຕິບັດ ແຜນການຈັດເກັບລາຍຮັບ ເຂົ້າງົບປະມານ ປີ 2022 ພົບຄວາມຫຍຸ້ງຍາກ ເປັນຕົ້ນ ບັນຫາໄພເງິນເຟີ້, ບັນຫາລາຄາສິນຄ້າສູງ, ໄພທໍາມະຊາດ ແລະ ບັນຫາອື່ນໆ ໄດ້ສົ່ງ ຜົນກະທົບໂດຍກົງ ໃສ່ຜູ້ປະກອບການ ເປັນຕົ້ນ ການລົງທຶນ, ການນໍາເຂົ້າ, ການສົ່ງອອກ ແລະ ການຜ່ານແດນ. ນອກນັ້ນ, ບັນຫາການລັກລອບສິນຄ້າໜີພາສີ ທັງພາຍໃນດ່ານ ແລະ ນອກດ່ານ ຍັງມີແຜ່ຫລາຍ.

ສຳລັບ ໂຄງປະກອບການຈັດຕັ້ງ ລັດຖະການພາສີ ໃນຂອບເຂດທົ່ວປະເທດ ປະກອບມີ: ສອງຂັ້ນຄຸ້ມຄອງ. ​ໃນ​ນັ້ນ, ຂັ້ນສູນກາງປະກອບມີ 9 ພະແນກ  ແລະ  14 ຈຸດປະສານງານ ພະແນກ ສືບສວນ-ສອບສວນ ແລະ ປາບປາມການລັກລອບໜີພາສີ (ພສປ) ທີ່ປະຈໍາການຢູ່ທ້ອງຖິ່ນ. ສ່ວນຂັ້ນທ້ອງຖິ່ນ ປະກອບມີ 17 ຫ້ອງການພາສີປະຈຳແຂວງ, ນະຄອນຫລວງວຽງຈັນ ມີ 28 ດ່ານພາສີສາກົນ, 5 ຫ້ອງການພາສີ ປະຈໍາລະບົບສາງ, 30 ດ່ານພາສີທ້ອງຖິ່ນ ແລະ 27 ດ່ານພາສີປະເພນີ; ພະນັກງານ-ລັດຖະກອນ ພາສີ ໃນຂອບເຂດທົ່ວປະເທດ ມີທັງໝົດ 829 ຄົນ, ຍິງ 174 ຄົນ. ​ໃນ​ນັ້ນ, ຂັ້ນສູນກາງມີ 102 ຄົນ, ຍິງ 27 ຄົນ ​ແລະ ຂັ້ນທ້ອງຖິ່ນ 727 ຄົນ, ຍິງ 147 ຄົນ.

ໂອກາດດຽວກັນນີ້, ທ່ານລັດຖະມົນຕີ ກະຊວງການເງິນ, ພ້ອມຄະນະ ຍັງໄດ້ໄປຢ້ຽມຊົມ, ຕິດຕາມ, ຊຸກຍູ້ການຈັດຕັ້ງປະຕິບັດ ວຽກງານຂອງ ສູນບັນຊາການຄຸ້ມຄອງ ວຽກງານພາສີທັນສະໄໝ ຊຶ່ງແມ່ນໜຶ່ງ ໃນວຽກງານຫັນເປັນທັນສະໄໝ ກ້າວໄປສູ່ດີຈິຕອນ ຂອງຂະແໜງພາສີ ທີ່ສາມາດເຂົ້າເຖິງໄດ້ທຸກລະບົບ ທີ່ຕິດຕັ້ງໃນກົມພາສີ, ສາມາດກວດສອບ, ກວດກາແບບ Real time ແລະ ສາ ມາດຊ່ວຍເຈົ້າໜ້າທີ່ພາສີ ໃນການປະຕິບັດ ວຽກງານຕົວຈິງ. ນອກຈາກນີ້, ສູນບັນຊາການດັ່ງກ່າວ ຍັງສາມາດນໍາໃຊ້ເຂົ້າໃນ ວຽກງານກວດກາ, ເປັນສູນທີ່ເຝົ້າລະວັງ ຊ່ວຍເຈົ້າໜ້າທີ່ພາສີ ແລະ ເປັນເຄື່ອງມືສຳຄັນ ໃນການກວດກາ ທີ່ຈະມາປ່ຽນແທນການຫລຸດລົງ ຂອງຈຳນວນເຈົ້າໜ້າທີ່ພາສີປະຈຳ ການ ອີກດ້ວຍ.

ສຳລັບການຈັດຕັ້ງປະຕິບັດວຽກງານ ຫັນເປັນທັນສະໄໝກ້າວໄປສູ່ດີຈິຕອນ ຂອງຂະແໜງ ພາສີ ເປັນວຽກບຸລິມະສິດ ໃນການສ້າງຄວາມເຂັ້ມແຂງ ໃຫ້ວຽກງານກ້າວທັນກັບສາກົນ ແລະ ຮັບ ປະກັນ ການບໍລິການໃຫ້ມີ ຄວາມສະດວກ, ວ່ອງໄວ, ທັນສະໄໝ, ສາມາດຕິດຕາມກວດກາ ໄດ້ທັນສະພາບການ ແບບລວມສູນ ໃນຂອບເຂດທົ່ວປະເທດ.

KPL