ຂປລ. ບັນດາປະເທດອານຸພາກພື້ນແມ່ນ້ຳຂອງ ຫລື ຈີເອມເອສ ມີ (ກໍາປູເຈຍ, ຈີນ, ລາວ, ມຽນມາ, ໄທ ແລະ ຫວຽດນາມ) ແລະ ພາກສ່ວນທີ່ກ່ຽວຂ້ອງດ້ານນະໂຍບາຍ ແລະ ການຊື້-ຂາຍໄຟຟ້າ ໄດ້ພ້ອມກັນ ປຶກສາຫາລື ກ່ຽວກັບບັນດາສິ່ງທ້າທາຍ ແລະ ອຸປະສັກຕ່າງໆ ໃນການສົ່ງເສີມການຊື້-ຂາຍໄຟຟ້າໃນອານຸພາກພື້ນແມ່ນ້ຳຂອງ ໃຫ້ເປີດກວ້າງ ແລະ ຫລາກຫລາຍກວ່າເກົ່າ ເພື່ອເຮັດໃຫ້ການແລກປ່ຽນ ແລະ ການຊື້-ຂາຍໄຟຟ້າ ມີການເຊື່ອມໂຍງກັນດີຂຶ້ນກວ່າເກົ່າໃນຕໍ່ໜ້າ.

         ການປຶກສາຫາລືດັ່ງກ່າວ, ໄດ້ມີຂຶ້ນຢູ່ທີ່ກອງປະຊຸມຄະນະກຳມາທິການ ເພື່ອປະສານງານດ້ານການຄ້າພະລັງງານພາກພື້ນ ຄັ້ງທີ 23 ທີ່ ນະຄອນຫລວງວຽງຈັນ, ໃນວັນທີ 15 ທັນວາ 2017, ຊຶ່ງຈັດໂດຍກະຊວງພະລັງງານ ແລະ ບໍ່ແຮ່ ຮ່ວມກັບທະນາຄານພັດທະນາອາຊີ ພາຍໃຕ້ການເປັນປະທານຮ່ວມຂອງທ່ານ ຄຳໂສ້ ກຸໂພຄຳ ຮອງຫົວໜ້າກົມນະໂຍບາຍ ແລະ ແຜນພະລັງງານ, ກະຊວງພະລັງງານ ແລະ ບໍ່ແຮ່, ທ່ານ ວັດທະນາພົງ ກຸໂຣວັັດ ຫົວໜ້າສູນນະໂຍບາຍໄຟຟ້າ ຫ້ອງການນະໂຍບາຍ ແລະ ແຜນພະລັງງານໄຟຟ້າ ກະຊວງພະລັງງານ ຣາຊະນາຈັກໄທ ແລະ ທ່ານ ແອນດຣິວ ເຊພຣີສ ຫົວໜ້າພະແນກພັດທະນາພະລັງງານ ທະນາຄານພັດທະນາອາຊີ, ໂດຍມີຜູ້ຮັບຜິດຊອບດ້ານນະໂຍບາຍ ແລະ ການຊື້-ຂາຍໄຟຟ້າ ຈາກປະເທດຈີເອມເອສ, ເອດີບີ, ທະນາຄານໂລກ, ອົງການຊ່ວຍເຫລືອປະເທດ ຝຣັ່ງ ແລະ ອົງການໃຈກາ.

         ໃນກອງປະຊຸມ, ບັນດາຜູ້ເຂົ້າຮ່ວມໄດ້ພ້ອມກັນທົບທວນຄືນ ກ່ຽວກັບຄວາມຄືບໜ້າ ແລະ ຜົນສຳ ເລັດໃນການຈັດຕັ້ງປະຕິບັດ ໃນໄລຍະໜຶ່ງປີຜ່ານມາ, ພ້ອມທັງປຶກສາຫາລື ໃນການປັບປຸງທາງດ້ານມາດຕະຖານ, ຂໍ້ກຳນົດລະບຽບກົດໝາຍ, ຂັ້ນຕອນການຂໍອະນຸມັດ ແລະ ຄ່າຜ່ານສາຍສົ່ງ ຂອງລະບົບສາຍສົ່ງ ໃນການເຊື່ອມໂຍງສຳລັບການແລກປ່ຽນ ແລະ ຊື້-ຂາຍໄຟຟ້າ ຢູ່ໃນອານຸພາກພື້ນແມ່ນ້ຳຂອງ.

         ທ່ານ ຄຳໂສ້ ກຸໂພຄຳ ກ່າວວ່າ: ຈຸດປະສົງຂອງກອງປະຊຸມໃນຄັ້ງນີ້, ກໍເພື່ອປຶກສາຫາລືກ່ຽວກັບແຜນການ ໃນການແລກປ່ຽນ, ຊື້-ຂາຍໄຟຟ້າຮ່ວມກັນ ຢູ່ໃນບັນດາປະເທດອານຸພາກພື້ນແມ່ນ້ຳຂອງ,  ເຊິ່ງພວກເຮົາຈະ ໄດ້ປຶກສາຫາລື ທີ່ເປີດກວ້າງກວ່າເກົ່າ. ໃນປັດຈຸບັນນີ້, ການຊຶ້-ຂາຍໄຟຟ້າມີພຽງແຕ່ລະຫວ່າງສອງປະເທດ ແຕ່ວ່າໃນຕໍ່ໜ້າພວກເຮົາຈະໃຫ້ມີການຊື້-ຂາຍຫລາຍຂຶ້ນກວ່າເກົ່າ ແລະ ສາມາດຊື້-ຂາຍຂ້າມໄປຍັງປະເທດທີສາມໄດ້.

KPL