ອິນໂດເນເຊຍ-ຫວຽດນາມ ຮ່ວມມື ສ້າງຈຸດຊາກລົດໄຟຟ້າ 100.000 ແຫ່ງ
ຂປລ.ສຳນັກຂ່າວ ເອເອຟພີ ລາຍງານ ຈາກ ນະຄອນຫລວງ ຈາກາຕາ ປະເທດ ອິນໂດເນເຊຍ ເມື່ອວັນທີ 13 ມີນາ, ອິນໂດເນເຊຍ ເປີດເຜີຍວ່າ: ບໍລິສັດ ວິນຟາສ ຂອງ ຫວຽດນາມ ມີແຜນສ້າງ ສະຖານີຊາກ ລົດໄຟຟ້າ 100.000 ແຫ່ງທົ່ວປະເທດ.
ໂດຍ ທ່ານ ໂຣຊານ ໂຣສລານີ ລັດຖະມົນຕີ ການລົງທຶນ ຂອງ ອິນໂດເນເຊຍ ກ່າວວ່າ ບໍລິສັດ ວີນຟາສ (VinFast) ວາງແຜນສ້າງສະຖານີຊາກລົດ ໃຫ້ໄດ້ຕາມຈຳນວນ ທີ່ກຳນົດໄວ້. ນອກຈາກນັ້ນ ບໍລິສັດ ຈະເລີ່ມສ້າງໂຮງງານ ຜະລິດຍານພາຫະນະໄຟຟ້າ ໃນແຂວງຊວາ ຕາເວັນຕົກ ດ້ວຍງົບປະມານ ການລົງທຶນຫລາຍກວ່າ 200 ລ້ານໂດລາສະຫະລັດ ແລະ ມີເປົ້າໝາຍ ຈະຜະລິດລົດໃຫຍ່ ໃຫ້ໄດ້ 50.000 ຄັນຕໍ່ປີ. ແຜນການດັ່ງກ່າວ ເກີດຂຶ້ນ ຫລັງຈາກ ທ່ານ ປຣາໂບໂວ ຊູບຽນໂຕ ປະທານາທິບໍດີ ອິນໂດເນເຊຍ ພົບປະຫາລືກັບ ທ່ານ ໂຕ໋ເລີມ ເລຂາທິການໃຫຍ່ ພັກກອມມູນິດ ຫວຽດນາມ ທີ່ ນະຄອນຫລວງ ຈາກາຕາ ເມື່ອບໍ່ດົນມານີ້ ແລະ ຜູ້ນຳທັງສອງປະເທດ ເຫັນດີ ຈະຍົກລະດັບ ການພົວພັນ ໃຫ້ກາຍເປັນ ຄູ່ຮ່ວມມື ທາງດ້ານຍຸດທະສາດ./