ຂປລ. ມູນນິທິ ອາໂຄຣນິສ ໄຊເບີ (Acronis Cyber Foundation) ຮ່ວມກັບ ມູນນິທິ ເກື້ອຝັນເດັກ (Child’s Dream Foundation) ຈາກປະເທດສະວິດເຊີແລນ ໄດ້ມອບໂຮງຮຽນປະ ຖົມສົມບູນ ບ້ານດົງນາຂາມ ພ້ອມອຸປະກອນຄົບຊຸດ ໃຫ້ອຳນາດການປົກຄອງແຂວງສະຫວັນນະເຂດ ເພື່ອເປັນການປະກອບສ່ວນ ໃນການພັດທະນາການສຶກສາພາຍໃນບ້ານດັ່ງກ່າວ ກໍຄື ແຂວງສະຫວັນນະເຂດ ໃຫ້ນັບມື້ນັບມີຄຸນນະພາບ.

      ພິທີມອບ-ຮັບໂຮງຮຽນດັ່ງກ່າວ, ໄດ້ຈັດຂຶ້ນໃນວັນທີ 10 ທັນວາ 2019 ຕາງໜ້າມອບໂດຍ ທ່ານ ຮານເນສ ມີກາ ເວຍເກ ຜູ້ຕາງໜ້າມູນນິທິ ອາໂຄຣນິສ ໄຊເບີ ແລະ ຕາງໜ້າກ່າວຮັບໂດຍ ທ່ານ ບຸນມີ ລັດຕະນະວົງ ຮອງຫົວໜ້າຂະແໜງບໍລິຫານ ພະແນກສຶກສາທິການ ແລະ ກິລາ ແຂວງສະຫວັນນະເຂດ ໂດຍມີຜູ້ຕາງໜ້າຈາກພະແນກທີ່ກ່ຽວຂ້ອງ, ຜູ້ໃຫ້ທຶນ, ຄູ-ອາຈານ, ນັກຮຽນ ແລະ ພໍ່ແມ່ປະຊາຊົນ ບ້ານດົງນາຂາມ ເຂົ້າຮ່ວມ.

      ​ໂອກາດ​ນີ້, ທ່ານ ຮານເນສ ມີກາ ເວຍເກ ກ່າວວ່າ: ຮູ້ສຶກເປັນກຽດ ແລະ ມີຄວາມພາກພູມໃຈທີ່ສຸດທີ່ໄດ້ເປັນສ່ວນໜຶ່ງໃນການຊ່ວຍເຫລືອ ແລະ ປະກອບສ່ວນໃນການພັດທະນາການສຶກສາຢູ່ສປປ ລາວ ໂດຍສະເພາະ ຢູ່ບ້ານດົງນາຂາມ ເມືອງອາດສະພັງທອງ ແຂວງສະຫວັນນະເຂດ, ເຊິ່ງເປັນເຂດຊົນນະບົດ ແລະ ຫ່າງໄກສອກຫລີກ. ໜຶ່ງໃນເປົ້າໝາຍຫລັກຂອງມູນນິທິ ອາໂຄຣນິສ ໄຊເບີ ກໍແມ່ນເພື່ອຊ່ວຍເຫລືອ ແລະ ພັດທະນາການສຶກສາ ເນື່ອງຈາກວ່າ ການສຶກສາເປັນກຸນແຈໄຂສູ່ຄວາມສຳເລັດ ແລະ ເປົ້າໝາຍອື່ນໆ ໃນການດຳລົງຊີວິດຂອງຄົນເຮົາ.

ນີ້ແມ່ນໂຄງການທຳອິດຂອງ ມູນນິທິ ອາໂຄຣນິສ ໄຊເບີ ທີ່ຊ່ວຍເຫລືອສ້າງໂຮງຮຽນ ຢູ່ໃນ ສປປ ລາວ ເຊິ່ງພວກເຮົາເລືອກເອົາໂຮງຮຽນແຫ່ງນີ້ ກໍເພາະວ່າ ເປັນໂຮງຮຽນທີ່ມີຄວາມຕ້ອງການຫລາຍທີ່ສຸດ ເນື່ອງຈາກວ່າເປັນເຂດຫ່າງໄກສອກຫລີກ, ໂຮງຮຽນຫລັງເກົ່າແມ່ນຊຸດໂຊມຫລາຍ, ບໍ່ມີລະບົບໄຟຟ້າ ແລະ ນ້ຳໃຊ້.

      ທ່ານ ຮານເນສ ມີກາ ເວຍເກ ຫວັງວ່າ: ໂຮງຮຽນຫລັງນີ້, ຈະອຳນວຍຄວາມສະດວກ ເຮັດໃຫ້ຄູ-ອາຈານ ແລະ ນ້ອງໆນັກຮຽນ ມ່ວນຊື່ນກັບການຮຽນ-ການສອນຂອງເຂົາເຈົ້າ, ພ້ອມນັ້ນ ອຳນາດການປົກຄອງທ້ອງຖິ່ນ, ຄູອາຈານ, ພໍ່​ແມ່ປະຊາຊົນ ແລະ ນ້ອງໆນັກຮຽນ ຢູ່ບ້ານດົງນາຂາມ ຈະພ້ອມກັນນຳໃຊ້, ຖະນຸຖະໜອມ ແລະ ປົກປັກຮັກສາໂຮງຮຽນດັ່ງກ່າວ ໃຫ້ເກີດປະໂຫຍດສູງສຸດ ແລະ ຍາວນານ.

      ທ່ານ ບຸນມີ ລັດຕະນະວົງ ກ່າວ​ວ່າ: ການ​ຊ່ວຍ​ເຫລືອ​ຄັ້ງ​ນີ້​, ເປັນ​ການປະກອບສ່ວນອັນໃຫຍ່ຫລວງ ແລະ ມີຄວາມໝາຍທີ່ສຸດ ຕໍ່ການພັດທະນາການສຶກສາ ກໍຄື ການພັດທະນາຊັບພະຍາກອນມະນຸດ ຢູ່ເມືອງອາດສະພັງທອງ, ເປັນຕົ້ນແມ່ນເດັກນ້ອຍຢູ່ໃນບ້ານດົງນາຂາມ ແລະ ເຂດໃກ້ຄຽງ ໃຫ້ສາມາດໄດ້ເຂົ້າຮຽນໜັງສືຕາມເກນອາຍຸ ແລະ ມີອຸປະກອນການຮຽນທີ່ພຽງພໍ.

      ທ່ານ ອຸທອນ ໄຊຍະສິດ ຜູ້ອຳນວຍການໂຮງຮຽນປະຖົມສົມບູນ ດົງນາຂາມ ກ່າວວ່າ: ມື້ນີ້ທາງໂຮງຮຽນພວກເຮົາຮູ້ສຶກເປັນກຽດ ໃນການຮັບເອົານ້ຳໃຈຊ່ວຍເຫລືອ ຈາກມູນນິທິ ອາໂຄຣນິສ ໄຊເບີ ແລະ ມູນນິທິເກື້ອຝັນເດັກ. ສິ່ງເຫລົ່ານີ້ເປັນຂອງຂວັນອັນລ້ຳຄ່າ, ເຊິ່ງບໍ່ພຽງແຕ່ຊ່ວຍໃຫ້ຄູອາຈານຫລຸດຜ່ອນຄວາມຫຍຸ້ງຍາກ ແລະ ມີກຳລັງໃຈໃນການສິດສອນ​ແລ້ວ ຍັງເປັນການຊ່ວຍດຶງດູດໃຫ້ນ້ອງນັກຮຽນ, ລູກຫລານ ​​ໃຫ້ເອົາໃຈໃສ່ຕໍ່ການຮຽນຫລາຍຂຶ້ນຕື່ມ, ພ້ອມກ່າວສະແດງຄວາມຂອບໃຈ ແລະ ຮູ້ບຸນຄຸນ ມາຍັງມາຍັງທຸກທ່ານ ທີ່ມີນ້ຳໃຈຊ່ວຍເຫລືອໃນຄັ້ງນີ້ ແລະ ຂໍຈົດຈຳໄວ້ຕະຫລອດໄປ.

      ມູນຄ່າການກໍ່ສ້າງໂຮງຮຽນປະຖົມສົມບູນ ບ້ານດົງນາຂາມເກືອບ 400 ລ້ານກີບ, ໃນນັ້ນມູນນິທິ ອາໂຄຣນິສ ໄຊເບີ ແລະ ມູນນິທິ ເກື້ອຝັນເດັກ ຊ່ວຍເຫລືອ 350 ລ້ານກີບ ແລະ ສ່ວນທີ່ເຫລືອອີກ 48,3 ລ້ານກີບ ແມ່ນທຶນສົມທົບຂອງຊາວບ້ານ.

KPL