ສະຖາບັນວິຈິດສິນແຫ່ງຊາດ ມອບ-ຮັບ ປະກາສະນີຍະບັດ ໃຫ້ຜູ້ສໍາເລັດການສຶກສາ
ຂປລ. ສະຖາບັນວິຈິດສິນແຫ່ງຊາດ ຈັດພິທີສະຫລຸບ ການຮຽນ-ການສອນສົກສຶກສາ 2023-2024, ເປີດສົກຮຽນໃໝ່ 2024-2025 ແລະ ມອບ-ຮັບໃບປະກາສະນີຍະບັດ ໃຫ້ຜູ້ສໍາເລັດ ການສຶກສາ ປະຈໍາສົກສຶກສາ 2023-2024 ຂຶ້ນໃນວັນທີ 15 ຕຸລາ 2024 ໂດຍການເຂົ້າຮ່ວມ ແລະ ມອບໃບປະກາສະນີຍະບັດຂອງ ທ່ານ ນາງ ສວນສະຫວັນ ວິຍະເກດ ລັດລັດຖະມົນຕີ ກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ (ຖວທ), ທ່ານ ຄໍາສຸກ ແກ້ວວົງຊາຍ ຜູ້ອໍານວຍການສະຖາບັນວິຈິດສິນແຫ່ງຊາດ, ຄູ-ອາຈານ, ນັກສຶກສາ ແລະ ພາກສ່ວນ ກ່ຽວຂ້ອງເຂົ້າຮ່ວມ.
ໃນພິທີ, ທ່ານ ສາຍສະໝອນ ໂພທະລິນ ຮອງຜູ້ອໍານວຍການ ສະຖາບັນວິຈິດສິນແຫ່ງຊາດ ໄດ້ສະຫລຸບການຈັດຕັງປະຕິບັດວຽກງານ ສົກຮຽນ 2023-2024 ໂດຍສະຖາບັນ ວິຈິດສິນແຫ່ງຊາດ ໄດ້ຈັດຕັ້ງປະຕິບັດຫລັກສູດ ການຮຽນ-ການສອນ ຕາມການຮັບຮອງອະນຸມັດ ຈາກກະຊວງສຶກສາທິການ ແລະ ກິລາ, ກະຊວງ ຖວທ, ໄດ້ດໍາເນີນການ ຮຽນ-ການສອນ ຢູ່ 3 ລະດັບເຊັ່ນ: ຫລັກສູດລະດັບອະນຸປະລິນຍາ ລະບົບ 3 ປີ, ມີ 3 ສາຂາວິຊາຄື: ສາຂາວິຊາຈິດຕະກຳ, ປະຕິມະກຳ ແລະ ສິລະປະພາບພິມ; ຫລັກສູດລະດັບ ປະລິນຍາຕີ ລະບົບ 5 ປີ ປະກອບ ມີ 5 ພາກວິຊາເຊັ່ນ: ພາກວິຊາຈິດຕະກຳ, ພາກວິຊາປະຕິມະກຳ, ພາກວິຊາສິລະປະພາບພິມ, ພາກວິຊາສິລະປະພື້ນ ເມືອງ-ປະຕິສັງຂອນ; ສ່ວນພາກ ວິຊາອອກແບບນິເທດສິນ ປະກອບດ້ວຍ 9 ສາຂາວິຊາເຊັ່ນ: ຈິດຕະກຳ, ປັ້ນ-ຫລໍ່, ຄວັດແກະສະຫລັກ, ສິລະປະປັ້ນດິນເຜົາ, ສິລະປະໂລຫະ, ສິລະປະພາບພິມ, ສິລະປະພື້ນ ເມືອງ-ປະຕິສັງຂອນ, ຮູບເງົາ-ກາຕູນ ແລະ ອອກແບບບັນຈຸພັນ. ນອກຈາກນີ້, ຍັງມີສູດລະດັບປະລິນຍາໂທ ລະບົບ 2 ປີມີ 1 ສາຂາວິຊາຄື: ສາຂາວິຊາບໍລິຫານຄຸ້ມຄອງ ສິລະປະ-ວັດທະນະທຳ.
ໂອກາດນີ້, ທ່ານ ນາງ ສວນສະຫວັນ ວິຍະເກດ ຍັງໄດ້ສະແດງຄວາມຊົມເຊີຍ ຕໍ່ຜົນສໍາລັດທີ່ຍາດມາໄດ້ ໃນໄລຍະຜ່ານມາ, ພ້ອມທັງໃຫ້ທິດເຍື່ອງທາງ ບາງບັນຫາສໍາຄັນ ເພື່ອໃຫ້ ສະຖາບັນ ວິຈິດສິນແຫ່ງຊາດ ມີການພັດທະນາຂຶ້ນຢ່າງບໍ່ຢຸດຢັ້ງ.
ຂ່າວ: ໜັງສືພິມປະຊາຊົນ