ຂປລ
ຂປລ. ບໍລິສັດເຮີນານຊ່າງຈິວ ເຕັກນິກກະສິກຳ ຈຳກັດ ຕັ້ງຢູ່ບ້ານດົງໝາກບ້າ ເມືອງເຊບັ້ງໄຟ ແຂວງຄຳມ່ວນ ໃນເນື້ອທີ່ 100 ກວ່າເຮັກຕາ ໂດຍມີການຈັດສັນວາງແຜນ ການປູກຕົ້ນໝາກມ່ວງ 5 ສາຍພັນ ຄື: ຂຽວໃຫຍ່, ອໍ້ໜາງ, ນ້ຳດອກໄມ້ຈັກກະພັດ, ງາຊ້າງແດງ ແລະ ໜ່ວງອາທູ ທີ່ພວມໃຫ້ໝາກຢ່າງຫລວງຫລາຍ ເພື່ອລໍຖ້າການເກັບຂາຍ ແລະ ການສົ່ງອອກ ເຊິ່ງແນວພັນດັ່ງກ່າວແມ່ນນຳມາຈາກໃຕ້ຫວັນ, ປັດຈຸບັນ ຢູ່ສວນດັ່ງກ່າວ ສາມາດຂະຫຍາຍແນວພັນເອງໄດ້ ໂດຍບໍ່ເພິ່ງການນຳເຂົ້າ.
ຂປລ. ບໍລິສັດເຮີນານຊ່າງຈິວ ເຕັກນິກກະສິກຳ ຈຳກັດ ຕັ້ງຢູ່ບ້ານດົງໝາກບ້າ ເມືອງເຊບັ້ງໄຟ ແຂວງຄຳມ່ວນ ໃນເນື້ອທີ່ 100 ກວ່າເຮັກຕາ ໂດຍມີການຈັດສັນວາງແຜນ ການປູກຕົ້ນໝາກມ່ວງ 5 ສາຍພັນ ຄື: ຂຽວໃຫຍ່, ອໍ້ໜາງ, ນ້ຳດອກໄມ້ຈັກກະພັດ, ງາຊ້າງແດງ ແລະ ໜ່ວງອາທູ ທີ່ພວມໃຫ້ໝາກຢ່າງຫລວງຫລາຍ ເພື່ອລໍຖ້າການເກັບຂາຍ ແລະ ການສົ່ງອອກ ເຊິ່ງແນວພັນດັ່ງກ່າວແມ່ນນຳມາຈາກໃຕ້ຫວັນ, ປັດຈຸບັນ ຢູ່ສວນດັ່ງກ່າວ ສາມາດຂະຫຍາຍແນວພັນເອງໄດ້ ໂດຍບໍ່ເພິ່ງການນຳເຂົ້າ.
ທ່ານ ຈາງຈືຢົງ ຜູ້ຈັດການ ບໍລິສັດເຮີນານຊ່າງຈິວ ເຕັກນິກກະສິກຳ ຈຳກັດ ໄດ້ໃຫ້ຮູ້ເມື່ອບໍ່ດົນນີ້ວ່າ: ບໍລິສັດເຮີນານຊ່າງຈິວ ເຕັກນິກກະສິກຳ ຈຳກັດ ໄດ້ເລີ່ມບຸກເບີກເນື້ອທີ່ 100 ກວ່າເຮັກຕາ ຢູ່ບ້ານດົງໝາກບ້າ ເມືອງເຊບັ້ງໄຟ ໃນປີ 2014 ປີຕໍ່ມາກໍໄດ້ປູກຕົ້ນໝາກມ່ວງ 5 ສາຍພັນ ຈຳນວນ 80 ພັນຕົ້ນ ໂດຍປູກເປັນແຖວ ເພື່ອສະດວກໃນການບົວລະບັດໃສ່ຝຸ່ນ, ໄລຍະດຽວກັນນັ້ນ ກໍໄດ້ປູກພືດລົ້ມລຸກ ຕາມຫວ່າງຕົ້ນມ່ວງ ເຊັ່ນ: ມັນ, ຖົ່ວ ແລະ ໝາກໂມ. ທັງນີ້, ກໍເພື່ອເປັນການປັບປຸງດິນ ນຳໃຊ້ດິນໃຫ້ເກີດປະໂຫຍດ. ສິ່ງສຳຄັນຢູ່ລາວອາກາດດີ, ດິນງາມ ແລະ ສັດຕູພືດໂດຍສະເພາະ ແມງໄມ້ບໍ່ຫລາຍ ຖ້າທຽບໃສ່ ສປ ຈີນ.
ທ່ານ ຈາງຈືຢົງ ຍັງໃຫ້ຮູ້ອີກວ່າ: ການປູກໝາກມ່ວງ ອາດປະສົບຜົນສຳເລັດໄດ້ສູງ ຖ້າຫາກໄດ້ຮັບໂຄຕາການສົ່ງອອກຈາກ ສປ ຈີນ ຕື່ມອີກ ແລະ ຄາດວ່າ ໃນທ້າຍເດືອນນີ້ ຈະສົ່ງໝາກມ່ວງອອກປະມານ 50 ໂຕນ ແລະ ໃນອະນາຄົດ ບໍລິສັດ ຈະສ້າງຫ້ອງເຢັນ ສຳລັບເກັບມ້ຽນຜົນຜະລິດ ແລະ ເຮືອນຫຸ້ມຫໍ່ເພື່ອການສົ່ງອອກ. ພ້ອມທັງຝາກເຖິງພາກສ່ວນກ່ຽວຂ້ອງ ຊ່ວຍສ້າງເງື່ອນໄຂ ແລະ ອຳນວຍຄວາມສະດວກ ເພື່ອການສົ່ງອອກໃຫ້ຫລາຍຂຶ້ນ.
ຂ່າວ-ພາບ: ມະນີລັດ
KPL
