ສປຈີນ ເພີ່ມເງິນອຸດໜູນການຊື້-ຂາຍ-ແລກປ່ຽນລົດຖີບໄຟຟ້າ 1 ຕື້ຢວນ
ຂປລ. ສຳນັກຂ່າວ ຊິນຮວາ ຂອງ ສປຈີນ, ວັນທີ 13 ເດືອນມິນາ, ກະຊວງ ການຄ້າ ຂອງ ສປຈີນ ເປີດເຜີຍວ່າ: ສປຈີນ ແຈກຢາຍ ເງິນອຸດໜູນ 1 ຕື້ຢວນ ໃຫ້ແກ່ ຜູ້ບໍລິໂພກ ຫລາຍກວ່າ 1,65 ລ້ານຄົນ ທີ່ ເຂົ້າຮ່ວມໂຄງການ ຊື້-ຂາຍ-ແລກປ່ຽນ (trade-in) ລົດຖີບໄຟຟ້າ ນັບແຕ່ ປີ 2025 ແລະ ມີຍອດຈຳໜ່າຍ ລົດຖີບໄຟຟ້າໃໝ່ ໃນໂຄງການນີ້ ຫລາຍກວ່າ 1,66 ລ້ານຄັນ, ເປັນຕົວເລກ ສູງກວ່າ ຍອດຈຳໜ່າຍລວມ ຂອງ ປີ 2024.
ໂດຍຍອດຈຳໜ່າຍ ລົດຖີບໄຟຟ້າ ທົ່ວປະເທດ ສປຈີນ ລວມມີ 3,04 ລ້ານຄັນ ຕັ້ງແຕ່ ໂຄງການນີ້ ເລີ່ມ ຕົ້ນ ເມື່ອເດືອນກັນຍາ 2024 . ໂຄງການ ເທຣດອິນ ບໍ່ພຽງແຕ່ສ້າງຜົນປະໂຫຍດ ໃຫ້ແກ່ຜູ້ບໍລິໂພກ ແຕ່ຍັງກະຕຸ້ນຍອດຈຳໜ່າຍ ຂອງ ຜູ້ປະກອບການ ຢ່າງມີໄນສຳຄັນ ແລະ ເຮັດໃຫ້ຍອດຈຳໜ່າຍ ຍານພາຫະນະໄຟຟ້າໃໝ່ ມີມູນຄ່າລວມ 4,51 ຕື້ຢວນ ໃນປີ 2025 ຊຶ່ງເປັນ ປະໂຫຍດ ຕໍ່ ບັນດາ ຮ້ານຄ້າກວ່າ 47.000 ແຫ່ງ./