*ແມ່ມືໃໝ່ຫລາຍຄົນມັກມີບັນຫາເລື່ອງນ້ຳນົມບໍ່ມາ ຫລື ມາໜ້ອຍ ບ່ໍພຽງພໍສຳລັບການລ້ຽງລູກ. ສະນັ້ນ, ຄໍລຳເພື່ອສຸຂະພາບມື້ນີ້ ຈຶ່ງມີວີທີແນະນຳສຳລັບແມ່ລູກອ່ອນໃນການກະຕຸ້ນໃຫ້ນ້ຳນົມມາ ແລະ ມີຫລາຍພຽງພໍສຳລັບລູກ. ວິທີທຳອິດໃຫ້ນົມລູກຕະຫລອດ ແລະ ດົນ: ຜູ້ເປັນແມ່ຄວນໃຫ້ນົມລູກຕະຫລອດ ແລະ ດົນ ເພາະຖ້າແມ່ໃຫ້ນົມລູກຕະຫລອດຮ່າງກາຍກໍຈະຜະລິດນໍ້ານົມຫລາຍຂຶ້ນ. ບ່ກິນທາດເຫລົ້າ ແລະ ສູບຢາ: ການກິນທາດເຫລົ້າ ແລະ ສູບຢາ ບໍ່ພຽງແຕ່ສົ່ງຜົນກະທົບຕໍ່ປະລິມານນໍ້ານົມເທົ່ານັ້ນ ຍັງມີຜົນກະທົບຕໍ່ຮ່າງກາຍຂອງແມ່ ແລະ ລູກອີກດ້ວຍ. ຫລີກລ່ຽງຢາຄຸມກຳເນີດ: ຫາກກິນຢາຄຸມຫລັງເກີດລູກກໍຈະສົ່ງຜົນກະທົບຕໍ່ການຜະລິດນໍ້ານົມໄດ້.

     ຜ່ອນຄາຍ ແລະ ເຮັດໃຈສະບາຍ: ຄວາມຕຶງຄຽດຈະສົ່ງຜົນຕໍ່ການຜະລິດນໍ້ານົມ, ການຜ່ອນຄາຍເຮັດຈິດໃຈສະບາຍ ແລະ ພັກຜ່ອນໃຫ້ພຽງພໍຈະຊ່ວຍໃຫ້ຮ່າງກາຍຜະລິດນໍ້ານົມ ໄດ້ຫລາຍ. ສະຫລັບເບື້ອງໃຫ້ນົມລູກ: ໄລຍະທຳອິດທີ່ແມ່ໃຫ້ນົມລູກມັກຈະໃຫ້ຕາມຄວາມລຶ້ງເຄີຍຂອງການອູ້ມລູກ, ເຕົ້ານົມທີ່ໃຫ້ລູກນ້ອຍດູດຕະຫລອດນັ້ນ ຈະມີການຜະລິດນໍ້ານົມຕະຫລອດ, ແຕ່ຖ້າເຕົ້ານົມຂ້າງທີ່ບໍ່ໄດ້ດູດກໍຈະຜະລິດນໍ້ານົມໜ້ອຍ, ແມ່ຈຶ່ງຄວນໃຫ້ລູກດູດທັງສອງເບື້ອງ. ນວດເຕົ້ານົມ: ການນວດເຕົ້ານົມຈະເປັນການຊ່ວຍກະຕຸ້ນການສ້າງນໍ້ານົມ, ໂດຍນວດຄ່ອຍໆເພື່ອກະຕຸ້ນໃຫ້ເກີດການໄຫລວຽນຂອງລະບົບນໍ້ານົມ, ລະບົບນໍ້າເຫລືອງທີ່ເໝາະສົມ. ກິນອາຫານທີ່ມີປະໂຫຍດ: ຄວນກິນອາຫານໃຫ້ຄົບ 5 ໝູ່ໃນປະລິມານທີ່ເໝາະສົມ ແລະ ພຽງພໍ, ບໍ່ຄວນຄິດເລື່ອງນໍ້າໜັກ ຫລື ອົດອາຫານເຊິ່ງອາດ ສົ່ງຜົນກະທົບຕໍ່ການຜະລິດນໍ້ານົມ ແລະ ສຸຂະພາບຂອງຕົວເອງ. ກິນນໍ້າຫລາຍໆ: ການໃຫ້ນົມລູກອາດເຮັດໃຫ້ແມ່ຂາດນໍ້າ ແລະ ຖ້າຫາກກິນນໍ້າບໍ່ພຽງພໍ ກໍອາດສົ່ງຜົນເສຍຕ່ໍຮ່າງກາຍ ແລະ ຂະບວນການຜະລິດນໍ້ານົມໄດ້. ຄວນໃຊ້ສະໝຸນໄພເພີ່ມນໍ້ານົມ: ແມ່ສາມາດໃຊ້ສະໝຸນໄພທ່ີຊ່ວຍເພີ່ມນໍ້ານົມໄດ້ເຊ່ັນ: ໃບກະເພົາ, ພິກໄທ, ຂີງປະກອບອາຫານ ເຊິ່ງຈະຊ່ວຍໃຫ້ປະລິມານນໍ້ານົມຫລາຍຂຶ້ນ. 

ໂດຍ:ລູກສາວຫລາວຫລ້າ້າ

KPL