ເປີດໃຫ້ບໍລິການທຸລະກຳເງິນຕາຂ້າມສະກຸນ ແລະ ການຊໍາລະຍ່ອຍຂ້າມແດນ ລາວ-ຫວຽດນາມ
ຂປລ. ພິທີເປີດໃຫ້ບໍລິການທຸລະກໍາເງິນຕາຂ້າມສະກຸນ ແລະ ການເຊື່ອມຕໍ່ລະບົບ ການຊໍາລະຍ່ອຍຂ້າມແດນ ໃນຮູບແບບ QR Code ລະຫວ່າງ ສປປ ລາວ ແລະ ສສ ຫວຽດນາມ ໄດ້ຈັດຂຶ້ນໃນວັນທີ 9 ມັງກອນ 2025 ເຊິ່ງເປັນຂີດໝາຍສຳຄັນ ໃນການຮ່ວມມື ໂດຍສະເເພາະ ຊຸກຍູ້ສົ່ງເສີມການຮ່ວມມື ດ້ານເສດຖະກິດ, ການຄ້າ ແລະ ການລົງທຶນ ລະຫວ່າງສອງປະເທດ ໂດຍເປັນກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ນາຍົກລັດ ຖະມົນຕີແຫ່ງ ສປປ ລາວ ແລະ ທ່ານ ຟ້າມ ມິງ ຈິງ ນາຍົກລັດຖະມົນຕີ ແຫ່ງ ສສ ຫວຽດນາມ ພ້ອມດ້ວຍການນຳພັກ, ລັດ ແລະ ພາກສ່ວນ ກ່ຽວຂ້ອງສອງປະເທດ ເຂົ້າຮ່ວມ ເປັນສັກຂີພິຍານ.
ການໃຫ້ບໍລິການທຸລະກໍາເງິນຕາຂ້າມສະກຸນ ດັ່ງກ່າວ, ປະຕິບັດຕາມທິດຊີ້ນຳ ຂອງການນຳຂັ້ນສູງຂອງສອງປະເທດ, ທະນາຄານແຫ່ງ ສປປ ລາວ ແລະ ທະນາຄານແຫ່ງລັດ ຫວຽດນາມ ໄດ້ຮ່ວມກັນຄົ້ນຄວ້າກ່ຽວກັບ ການສົ່ງເສີມການນໍາໃຊ້ສະກຸນເງິນທ້ອງຖິ່ນ ຫລື ສະກຸນເງິນ ຂອງສອງປະເທດ ແຕ່ທ້າຍປີ 2023 ເພື່ອສົ່ງເສີມການນໍາໃຊ້ ເງິນກີບ-ເງິນດົງ ດ້ວຍການເພີ່ມທາງເລືອກ ໃຫ້ວິສາຫະກິດ ຂອງທັງສອງປະເທດ ມີທາງເລືອກໃນການນໍາໃຊ້ສະ ກຸນເງິນຂອງຕົນ ໃນການຊໍາລະ ລະຫວ່າງກັນເພີ່ມຂຶ້ນ ແລະ ທັງເປັນການຫລຸດຜ່ອນຄວາມກົດດັນ ດ້ານຄວາມຕ້ອງ ການເງິນຕາຕ່າງປະເທດ ທີ່ກະທົບຕໍ່ຄັງສຳຮອງເງິນຕາຕ່າງປະເທດ ຂອງສອງປະເທດ.
ການໃຫ້ບໍລິການໃນຄັ້ງນີ້, ໄດ້ຈັດຕັ້ງດຳເນີນງານຢູ່ 2 ໂຄງການ ຄື: ໂຄງການສົ່ງເສີມການນຳໃຊ້ ສະກຸນເງິນທ້ອງຖິ່ນ ເພື່ອຊຳລະການຄ້າ, ການລົງທຶນ ແລະ ການກູ້ຢືມ ໃຫ້ແກ່ພາກການຄ້າ-ການລົງທຶນ ລະຫວ່າງກັນ ແລະ ໂຄງການເຊື່ອມຕໍ່ ການຊຳລະຍ່ອຍຂ້າມແດນໃນຮູບແບບ QR Code ເພື່ອຮອງຮັບການຊໍາລະຄ່າສິນຄ້າ ແລະ ບໍລິການ ໂດຍນໍາໃຊ້ສະກຸນເງິນທ້ອງຖິ່ນ ກີບ-ດົງ ໃນການຊຸກຍູ້ສົ່ງເສີມການທ່ອງທ່ຽວຂອງສອງປະເທດ. ການເປີດໃຫ້ບໍລິການໃນໄລຍະເບື້ອງຕົ້ນນີ້ ມີພຽງ ສສ ຫວຽດນາມ ສາມາດມາຊຳລະຜ່ານ QR ສປປ ລາວ ໄດ້, ສ່ວນ ສປປ ລາວ ຈະນໍາໃຊ້ລະບົບຊໍາລະຜ່ານ QR ຢູ່ທີ່ ສສ ຫວຽດນາມ ໄດ້ນັ້ນແມ່ນຢູ່ ໃນໄລຍະທີ່ສອງ, ຄາດວ່າຈະນໍາໃຊ້ໄດ້ໃນທ້າຍປີນີ້.
ໂອກາດນີ້, ທ່ານ ສຸລິສັກ ທໍານຸວົງ ຮອງຜູ້ວ່າການ ທະນາຄານແຫ່ງ ສປປ ລາວ ແລະ ທ່ານ ຟາມ ຕຽນ ຢຸງ ຮອງຜູ້ວ່າການ ທະນາຄານແຫ່ງລັດຫວຽດນາມ ໄດ້ມີຄຳເຫັນ ແລະ ສະແດງຄວາມຂອບໃຈ ມາຍັງທຸກພາກສ່ວນ ທີ່ເຫັນໄດ້ເຖິງຄວາມສໍາຄັນຂອງການສົ່ງເສີມ ການນຳໃຊ້ສະກຸນເງິນທ້ອງຖິ່ນ ກີບ-ດົງ ລະຫວ່າງ ສປປ ລາວ-ສສ ຫວຽດນາມ ແລະ ຈະສືບຕໍ່ຊຸກຍູ້ພັດທະນາ ວຽກງານດັ່ງກ່າວ, ໃຫ້ມີຄວາມຄືບໜ້າ ສໍາເລັດຕາມຄາດໝາຍທີ່ໄດ້ກຳນົດໄວ້.
ຂ່າວ: ທະນູທອງ
ພາບ: ເກດສະໜາ