ສູນເລືອດແຂວງຫລວງນ້ຳທາ ແລະ ອຸດົມໄຊ ໄດ້ຮັບມອບພາຫະນະ ຮັບໃຊ້ວຽກງານ
ຂປລ. ອົງການກາແດງແຫ່ງຊາດລາວ ຈັດພິທີມອບ-ຮັບ ລົດຕູ້ ຈຳນວນ 2 ຄັນ ໃຫ້ແກ່ສູນເລືອດອົງການກາແດງແຂວງ ຫລວງນ້ຳທາ ແລະ ອຸດົມໄຊ ແຂວງລະ 1 ຄັນ ແລະ ເຄື່ອງຕັດສາຍເລືອດ ແຂວງລະ 2 ເຄື່ອງ ໃນວັນທີ 8 ມັງກອນ 2025, ມອບໂດຍ ທ່ານ ຈັນທະລາ ສຸກສາຄອນ ຫົວໜ້າສະຖາບັນເລືອດແຫ່ງຊາດ ແລະ ຮັບໂດຍ ທ່ານ ສົມສຸກ ສຸກສະຫວັດ ຫົວໜ້າອົງການກາແດງ ແຂວງຫລວງນ້ຳທາ ແລະ ທ່ານ ນາງ ສິດທິວອນ ຫົງສາຄອນ ຫົວໜ້າອົງການກາແດງ ແຂວງ ອຸດົມໄຊ, ມີ ທ່ານ ຄຳລາວັນ ຈັນທະລາວັນ ປະທານອົງການກາແດງແຫ່ງຊາດລາວ, ການນຳແຂວງ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ການສະໜອງພາຫະນະໃນຄັ້ງນີ້, ກໍເພື່ອນຳໃຊ້ເຂົ້າໃນວຽກງານ ປຸກລະດົມຂົນຂວາຍບໍລິຈາກເລືອດ ຕາມສະຖານທີ່ເປົ້າໝາຍຕ່າງໆ ພາຍໃນແຂວງຂອງຕົນ ແນໃສ່ຮັບປະກັນເຮັດໃຫ້ ວຽກງານເລືອດມີຄວາມເຂັ້ມແຂງ, ມີເລືອດພຽງພໍ, ປອດໄພ ແລະ ມີເລືອດໃສ່ໃຫ້ຄົນເຈັບທີ່ຕ້ອງການໃສ່ເລືອດ ເພື່ອປິ່ນປົວ ຕາມໂຮງໝໍ ແຫ່ງຕ່າງໆ ທົ່ວປະເທດ. ລົດຕູ້ ແລະ ເຄື່ອງຕັດສາຍເລືອດ ທີ່ນຳມາມອບໃນຄັ້ງນີ້ ໄດ້ຮັບການຊ່ວຍເຫລືອ ຈາກສູນເລືອດແຫ່ງຊາດ ອົງການກາແດງ ສ ເກົາຫລີ ລວມມູນຄ່າ 80.180 ໂດລາສະຫະລັດ. ອີງຕາມການລາຍງານ ການອອກຮັບບໍລິຈາກເລືອດນອກສະຖານທີ່ຕ່າງໆກວມ 80% ເຊິ່ງຈຳເປັນຕ້ອງມີພາຫະນະຮັບໃຊ້ ເພື່ອອອກຮັບບໍລິຈາກເລືອດ. ດັ່ງນັ້ນ ການຊ່ວຍເຫລືອຄັ້ງນີ້, ຈະຊ່ວຍເພີ່ມຈໍານວນ ການຮັບບໍລິຈາກເລືອດ ຢູ່ຕາມສະຖານທີ່ຕ່າງໆ ໃຫ້ຫລາຍຂຶ້ນກວ່າເກົ່າ.
ສຳລັບຕົວເລກຄາດໝາຍສູ້ຊົນ ການຮັບບໍລິຈາກເລືອດປີ 2025 ທົ່ວປະເທດ ຕ້ອງບັນລຸຕົວເລກ 80.400 ຖົງ. ໃນນັ້ນ, ເລກເປົ້າໝາຍເຄື່ອນໄຫວ ຮັບບໍລິຈາກເລືອດ ຂອງສູນເລືອດອົງການກາແດງ ແຂວງຫລວງນ້ຳທາ ໃຫ້ບັນລຸ 2.100 ຖົງ ແລະ ແຂວງ ອຸດົມໄຊ ໃຫ້ບັນລຸ 2.400 ຖົງ.
ຂ່າວ-ພາບ: ອົງການກາແດງແຫ່ງຊາດລາວ