ຫລາຍພາກສ່ວນມອບເງິນສະໜັບໜູນກອງປະຊຸມໄອປາ
ຂປລ. ວັນທີ 15 ຕຸລາ 2024 ຜ່ານມາ, ທີ່ສະພາແຫ່ງຊາດ ໄດ້ມີພິທີມອບ-ຮັບ ເງິນສະໜັບສະໜູນ ການເປັນເຈົ້າພາບ ກອງປະຊຸມສະມັດຊາໃຫຍ່ ລັດຖະສະພາລະຫວ່າງຊາດອາຊຽນ ຫລື ໄອປາ (AIPA) ຄັ້ງທີ 45 ຈາກບໍລິສັດ ພີທີແອວ ໂຮນດິງ (PTL Holding) 300 ລ້ານກີບ, ສູນການແພດເວດສະພົງ 100 ລ້ານກີບ, ກຸ່ມບໍລິສັດ ຕັງຈະເລີນ ຈຳກັດ 20 ລ້ານກີບ ຕ່າງໜ້າຮັບໂດຍ ທ່ານ ບຸນທັນ ບຸນວິໄລ ຮອງເລຂາທິການສະພາແຫ່ງຊາດ ແລະ ກ່າວມອບໂດຍ ທ່ານ ສີລາ ວຽງແກ້ວ ຮອງປະທານກຳມະການ ວຽກງານການຄ້າ ແລະ ກົດໝາຍ ຂອງບໍລິສັດ ພີທີແອວ ໂຮນດິງ ຈຳກັດ, ທ່ານ ນາງ ວາລີ ເວດສະພົງ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1 ນະຄອນຫລວງວຽງຈັນ, ທ່ານ ຄໍາໄຕ ແກ້ວດວງດີ ຮອງອຳນວຍການກຸ່ມບໍລິສັດ ຕັງຈະເລີນ ຈຳກັດ.
ໂອກາດນີ້, ທ່ານ ບຸນທັນ ບຸນວິໄລ ໄດ້ສະແດງຄວາມຂອບໃຈ ມາຍັງພາກສ່ວນຕ່າງໆ ທີ່ໃຫ້ການສະໜັບສະໜູນໃນຄັ້ງນີ້, ພ້ອມທັງ ມອບໃບຍ້ອງຍໍຂອງຄະນະປະຈຳ ສະພາແຫ່ງຊາດ ໃຫ້ 3 ພາກສ່ວນດັ່ງກ່າວ ເພື່ອເປັນການຍ້ອງຍໍຜົນງານດີເດັ່ນ ໃນການປະກອບສ່ວນຊຸກຍູ້ ແລະ ອຸປະຖຳກອງປະຊຸມສະ ມັດຊາໃຫຍ່ລັດຖະສະພາ ລະຫວ່າງຊາດອາຊຽນ ຫລື ໄອປາ ຄັ້ງນີ້.
ໃນວັນທີ 16 ຕຸລາ 2024 ນີ້, ທ່ານ ນາງ ອຳໄພວອນ ລ້ອມບຸນແພງ ເລຂາທິການສະພາແຫ່ງຊາດ ກໍໄດ້ຮັບເງິນສະໜັບສະໜູນກອງປະຊຸມໄອປາ 100 ລ້ານກີບ ຈາກເຂດເສດຖະກິດ ພິເສດ ສະ ຫວັນ ພາກ (SAVAN Park) ເຊັ່ນດຽວກັນ.
ຂ່າວ: ອາລິນ ສຸພິມມະປະດິດ