ຄະນະຊີ້ນຳການປະຕິບັດບົດບັນທຶກຄວາມປອດໄພຂອງການຂົນສົ່ງທາງນໍ້າ ລາວ-ໄທ ຈັດກອງປະຊຸມຄັ້ງປະຖົມມະລືກ
ໂດຍການເປັນປະທານຮ່ວມຂອງ ທ່ານ ຄຳຫຼ້າ ພົມມະວັນ ຫົວໜ້າກົມທາງນ້ຳ, ກະຊວງໂຍທາທິການ ແລະ ຂົນສົ່ງ ແຫ່ງ ສປປ ລາວ ແລະ ທ່ານ ວິວັດ ຊິດເຊີດວົງ ຊຶ່ງເປັນຕົວແທນຈາກ ກົມເຈົ້າທ່າ ແຫ່ງ ລາຊະອານາຈັກໄທ, ມີຫົວໜ້າກອງເລຂາຄະນະກຳມະການແມ່ນ້ຳຂອງແຫ່ງຊາດ, ຫົວໜ້າພະແນກແຜນການ ແລະ ກອງເລຂາຄະນະກຳມາທິການແມ່ນ້ຳຂອງ (MRCS) ພ້ອມດ້ວຍພາກສ່ວນກ່ຽວຂ້ອງ ສອງຝ່າຍ ເຂົ້າຮ່ວມ.
ຈຸດປະສົງຫຼັກຂອງກອງປະຊຸມໃນຄັ້ງນີ້ ເພື່ອສ້າງຕັ້ງຄະນະກຳມະການຊີ້ນຳສອງຝ່າຍຢ່າງເປັນທາງການ ແລະ ຮັບຮອງເອົາເງື່ອນໄຂການປະຕິບັດງານ (TOR); ແຕ່ງຕັ້ງຄະນະວິຊາການ ຈາກທັງສອງຝ່າຍ ເຂົ້າໃນຄະນະກຳມະການ; ສ້າງແຜນຈັດຕັ້ງປະຕິບັດວຽກງານດັ່ງກ່າວ ເພື່ອຈັດຕັ້ງປະຕິບັດເອກະສານຊ້ອນທ້າຍ 5 ສະບັບທຳອິດ ໄປຈົນເຖິງປີ 2030 ແລະ ວາງແຜນສືບຕໍ່ໃນອະນາຄົດ. ພ້ອມນີ້, ຜູ້ເຂົ້າຮ່ວມກອງປະຊຸມ ໄດ້ລົງຢ້ຽມຢາມມະຫາວິທະຍາໄລສຸພານຸວົງ ແລະ ທ່າເຮືອໃນເຂດຕົວເມືອງຫຼວງພະບາງ ເພື່ອສັງເກດສະພາບການເດີນເຮືອຕົວຈິງ, ການຄຸ້ມຄອງທ່າເຮືອ, ສິ່ງທ້າທາຍດ້ານຄວາມປອດໄພ, ມາດຕະການຕອບໂຕ້ເຫດສຸກເສີນ ກ່ຽວກັບການຮົ່ວໄຫຼຂອງນ້ຳມັນ ແລະ ເພື່ອພົບປະກັບສະມາຄົມເຮືອໃນທ້ອງຖິ່ນ.
ຜົນສຳເລັດຂອງກອງປະຊຸມຄັ້ງນີ້ ຖືເປັນການຫັນເອົານະໂຍບາຍ ແລະ ຂໍ້ຕົກລົງລະດັບມະຫາພາກ ມາສູ່ມາດຕະຖານເຕັກນິກ ແລະ ກົນໄກບໍລິຫານທີ່ແທ້ຈິງຢູ່ຕາມລຳນ້ຳຂອງ. ການກຳນົດມາດຕະຖານໂຄງສ້າງເຮືອ, ລະບົບສື່ສານນຳທາງ, ເຄື່ອງໝາຍເດີນເຮືອ ແລະ ຫຼັກການກູ້ໄພພາຍໃຕ້ “ການບັນຊາຮ່ວມ” ຈະຊ່ວຍຫຼຸດຜ່ອນອຸບັດເຫດ, ປ້ອງກັນມົນລະພິດ ແລະ ຍົກລະດັບປະສິດທິພາບການຂົນສົ່ງສິນຄ້າ ແລະ ທ່ອງທ່ຽວຂ້າມຊາຍແດນໃຫ້ມີຄວາມກົມກຽວກັນ. ຜົນຂອງກອງປະຊຸມ ຈະນຳໄປລາຍງານຕໍ່ກອງປະຊຸມສະພາຄະນະກຳມາທິການແມ່ນ້ຳຂອງສາກົນ ໃນເດືອນພະຈິກ 2026 ນີ້.