ຂປລ
ຂປລ. ວັນທີ 2 ເມສາ 2025 ນີ້, ກອງທັບປະຊາຊົນລາວ ນໍາພາໂດຍ ທ່ານ ພັນເອກ ປາດຖະໜາ ບຸດຕິຈັກ ຮອງຫົວໜ້າຫ້ອງການກົມໃຫຍ່ເສນາທິການກອງທັບ, ຄະນະກຳມະການຄຸ້ມຄອງໄພພິບັດ ກະຊວງປ້ອງກັນປະເທດ, ຫົວໜ້າກອງເສນາ, ຜູ້ປະສານງານຄະນະກຳມະການ ຄຸ້ມຄອງໄພພິບັດ ຂັ້ນສູນກາງ ພ້ອມຄະນະ ໄດ້ນໍາພາກໍາລັງສືບຕໍ່ຊ່ວຍເຫລືອ ແລະ ປິ່ນປົວປະຊາຊົນ ມຽນມາ ຜູ້ທີ່ໄດ້ຮັບບາດເຈັບ ຈາກເຫດການແຜນດິນໄຫວ ທີ່ນອນປີ່ນປົວຢູ່ໂຮງໝໍພາກສະໜາມ.
ຂປລ. ວັນທີ 2 ເມສາ 2025 ນີ້, ກອງທັບປະຊາຊົນລາວ ນໍາພາໂດຍ ທ່ານ ພັນເອກ ປາດຖະໜາ ບຸດຕິຈັກ ຮອງຫົວໜ້າຫ້ອງການກົມໃຫຍ່ເສນາທິການກອງທັບ, ຄະນະກຳມະການຄຸ້ມຄອງໄພພິບັດ ກະຊວງປ້ອງກັນປະເທດ, ຫົວໜ້າກອງເສນາ, ຜູ້ປະສານງານຄະນະກຳມະການ ຄຸ້ມຄອງໄພພິບັດ ຂັ້ນສູນກາງ ພ້ອມຄະນະ ໄດ້ນໍາພາກໍາລັງສືບຕໍ່ຊ່ວຍເຫລືອ ແລະ ປິ່ນປົວປະຊາຊົນ ມຽນມາ ຜູ້ທີ່ໄດ້ຮັບບາດເຈັບ ຈາກເຫດການແຜນດິນໄຫວ ທີ່ນອນປີ່ນປົວຢູ່ໂຮງໝໍພາກສະໜາມ.
ພາຍຫລັງລົງກວດກາ ແລະ ເກັບກຳຂໍ້ມູນຕົວຈິງ ກັບອົງການປົກຄອງເມືອງເຈົາແຊ, ຄະນະຊີ້ ນໍາພາກສະໜາມ ກອງທັບປະຊາຊົນລາວ ກໍໄດ້ວາງແຜນຮ່ວມກັບອົງການປົກຄອງເມືອງ ແລະ ຈັດແບ່ງກຳລັງອອກເປັນ 2 ໜ່ວຍງານ ຄື: ໜ່ວຍງານກອບກູ້, ຊອກຄົ້ນ ແລະ ໜ່ວຍແພດສຸກເສີນ. ໃນນີ້, ໜ່ວຍງານກອບກູ້, ຊອກຄົ້ນ ແມ່ນນໍາໃຊ້ກໍາລັງຊ່າງແສງ ຈໍານວນ 13 ສະຫາຍ ນໍາໃຊ້ວັດຖຸ-ອຸປະກອນ ທີ່ນໍາມາຮ່ວມກັບໜ່ວຍກູ້ໄພຂອງ ສສ ມຽນມາ ເຂົ້າກອບກູ້, ແກ້ໄຂສາກສະລັກຫັກພັງ ຢູ່ຫລັງຄາຫ້ອງການປົກຄອງເມືອງ ເພື່ອກອບກູ້ເອົາວັດຖຸ-ອຸປະກອນ ທີ່ຍັງຕົກຄ້າງຢູ່ ພາຍໃນອາຄານ. ສ່ວນໜ່ວຍແພດສຸກເສີນ ແມ່ນນໍາໃຊ້ກໍາລັງເສນາຮັກ ຈໍານວນ 11 ສະຫາຍ ນໍາໃຊ້ອຸປະກອນການແພດ, ຢາປົວພະຍາດທີ່ນຳມາ ຮ່ວມກັບແພດໝໍຂອງເມືອງ ປິ່ນປົວຜູ້ບາດເຈັບທີ່ນອນປິ່ນປົວຢູ່ໂຮງໝໍພາກສະໜາມ. ຜ່ານການຈັດຕັ້ງປະຕິບັດໜ້າທີ່ ວຽກງານຮ່ວມກັນ ໃນການກອບກູ້ ແລະ ປິ່ນປົວຜູ້ບາດເຈັບ ຂອງກໍາລັງກອງທັບປະຊາຊົນລາວ ກັບພາກສ່ວນທີ່ກ່ຽວຂ້ອງຂອງ ເມືອງເຈົາແຊ ໃນໄລຍະ 1 ວັນ ເຫັນວ່າໄດ້ຮັບໝາກຜົນດີ ແລະ ມີຄວາມປອດໄພ 100%.
ພ້ອມນັ້ນ, ທ່ານ ພັນເອກ ປາດຖະໜາ ບຸດຕິຈັກ ພ້ອມຄະນະ ຍັງໄດ້ນໍາເອົາເຄື່ອງອຸປະໂພກ-ບໍລິໂພກຈໍານວນໜຶ່ງ ໄປມອບໃຫ້ປະຊາຊົນ ທີ່ນອນປິ່ນປົວຢູ່ໂຮງໝໍ ຕື່ມອີກ ເພື່ອຊ່ວຍເຫລືອບັນເທົາທຸກ ໃຫ້ຜູ້ທີ່ໄດ້ຮັບຜົນກະທົບຈາກເຫດການ ດັ່ງກ່າວ ໃຫ້ໄດ້ຫລາຍທີ່ສຸດເທົ່າທີ່ຈະເຮັດໄດ້.
ຂ່າວ: ເພັດ ສົມນໍວັນ
KPL
