ຂປລ. ໃນລະຫວ່າງວັນທີ 10 ກຸມພາ ຫາ 7 ມີນາ 2025 ທີມງານຄົ້ນຄວ້າເກັບກຳຂໍ້ມູນ ກະຊວງສຶກສາທິການ ແລະ ກິລາ (ສສກ) ແລະ ວິທະຍາໄລຄູຈາກ ຫລວງນ້ຳທາ, ຄັງໄຂ ແລະ ສະຫວັນນະເຂດ ຈະເດີນທາງ ໄປໂຮງຮຽນປະຖົມໃນ 30 ເມືອງເປົ້າໝາຍ ເພື່ອກໍານົດການປະຕິບັດ ການສອນທີ່ມີຄຸນນະພາບ ນໍາໄປສູ່ການເພີ່ມຂຶ້ນ ຂອງການມີສ່ວນຮ່ວມຂອງນັກຮຽນ ແລະ ການປັບປຸງຜົນການຮຽນ ​ໂດຍຈະຄົ້ນຫາຄວາມຜູກພັນຂອງນັກຮຽນ ການມີສ່ວນຮ່ວມ ແລະ ປັດ​ໄຈທີ່ສົ່ງຜົນຕໍ່ຜົນການຮຽນຂອງນັກຮຽນ ​ໂດຍໄດ້ຮັບສະໜັບສະໜູນຈາກ ລັດຖະບານອົດສະຕຣາລີ ຜ່ານແຜນງານການ ປັບປຸງຄຸນນະພາບ ແລະ ຂະຫຍາຍໂອກາດເຂົ້າຮຽນ ສຳລັບການສຶກສາຂັ້ນພື້ນຖານໃນ ສປປ ລາວ ຫລື ແຜນງານບີຄວາ.

ທ່ານ ນາງ ວົງເດືອນ ໂອໃສ ວ່າການແທນຫົວໜ້າກົມສ້າງຄູ ໄດ້ແນະນຳການອອກແບບ ການສຶກສາແບບມີສ່ວນຮ່ວມ, ການຄັດເລືອກໂຮງຮຽນ, ວິທີສະໜັບສະໜູນທີມງານ ເກັບກຳຂໍ້ມູນ ໃນເວລາລົງພາກ ສະໜາມ ແລະ ວິທີການອຳນວຍຄວາມສະດວກ ໃນການສະທ້ອນຄືນ ແລະ ປຶກສາຫາລືກ່ຽວກັບ ຄວາມເຂົ້າໃຈເບື້ອງຕົ້ນຈາກຂໍ້ມູນ, ການສຶກສາຄົ້ນຄວ້າໄດ້ກວມເອົາ 30 ເມືອງເປົ້າໝາຍໃນ 7 ແຂວງ ຄື: ແຂວງຜົ້ງສາລີ, ຫລວງນ້ຳທາ, ບໍ່ແກ້ວ, ຫົວພັນ, ຊຽງຂວາງ, ຄຳມ່ວນ ແລະ ​ແຂວງສະຫວັນນະເຂດ ໃນແຕ່ລະເມືອງຈະມີໂຮງຮຽນ 4 ແຫ່ງ ທີ່ຖືກຄັດເລືອກໂດຍອີງໃສ່ປັດ​ໄຈດ້ານຄວາມຫລາກຫລາຍ. ໃນນັ້ນ, ລວມມີນັກຮຽນທີ່ບໍ່ເວົ້າພາສາລາວ ເປັນພາສາຫລັກຢູ່ເຮືອນ, ນັກຮຽນພິການ ແລະ ນັກຮຽນທີ່ເຂົ້າຮຽນບໍ່ສະໝໍ່າສະເໝີ, ເງື່ອນໄຂເພີ່ມຕື່ມທີ່ນຳມາຄົ້ນຄວ້າ ແມ່ນເພດຂອງຜູ້ອໍານວຍການ ແລະ ຄູ, ພ້ອມທັງປັດ​ໄຈດ້ານທີ່ຕັ້ງພູມສັນຖານ, ການຈັດການສອນຫ້ອງຄວບ ​ແລະ ​ອື່ນໆ.

ການສຶກສາຄົ້ນຄວ້າ ຈະລວມມີການເກັບກໍາຂໍ້ມູນດ້ານຄຸນນະພາບ ແລະ ດ້ານປະລິມານໃນໄລຍະ 3 ປີ ໃນເດືອນກຸມພາ ແລະ ເດືອນມີນາ ຂອງແຕ່ລະປີ, ການຄົ້ນຄວ້າກໍລະນີສຶກສາ ດ້ານຄຸນນະພາບຈະດໍາ ເນີນຜ່ານການສໍາພາດນັກຮຽນ, ຜູ້ປົກຄອງ ແລະ ຄູ ໃນ 21 ໂຮງຮຽນເປົ້າໝາຍ ໃນເດືອນເມສາຂອງແຕ່ລະປີ, ການທົດສອບລະດັບພາສາລາວ ຈະດຳເນີນຢູ່ໃນ 120 ໂຮງຮຽນ ແຕ່ຂັ້ນ ປ1-ປ3 ແຕ່ລະພາກຮຽນ, ຂໍ້ມູນການຕິດຕາມຈະເກັບກຳຈາກຄູ ແລະ ຜູ້ທີ່ໃຫ້ການຊ່ວຍເຫລືອເຂົາເຈົ້າ ຜ່ານຊ່ອງທາງ ການສັງເກດການສອນໃນຫ້ອງຮຽນ.

ທ່ານ ນາງ ວາເນັດຊ້າ ເຮັກກາທີ້ ເລຂາເອກ ສະຖານທູດອົດສະຕຣາລີ ປະຈຳລາວ ໄດ້ກ່າວວ່າ: ລັດຖະບານອົດສະຕຣາລີ ມຸ່ງໝັ້ນທີ່ຈະສົ່ງເສີມ ການຮຽນແບບມີສ່ວນຮ່ວມ ພວກເຮົາເຊື່ອວ່າ ນັກຮຽນທຸກຄົນ ຄວນເຂົ້າເຖິງການສຶກສາທີ່ມີຄຸນນະພາບ ຕອບສະໜອງຄວາມຕ້ອງການ ທີ່ຫລາກຫລາຍຂອງເຂົາເຈົ້າ ໄດ້ຢ່າງມີປະສິດທິພາບ ໃນສະພາບແວດລ້ອມທີ່ເອື້ອອຳນວຍ, ຍອມຮັບ, ເຄົາລົບ ແລະ ສະໜັບສະໜູນ ເຂົາເຈົ້າໃນສະພາບປະລະການຮຽນ ຂອງນັກຮຽນໃນປັດຈຸບັນ ເຊິ່ງເປັນສິ່ງສຳຄັນທີ່ຈະກຳນົດ ທິດທາງການປະຕິບັດ ການສອນທີ່ຕອບສະໜອງ ຄວາມຕ້ອງການ ຂອງນັກຮຽນໄດ້ດີທີ່ສຸດ ແລະ ເສີມຂະຫຍາຍ ຄວາມຮູ້ສຶກຜູກພັນ ຂອງເຂົາເຈົ້າຢູ່ໂຮງຮຽນ.

KPL