ຜູ້ເສຍຊີວິດຈາກອຸບັດເຫດທາງຫລວງ ໃນ ສປປ ລາວ 900-1.000 ຕໍ່ປີ
ຂປລ. ມີທ່ານ ຄໍາແສງ ອາລີ ຮອງປະທານຄະນະກໍາມະການປົກຄອງແຂວງ ອຸດົມໄຊ, ບັນດາຮອງລັດຖະມົນຕີ, ຄະນະກຳມະການດ້ານຄວາມປອດໄພທາງຫລວງຂັ້ນແຂວງ ແລະ ນະຄອນຫລວງ, ຜູ້ຕາງໜ້າອົງການຈັດຕັ້ງສາກົນ ແລະ ແຂກເຊີນເຂົ້າຮ່ວມ ເພື່ອສະຫລຸບການຈັດຕັ້ງປະຕິບັດວຽກງານປະຈຳປີ 2026 ແລະ ວາງທິດທາງແຜນການໄລຍະ 6 ເດືອນທ້າຍປີ 2026-2027. ໃນຂະນະທີ່ 5 ປີຜ່ານມາ, ຈຳນວນຜູ້ເສຍຊີວິດຈາກອຸບັດເຫດທາງຫລວງໃນ ສປປ ລາວ ຍັງສູງຢູ່ ລະດັບ 900-1.000 ຄົນຕໍ່ປີ. ໃນນັ້ນ, 80% ແມ່ນຊາວໜຸ່ມ, ເຍົາວະຊົນ ແລະ ກຳລັງແຮງງານຫລັກ.
ໃນກອງປະຊຸມ, ທ່ານ ເຫລັກໄຫລ ສີວິໄລ ໄດ້ເນ້ັນໃຫ້ເຫັນເຖິງຄວາມສໍາຄັນຂອງວຽກງານຄວາມປອດໄພທາງຫລວງ ຊຶ່ງເປັນວຽກງານທີ່ຕິດພັນກັບຊີວິດ ແລະ ຊັບສິນຂອງປະຊາຊົນ. ໃນຕະຫລອດໄລຍະ 5 ປີຜ່ານມາຮອດປັດຈຸບັນ, ຈຳນວນຜູ້ເສຍຊີວິດຈາກອຸບັດເຫດທາງຫລວງໃນ ສປປ ລາວ ຍັງສູງ ຢູ່ທີ່ລະດັບ 900 ຫາ 1.000 ຄົນຕໍ່ປີ, ໃນນັ້ນ 80% ແມ່ນຊາວໜຸ່ມ, ເຍົາວະຊົນ ແລະ ກຳລັງແຮງງານຫລັກ. ການສູນເສຍດັ່ງກ່າວ, ໄດ້ສ້າງຄວາມເສຍຫາຍທາງດ້ານເສດຖະກິດ-ສັງຄົມສູງເຖິງ 175 ລ້ານໂດລາສະຫະລັດຕໍ່ປີ ຊຶ່ງອົງ ການສາກົນໄດ້ປະເມີນວ່າ ການເສຍຊີວິດຂອງປະຊາກອນ 1 ຄົນມີມູນ ຄ່າເທົ່າກັບ 70 ເທົ່າຂອງ GDP. ສາເຫດຕົ້ນຕໍແມ່ນເກີດຈາກການຂັບຂີ່ລົດໄວ, ເມົາແລ້ວຂັບ, ເຕັກນິກພາຫະນະບໍ່ໄດ້ມາດຕະຖານ ແລະ ການບໍ່ປະຕິບັດກົດຈະລາຈອນ ໂດຍສະເພາະໃນເວລາ 17:00- 01:00 ໂມງ.
ຄຽງຄູ່ກັບການຂະຫຍາຍຕົວຂອງພື້ນຖານໂຄງລ່າງ ແລະ ຈຳນວນພາຫະນະທີ່ເພີ່ມຂຶ້ນ, ລັດຖະບານ ໄດ້ໃຫ້ຄວາມສຳຄັນຢ່າງຍິ່ງ ໃນການຕິດຕາມກວດກາການຈັດຕັ້ງປະຕິບັດຍຸດທະສາດແຫ່ງຊາດ ດ້ານຄວາມປອດໄພທາງຫລວງ ໄລຍະປີ 2021-2030. ກອງປະຊຸມໃນຄັ້ງນີ້, ຜູ້ເຂົ້າຮ່ວມໄດ້ຮັບຟັງ ແລະ ປຶກສາຫາລືໃນຫລາຍເນື້ອໃນສຳຄັນ ເປັນຕົ້ນບົດສະຫລຸບວຽກງານປີ 2026 ແລະ ແຜນການປີ 2026-2027, ຄຳສັ່ງວ່າດ້ວຍການເພີ່ມທະວີຄວາມເຂັ້ມງວດໃນການຄຸມນໍ້າໝັກລົດບັນທຸກ ແລະ ມາດຕະການປັບໃໝ, ລົງວິໄນ, ລົງໂທດຕໍ່ຜູ້ລະເມີດບັນທຸກນໍ້າໜັກເກີນກຳນົດ, ການນຳໃຊ້ເຕັກໂນໂລຊີທັນສະໄໝເຂົ້າໃນການບັງຄັບໃຊ້ກົດໝາຍຈະລາຈອນເຊັ່ນ: ການກວດກາການດື່ມແລ້ວຂັບ, ການຮັດສາຍນິລະໄພ, ການໃສ່ໝວກກັນກະທົບ, ການບັນຈຸຄວາມຮູ້-ຄວາມປອດໄພທາງຫລວງເຂົ້າໃນຫລັກສູດການຮຽນ- ການສອນ, ລວມເຖິງການປັບປຸງລະບົບການປິ່ນປົວ ແລະ ການຂົນສົ່ງຜູ້ບາດເຈັບສຸກເສີນຈາກຈຸດເກີດເຫດໄປໂຮງໝໍ.
ພ້ອມກັນນີ້, ທ່ານປະທານກອງປະຊຸມໄດ້ຮຽກຮ້ອງໃຫ້ບັນດາຜູ້ຕາງໜ້າ ແລະ ແຂກທີ່ເຂົ້າຮ່ວມຈົ່ງເຊີດຊູຄວາມຮັບຜິດຊອບ, ສຸມສະຕິປັນຍາເຂົ້າໃນການຄົ້ນຄວ້າ ແລະ ປະກອບຄຳເຫັນຢ່າງກົງໄປກົງມາ ເພື່ອຊອກຫາວິທີການແກ້ໄຂບັນຫາໃຫ້ແທດເໝາະກັບສະພາບຄວາມເປັນຈິງ. ທັງນີ້, ກໍເພື່ອຮັບປະກັນໃຫ້ການຈັດຕັ້ງປະຕິບັດວຽກງານຄວາມປອດໄພທາງຫລວງໃຫ້ມີປະສິດທິຜົນສູງສຸດ, ຊ່ວຍປົກປ້ອງຊີວິດ ແລະ ຊັບສິນຂອງປະຊາຊົນ, ພ້ອມທັງຫລຸດຜ່ອນອຸບັດເຫດທາງຫລວງໃຫ້ຫລຸດລົງຢ່າງເປັນຮູບປະທຳໃນໄລຍະຕໍ່ໄປ.