ຂປລ.ຕາມຂ່າວຈາກ ລໍສແອນເຈີລິສ, ວັນທີ10 ມັງກອນນີ້, ເຫດການໄຟໄໝ້ປ່າ ໃນເມືອງ ແປຊິຟິກ ພາດິເຊດສ ຂອງ ລໍສແອນເຈີລິສ(LA)ໃນລັດ ແຄລິຟໍເນຍ ຂອງ ສ.ອາເມລິກາ ພວມແຜ່ລາມເປັນວົງກວ້າງ ແລະ ຍັງເພີ່ມ ຄວາມຮຸນແຮງຂຶ້ນ ຢ່າງຕໍ່ເນື່ອງເຖິງ 8ຈຸດແລ້ວ ຈົນກາຍເປັນ ວິກິດໄຟປ່າ ຄັ້ງຮ້າຍແຮງ ທີ່ສຸດ ໃນປະເທດ.ຫລ້າສຸດ ມີຜູ້ເສຍຊີວິດແລ້ວ 7ຄົນ ແລະ ຕົວເລກ ອາດເພີ່ມຂຶ້ນອີກ.ນອກນີ້ ຍັງມີຜູ້ໄດ້ຮັບບາດເຈັບ ອີກຈຳນວນໜຶ່ງ. ຂະນະທີ່ ເຮືອນປະຊາຊົນ ຫລາຍກວ່າ 1 ພັນຫລັງ ຖືກໄຟໄໝ້, ຍານພາຫະນະ ຈຳນວນ ຫລວງຫລາຍ ໄດ້ຮັບຄວາມເສຍຫາຍ ຢ່າງໜັກ ເນື່ອງຈາກ ມີກະແສລົມພັດແຮງເຖິງ 160 ກິໂລແມັດຕໍ່ຊົ່ວໂມງ.ປັດຈຸບັນ ສຳນັກງານປ່າໄມ້ ແລະ ປ້ອງກັນໄຟປ່າ ລັດແຄລິຟໍເນຍ ລວມທັງ ເຈົ້າໜ້າທີ່ ກ່ຽວຂ້ອງ ຍັງບໍ່ສາມາດ ຄວບຄຸມ ໄຟໄໝ້ປ່າ ໃນຄັ້ງນີ້ ແລະ ໄຟປ່າ ອາດເພີ່ມ ຄວາມຮຸນແຮງ ຂຶ້ນອີກ ເຮັດໃຫ້ ປະຊາຊົນ ໃນເຂດໃກ້ຄຽງ ຖືກຍົກຍ້າຍ ອອກຈາກເຮືອນ ເພື່ອຄວາມປອດໄພ ແຕ່ຊັບສິນ ຖືກໄຟໄໝ້ ທັງໝົດ ສ້າງຄວາມເສຍຫາຍ ຢ່າງມະຫາສານ./.

(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ

KPL