ຂປລ
ພິທີເປີດໂຄງການ ແລະ ປະຊາສໍາພັນໃຫຍ່ ຂອງໂຄງການສ້າງຄວາມເຂັ້ມແຂງວຽກງານຂຶ້ນທະບຽນອອກໃບຕາດິນຢ່າງເປັນລະບົບຢູ່ເມືອງຜາອຸດົມ ແຂວງບ່ໍແກ້ວ.
*ພິທີເປີດໂຄງການ ແລະ ປະຊາສໍາພັນໃຫຍ່ ຂອງໂຄງການສ້າງຄວາມເຂັ້ມແຂງວຽກງານຂຶ້ນທະບຽນອອກໃບຕາດິນຢ່າງເປັນລະບົບຢູ່ເມືອງຜາອຸດົມ ແຂວງບ່ໍແກ້ວ ຈັດຂຶ້ນໃນວັນທີ 12 ພຶດສະພາ 2025 ໂດຍການເປັນປະທານຂອງ ທ່ານ ກາງ ມະນີຫວ່າງ ເລຂາຄະນະບໍລິຫານງານພັກເມືອງຜາອຸດົມ, ທ່ານ ແກ່ນຈັນ ທໍາມະແສງ ຮັກສາການຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ, ທ່ານ ຄໍາພັນ ປະວົງວຽງຄໍາຫົວໜ້າພະແນກຄຸ້ມຄອງທະບຽນ ແລະ ປະເມີນລາຄາທີ່ດິນກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ ພ້ອມດ້ວຍຂະແໜງການກ່ຽວຂ້ອງຂັ້ນກະຊວງ-ແຂວງ- ເມືອງ ແລະ ນາຍບ້ານພາຍໃນເທສະບານເມືອງເຂົ້າຮ່ວມ.
ທ່ານ ວຽງໄຊ ຈັນທະວົງ ຮອງຫົວໜ້າຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງໄດ້ກ່າວວ່າ: ການເປີດໂຄງການການຂຶ້ນທະບຽນອອກໃບຕາດິນຢ່າງເປັນລະບົບທ່ົວເມືອງຜາອຸດົມຄັ້ງນີ້ ເພື່ອເຮັດໃຫ້ພໍ່ແມ່ປະຊາຊົນພາຍໃນບ້ານເປົ້າໝາຍ ກໍຄືເຈົ້າຂອງສິດນໍາໃຊ້ທີ່ດິນ ແລະ ພາກສ່ວນກ່ຽວຂ້ອງຂອງລັດ ໄດ້ຮັບຮູ້ ແລະ ເຂົ້າໃຈຕໍ່ແນວທາງນະໂຍບາຍຂອງພັກ-ລັດ, ເຂົ້າໃຈແຈ້ງຕໍ່ລະບຽບກົດໝາຍ, ຄໍາສັ່ງ, ຄໍາແນະນໍາຂອງຂັ້ນເທິງ ເພື່ອໃຫ້ພໍ່ແມ່ປະຊາຊົນມີຄວາມພ້ອມ ໃນການກະກຽມເອກະສານຕ່າງໆທີ່ກ່ຽວຂ້ອງ, ວິທີການຝັງຫລັກເຂດແດນດິນ, ການອະນາໄມຖາງແລວທາງຂອບເຂດແດນຂອງຕົນ, ເຂົ້າໃຈແຈ້ງກ່ຽວກັບຂະບວນການ, ຂັ້ນຕອນ ແລະ ວິທີການຈັດຕັ້ງປະຕິບັດວຽກງານຂຶ້ນທະບຽນອອກໃບຕາດິນເປັນໄປຕາມຄໍາແນະນໍາ ກໍຄືລະບຽບຫລັກການທີ່ກໍານົດໄວ້ໃຫ້ສໍາເລັດຕາມແຜນທີ່ວາງໄວ້ເຊິ່ງໂຄງການດັ່ງກ່າວໄດ້ເລີ່ມຈັດຕັ້ງປະຕິບັດແຕ່ເດືອນພຶດສະພາຈົນເຖິງເດືອນພະຈິກ 2025 ໃຫ້ສໍາເລັດ.
ໂດຍ:ໂສພາ ທິບພະວົງ
KPL
