ຂປລ. ໂຮງຮຽນວັດທະນະທຳຊົນເຜົ່າກອງທັບ (ຮວຜທ) ຈັດກອງປະຊຸມສະພາສອບເສັງ ພາກຮຽນ ທີ I ປະຈຳສົກຮຽນ 2024-2025 ໃນວັນທີ 9 ມັງກອນ 2025 ໂດຍການເປັນປະທານຂອງ ສະຫາຍ ພັນເອກ ເພັດສະໝອນ ວິລະວອນ ຫົວໜ້າການທະຫານ ໂຮງຮຽນວັດທະນະທຳຊົນເຜົ່າກອງທັບ, ມີຄະນະຫ້ອງ 4 ຫ້ອງ, 2 ກອງພັນ ຕະຫລອດຮອດພະນັກງານ-ນັກຮົບ ແລະ ນ້ອງນັກຮຽນທົ່ວໂຮງຮຽນ ເຂົ້າຮ່ວມ.

ກອງປະຊຸມ ໄດ້ຜ່ານແຜນການສອບເສັງ ແລະ ຂໍ້ຕົກລົງວ່າດ້ວຍການແຕ່ງຕັ້ງຄະນະຊີ້ນຳ, ອະນຸກຳມະການ ສອບເສັງພາກຮຽນທີ I ປະຈຳສົກຮຽນ 2024-2025, ຜ່ານກົດລະບຽບການສອບເສັງ, ສິດ ແລະ ໜ້າທີ່ຂອງກຳມະການຍາມຫ້ອງສອບເສັງ ແລະ ຜ່ານຕາຕະລາງສອບເສັງ. ທັງນີ້, ກໍເພື່ອເປັນການກວດກາຄືນ ໃນການຈັດຕັ້ງການຮຽນ-ການສອນ ໃນໄລຍະໜຶ່ງພາກຮຽນ ທີ່ຜ່ານມາ ຂອງຄູອາຈານ ແລະ ນັກຮຽນ, ເປັນການປະຕິບັດຂັ້ນຕອນ ບາດກ້າວ ຂອງການຮຽນ-ການສອນ ຂອງລະບົບສາມັນສຶກສາ ຕາມທີ່ກະຊວງສຶກສາທິການ ແລະ ກິລາວາງອອກ ແລະ ເປັນການວັດແທກ ປະເມີນຜົນການຮຽນ-ການສອນ, ທັງເປັນການຮັບປະກັນ ໃຫ້ບັ້ນດຳເນີນການສອບເສັງ ໃຫ້ນັກຮຽນ ມ2, ມ6 ແລະ ມ7 ເຂົ້າຮ່ວມສອບເສັງ ຢ່າງເປັນຂະບວນການຟົດຟື້ນ, ມີຄວາມເປັນລະບຽບຮຽບຮ້ອຍ  ແລະ ບັນລຸຕາມແຜນການວາງອອກໃຫ້ໄດ້ຮັບຜົນສູງ. 

ໂອກາດນີ້ ສະຫາຍ ພັນເອກ ເພັດສະໝອນ ວິລະວອນ ກໍໄດ້ມີຄຳເຫັນໂອ້ລົມຕໍ່ກອງປະຊຸມ, ພ້ອມທັງຮຽກຮ້ອງໃຫ້ ບັນດາສະຫາຍທີ່ຖືກການແຕ່ງຕັ້ງ ຮັບຜິດຊອບນັ້ນ ຈົ່ງພ້ອມກັນຍົກສູງຄວາມຮັບຜິດຊອບຕໍ່ໜ້າທີ່ ທີໄດ້ຮັບການມອບໝາຍ ໃຫ້ປະສົບຜົນສຳເລັດ, ຮັກສາຈັນຍາບັນ-ຈັນຍາທຳ, ຮັກສາຄວາມສະຫງົບໃຫ້ໄດ້ 100%, ປະຕິບັດບັດຕາມກົດລະບຽບ ເພື່ອເຮັດໃຫ້ການສອບເສັງ ພາກຮຽນທີ I ສົກຮຽນ 2024-2025 ນີ້ໄດ້ຮັບໝາກຜົນຕາມຂາດໝາຍທີ່ວາງໄວ້.

ຂ່າວ: ໂອລິນ ມິ່ງມີໄຊ

KPL