(ຂປລ) ໃນເຫດການປະຫວັດສາດ ຂອງ ການຄຸ້ມຄອງເຕັກໂນໂລຊີ ລະດັບໂລກ, ໂດຍມີ ຜູ້ຕາງໜ້າຈາກ 29 ປະເທດ ໄດ້ເຂົ້າກອງປະຊຸມ ທີ່ນະຄອນຊຽງໄຮ ສປ ຈີນ ໃນວັນທີ 16 ກໍລະກົດ 2026 ເພື່ອຮ່ວມກັນລົງນາມ ໃນສັນຍາສ້າງຕັ້ງອົງການຮ່ວມມື ດ້ານປັນຍາປະດິດໂລກ (World AI Cooperation Organization - WAICO) ຢ່າງເປັນທາງການ ເຊິ່ງເປັນໝາກຜົນ ຂອງ ການປຶກສາຫາລື ຫຼາຍຝ່າຍຕະຫຼອດ ໄລຍະ 1 ປີຜ່ານມາ ເພື່ອສົ່ງເສີມວິທີການຮ່ວມມື ໃນການຮັບມືກັບ ການພັດທະນາຢ່າງວ່ອງໄວ ຂອງ ປັນຍາປະດິດ (AI).

ພາລະກິດເພື່ອຄວາມສະເໝີພາບລະດັບໂລກ

ອີງຕາມສັນຍາທີ່ໄດ້ລົງນາມ, ອົງການຮ່ວມມື ດ້ານປັນຍາປະດິດໂລກ (WAICO) ໄດ້ຖືກສ້າງຕັ້ງຂຶ້ນເປັນອົງການລະຫວ່າງລັດຖະບານ ໂດຍຍຶດໝັ້ນຕາມຫຼັກການພື້ນຖານ ຂອງ ກົດບັດສະຫະປະຊາຊາດ ແລະ ມຸ່ງໝັ້ນໃນຄຸນຄ່າຂອງ “ການປຶກສາຫາລືຢ່າງກວ້າງຂວາງ, ການປະກອບສ່ວນຮ່ວມກັນ ແລະ ຜົນປະໂຫຍດຮ່ວມກັນ”.

ກົດບັດຂອງອົງການນີ້ ໄດ້ເນັ້ນໜັກເຖິງ ວິທີການທີ່ເອົາປະຊາຊົນ ເປັນໃຈກາງ ໂດຍມີໜ້າທີ່ຫຼັກຄື:

 * ສົ່ງເສີມການຮ່ວມມື ລະຫວ່າງປະເທດ ຢ່າງເຂັ້ມແຂງໃນຂົງເຂດ ປັນຍາປະດິດ(AI).

 * ເສີມສ້າງການຄຸ້ມຄອງລະດັບໂລກ.

 * ຮັບປະກັນວ່າ ເຕັກໂນໂລຊີ ປັນຍາປະດິດ AI ຖືກພັດທະນາ ໃນຮູບແບບທີ່ເປັນປະໂຫຍດ, ປອດໄພ ແລະ ສະເໝີພາບກັນ ສຳລັບ ມວນມະນຸດທຸກຄົນ.

ອົງການດັ່ງກ່າວ ຈະມີສຳນັກງານໃຫຍ່ ຕັ້ງຢູ່ນະຄອນຊຽງໄຮ້, ເຊິ່ງເປັນ ການສະແດງໃຫ້ເຫັນເຖິງ ບົດບາດທີ່ນັບມື້ນັບເພີ່ມຂຶ້ນ ຂອງ ນະຄອນດັ່ງກ່າວ ໃນຖານະເປັນສູນກາງ ທາງການທູດ ດ້ານເຕັກໂນໂລຊີສາກົນ.

ຂີດໝາຍສໍາຄັນທາງການທູດ

ທ່ານ ຫວັງ ອີ້ (Wang Yi), ກຳມະການກົມການເມືອງ ສູນກາງພັກ, ລັດຖະມົນຕີ ກະຊວງການຕ່າງປະເທດ ແຫ່ງ ສປ ຈີນ ໄດ້ເຂົ້າຮ່ວມ ເປັນປະທານ ໃນພິທີລົງນາມ ໂດຍຕາງໜ້າໃຫ້ລັດຖະບານຈີນ. ພິທີດັ່ງກ່າວ ໄດ້ມີຜູ້ແທນຂັ້ນສູງ ຈາກທົ່ວໂລກເຂົ້າຮ່ວມ,  ລວມທັງ ທ່ານ ອັນໂຕນິໂອ ກູເຕີເຣສ (António Guterres) ເລຂາທິການໃຫຍ່ອົງການ ສະຫະປະຊາຊາດ ກໍໄດ້ເຂົ້າຮ່ວມ ເປັນສັກຂີພິຍານ ໃນການສ້າງຕັ້ງອົງການນີ້ ຢ່າງເປັນທາງການ.

ທ່ານ ທອງສະຫວັນ ພົມວິຫານ, ຮອງນາຍົກລັດຖະມົນຕີ, ລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ກໍໄດ້ເຂົ້າຮ່ວມລົງນາມໃນພິທີດັ່ງກ່າວເຊັ່ນກັນ.

ຮາກຖານສຳລັບການຮ່ວມມືໃນອະນາຄົດ

ການສ້າງຕັ້ງ ອົງການຮ່ວມມື ດ້ານປັນຍາປະດິດໂລກ (WAICO) ຢ່າງວ່ອງໄວພາຍໃນເວລາພຽງ 1 ປີ ໄດ້ສະແດງໃຫ້ເຫັນເຖິງ ຄວາມເຫັນດີເຫັນພ້ອມ ລະດັບສາກົນ ກ່ຽວກັບ ຄວາມຮີບດ່ວນ ໃນການກຳນົດ ລະບຽບການດ້ານປັນຍາປະດິດ.

ບັນດາຜູ້ຈັດງານ ໄດ້ຍົກໃຫ້ເຫັນວ່າ ຈິດໃຈ ຂອງ “ການເຄົາລົບ ເຊິ່ງກັນ ແລະ ກັນ ແລະ ການຮ່ວມມື ແບບຕ່າງຝ່າຍຕ່າງມີໄຊ” ໄດ້ຊ່ວຍໃຫ້ບັນດາປະເທດ ສະມາຊິກສາມາດ ຜ່ານຜ່າຄວາມແຕກຕ່າງ ແລະ ບັນລຸກອບການຮ່ວມມືທີ່ຊັດເຈນ. ສະນັ້ນ ອົງການຮ່ວມມື ດ້ານປັນຍາປະດິດໂລກ ພ້ອມແລ້ວ ທີ່ຈະກ້າວເຂົ້າສູ່ ໄລຍະການດຳເນີນງານຢ່າງເປັນທາງການ ໂດຍມີເປົ້າໝາຍ ເພື່ອສະໜອງເວທີການຮ່ວມມື ໃຫ້ແກ່ບັນດາລັດ ໃນການຮັບມືກັບ ສິ່ງທ້າທາຍທີ່ຊັບຊ້ອນ ດ້ານຄວາມປອດໄພ ແລະ ຈັນຍາບັນທີ່ເກີດຈາກ ປັນຍາປະດິດ ໃນຍຸກ ຕໍ່ໄປ./

ຂ່າວ-ພາບ: ວິນນາລີ ນາມຄາລັກ