ຂປລ. ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ IX ໃນພາກບ່າຍ ວັນທີ 24 ມິຖຸນາ 2025 ພາຍໃຕ້ການເປັນປະທານຂອງ ທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ, ທ່ານ ນາງ ສວນສະຫວັນ ວິຍະເກດ ລັດຖະມົນຕີ ກະຊວງວັດທະນະທຳ ແລະ ການ ທ່ອງທ່ຽວ ໄດ້ຂຶ້ນສະເໜີຮ່າງກົດໝາຍວ່າດ້ວຍປ້າຍ (ສະບັບປັບປຸງ) ປະກອບມີ XI ພາກ, 6 ໝວດ, 56 ມາດຕາ. ຫລັງຈາກນັ້ນ, ບັນດາສະມາຊິກສະພາແຫ່ງຊາດ ປະຈຳເຂດເລືອກຕັ້ງຕ່າງໆ (ສສຊ) ກໍໄດ້ປະກອບຄຳຄິດຄຳເຫັນ ຕໍ່ຮ່າງກົດໝາຍດັ່ງກ່າວ, ເພື່ອໃຫ້ມີເນື້ອໃນຄົບຖ້ວນສົມບູນ, ຮັດກຸມ, ລະອຽດຈະແຈ້ງ ແລະ ເຂົ້າໃຈງ່າຍ ແນໃສ່ເປັນເຄື່ອງມືທີ່ສຳຄັນໃນການຄຸ້ມຄອງ, ຕິດຕາມກວດກາວຽກງານປ້າຍ ໃຫ້ເປັນລະບົບລະບຽບຮຽບຮ້ອຍ, ມີຄວາມຖືກຕ້ອງ, ມີລັກສະນະຊາດ ແລະ     ມີຄວາມເປັນ​ເອ ກະພາບ ໃນການຈັດຕັ້ງປະຕິບັດໃນຂອບເຂດທົ່ວປະເທດ.

ໂອກາດນີ້, ທ່ານ ນາງ ສວນສະຫວັນ ວິຍະເກດ ໄດ້ກ່າວວ່າ: ຜ່ານການຈັດຕັ້ງປະຕິບັດວຽກງານປ້າຍ ນັບແຕ່ປະກາດໃຊ້ ກົດໝາຍວ່າດ້ວຍປ້າຍປີ 2018 ເປັນຕົ້ນມາ ເຫັນວ່າຍັງພົບຄວາມຫຍຸ້ງຍາກ ແລະ ມີຫລາຍບັນຫາ ຈຶ່ງເປັນເຫດຜົນ ແລະ ຄວາມຈໍາເປັນໃນການປັບປຸງກົດໝາຍວ່າດ້ວຍປ້າຍ ເພື່ອເຮັດໃຫ້ວຽກງານປ້າຍ ໄດ້ຮັບການຈັດຕັ້ງປະຕິບັດຢ່າງຖືກຕ້ອງ, ມີຄວາມເອກະພາບ, ສາມາດຮັກສາໄດ້ ລັກສະນະຊາດ, ລັດ​ສະ​ນະກ້າວໜ້າ ແລະ ລັກສະນະມະຫາຊົນ, ສາມາດເຊື່ອມໂຍງກັບພາກພື້ນ ແລະ ສາກົນ; ປັບປຸງສາຍພົວພັນການດໍາເນີນທຸລະກິດ ກ່ຽວກັບປ້າຍໃຫ້ສອດຄ່ອງ; ແກ້ໄຂການແບ່ງຂັ້ນຄຸ້ມຄອງ ແລະ ເກັບລາຍຮັບວິຊາການຖອກ ເຂົ້າງົບປະມານ ໃຫ້ບັນລຸຕາມຄາດໝາຍ; ແກ້ໄຂການຜະລິດ ແລະ ການຫ້າມນຳເຂົ້າປ້າຍຈາກຕ່າງປະເທດ ທີ່ຂຽນຕົວໜັງສືບໍ່ຖືກ ຕາມຫລັກໄວຍະກອນລາວ, ສີສັນຂອງປ້າຍບໍ່ສອດຄ່ອງກັບ ເອກະລັກວັດທະນະທຳຂອງລາວ; ກໍານົດຮູບແບບຂອງປ້າຍໃຫ້ຄົບຖ້ວນ ເຮັດໃຫ້ການຄຸ້ມຄອງງ່າຍຂຶ້ນ; ກໍານົດການຂໍອະນຸຍາດນຳໃຊ້ປ້າຍ, ການດຳເນີນທຸລະກິດປ້າຍ, ເວລານໍາໃຊ້ປ້າຍໃຫ້ຄົບຖ້ວນ ແລະ ບັນຫາອື່ນໆ.

ເມື່ອຮ່າງກົດໝາຍວ່າດ້ວຍປ້າຍ ໄດ້ປະກາດໃຊ້ຈະເຮັດໃຫ້ເນື້ອໃນ ກົດໝາຍມີຄວາມອຸດົມສົມ ບູນ, ລະອຽດຈະແຈ້ງຂຶ້ນ, ເຂົ້າໃຈງ່າຍໃນທາງປະຕິບັດ ແລະ ຕອບສະໜອງທັນກັບ ສະພາບການຂະຫຍາຍຕົວ ຂອງ ເສດຖະກິດ-ສັງຄົມໃນປັດຈຸບັນ ແລະ ອະນາຄົດ; ເຮັດໃຫ້ການຄຸ້ມຄອງ, ຕິດຕາມກວດກາ ແລະ ການແບ່ງຄວາມຮັບຜິດຊອບ ກ່ຽວກັບວຽກງານປ້າຍ ລະຫວ່າງສູນກາງ ແລະ ທ້ອງຖິ່ນ ແລະ ຂະແໜງການທີ່ກ່ຽວຂ້ອງ ເປັນລະບົບ ແລະ ເປັນເອກະພາບໃນຂອບເຂດທົ່ວປະເທດ; ເປັນເຄື່ອງມື ແລະ ເປັນບ່ອນອີງ ໃນການເຄື່ອນໄຫວວຽກງານການປ້າຍ ໃນທົ່ວປະເທດໃຫ້ມີປະສິດທິພາບ, ປະສິດທິຜົນສູງນໍາໃຊ້ເຂົ້າໃນການຈັດຕັ້ງ ແລະ ການເຄື່ອນໄຫວ, ການຄຸ້ມຄອງ, ຕິດຕາມກວດກາວຽກງານປ້າຍ ເພື່ອປົກປ້ອງ, ສົ່ງເສີມ ແລະ ພັດທະນາວຽກງານປ້າຍໃຫ້ດີຂຶ້ນກວ່າເກົ່າ; ເຮັດໃຫ້ປະຊາຊົນລາວບັນດາເຜົ່າ ແລະ ສາກົນ ເຫັນໄດ້ເຖິງນະໂຍບາຍຢ່າງຈະແຈ້ງ ຂອງພັກ ແລະ ລັດຖະບານ ໃນການຄຸ້ມຄອງ ແລະ ສົ່ງເສີມວຽກງານປ້າຍ, ຍົກສູງສະຕິຊາດ, ຄວາມເປັນເອກະລາດ ແລະ ເປັນເຈົ້າຕົນເອງຂອງປະຊາຊົນ ບັນດາເຜົ່າໃຫ້ສູງຂຶ້ນ; ສ້າງລາຍຮັບເຂົ້າງົບປະມານລັດເພີ່ມຂຶ້ນ ແລະ ການນໍາໃຊ້ເຂົ້າໃນວຽກງານຄຸ້ມຄອງປ້າຍ ຢ່າງມີປະສິດທິຜົນ, ໂປ່ງໃສ ແລະ ກວດສອບໄດ້; ແກ້ໄຂບັນຫາບໍລິສັດຜະລິດປ້າຍ ທີ່ບໍ່ທັນດຳເນີນກິດຈະການຢ່າງຖືກຕ້ອງ ໃຫ້ຫັນເຂົ້າສູ່ລະບຽບການ; ແກ້ໄຂບັນຫາໃນການຕິດຕັ້ງປ້າຍ ໃນຂອບເຂດທົ່ວປະເທດ ໃຫ້ມີຄວາມເປັນລະບຽບຮຽບຮ້ອຍ ແລະ ສອດຄ່ອງຕາມລະບຽບການທີ່ກໍານົດໄວ້.

ຂ່າວ: ກິດຕາ

ພາບ: ອ່າຍຄຳ

KPL