*ກຸ່ມຜູ້ຜະລິດກະສິກໍາຂະໜາດນ້ອຍ (SFS) ກໍ່ຄືປະຊາຊົນກຸ່ມຊາວນາຜູ້ຜະລິດເຂົ້າເປັນສິນຄ້າ ຂອງເມືອງວາປີ 5 ກຸ່ມບ້ານ ໄດ້ຮັັບທຶນສະໜັບສະໜູນຈາກໂຄງການສົ່ງເສີມລະບົບຕ່ອງໂສ້ການຜະລິດກະສິກຳເປັນສິນຄ້າ ທີ່ເປັນມິດຕໍ່ສິ່ງແວດລ້ອມ ລວມມູນຄ່າກວ່າ 2,5 ຕື້ກີບ ຫລື ເທົ່າກັບກວ່າ 1,1 ແສນໂດລາສະຫາລັດ ເຊິ່ງໃນ 5 ກຸ່ມບ້ານປະກອບມີກຸ່ມບ້ານສະເໝັຍ ໄດ້ຮັບທຶນ 543 ລ້ານກວ່າກີບ, ກຸ່ມສຸທິ 391 ລ້ານກວ່າກີບ, ກຸ່ມຕານສຸມ 543 ລ້ານກວ່າກີບ, ກຸ່ມຫ້ວຍໂຄນ 543 ລ້ານກວ່າກີບ ແລະ ກຸ່ມບ້ານມ່ວງ 500 ລ້ານກວ່າກີບ. ພິທີມອບໄດ້ຈັດຂຶ້ນເມື່ອບໍ່ດົນມານີ້ ທີ່ສະໂມສອນເມືອງວາປີ ແຂວງສາລະວັນ ໂດຍການເຂົ້າຮ່ວມຂອງ ທ່ານ ທິນນະກອນ ແສງອຸໄທ ຮອງເຈົ້າເມືອງວາປີ ຜູ້ຊີ້ນຳຂົງເຂດວຽກງານເສດຖະກິດຂັ້ນເມືອງ, ທ່ານ ສິນໄຊ ເພັດແພງ ລາສີ ຮອງຫົວໜ້າພະແນກກະສີກຳ ແລະ ປ່າໄມ້ແຂວງ, ທ່ານ ຄຳປ້ອງ ວົງພະຈັນ ຫົວໜ້າໂຄງການສົ່ງເສີມລະບົບຕ່ອງໂສ້ການຜະລິດກະສິກໍາເປັນສິນຄ້າທີ່ເປັນມິດຕ່ໍ ສິ່ງແວດລ້ອມ, ມີຜູ້ປະສານງານໂຄງການຂັ້ນກະຊວງ, ຂະແໜງການທີ່ກ່ຽວຂັ້ນແຂວງ ແລະ ເມືອງ, ພ້ອມດ້ວຍສະມາຊິກກຸ່ມຊາວນາຜູ້ຜະລິດເຂົ້າເປັນສິນຄ້າເຂົ້າຮ່ວມ ເປັນສັກຂີພິຍານ.

    ໂຄງການດັ່ງກ່າວ ແມ່ນໄດ້ຮັບທຶນຊ່ວຍເຫລືອລ້າຈາກທະນາຄານພັດທະນາອາຊີ, ເພື່ອມາຊ່ວຍສະໜັບສະໜູນການຈັດຕັ້ງປະຕິບັດແຜນຍຸດທະສາດການພັດທະນາ ກະສິກໍາ ແລະ ປ່າໄມ້ ຂອງລັດຖະບານລາວ ໃນມູນຄ່າ 40 ລ້ານກວ່າໂດລາສະລັດ, ແຕ່ນີ້ຮອດປີ 2025 ແລະ ວິໃສທັດຮອດປີ 2030, ເຊິ່ງ ເປັນໂຄງການທີ່ໄດ້ປະກອບສ່ວນຢ່າງຕັ້ງໜ້າ ເຂົ້າໃນການຄໍ້າປະກັນຄວາມໝັ້ນຄົງທາງດ້ານສະບຽງອາຫານ, ການຜະລິດກະສິກຳເປັນສິນຄ້າ, ການພັດທະນາຊົນນະບົດ ແລະ ລົບລ້າງຄວາມທຸກຍາກຢູ່ໃນ ສປປ ລາວ ຕາມທິດສີຂຽວ, ສະອາດ, ປອດໄພ, ເປັນມິດກັບສິ່ງແວດລ້ອມ, ພັດທະນາລະບົບຕ່ອງໂສ້ການຜະລິດ ທຸລະກິດກະສິກໍາຂະໜາດນ້ອຍການສ້າງມູນຄ່າເພີ່ມ, ການປັບປຸງເຕັກເນັກການຜະລິດ, ປັບປຸງແນວພັນເຂົ້າ, ແນວພັນພືດ, ປັບປຸງບັນດາກໍາລັງການຜະລິດ,  ເພື່ອຕອບສະໜອງໄດ້ຕາມຄວາມຮຽກຮ້ອງຕ້ອງການຂອງຕະຫລາດ, ດ້ວຍມາດຕະຖານກະສິກໍາອິນຊີ, ກະສິກໍາທີ່ດີ, ການຄຸ້ມຄອງການຜະລິດທີ່ດີ ແລະ ສາມາດບັນລຸໄດ້ຈຸດວິເຄາະຄ່າຄວາມອັນຕະລາຍຂອງສານເຄມີໃນອາຫານທີ່ປອດໄພ ແລະ ອື່ນໆ.

     ສໍາລັບແຂວງສາລະວັນ ມີ 11 ກຸ່ມເປົ້າໝາຍປະກອບມີ 3 ຕົວເມືອງຄື: ເມືອງສາລະວັນ, ວາປີ  ແລະ ເມືອງເລົ່າງາມ ເຊິ່ງທຶນດັ່ງກ່າວ ແມ່ນນໍາໃຊ້ເຂົ້າໃນ 4 ກິດຈະກໍາຫລັກຄື: ສົ່ງເສີມການຜະລິດແນວພັນເຂົ້າ, ແນວພັນພືດ, ຝຸ່ນຊີວະພາບ, ຊື້ອຸປະກອນການຜະລິດ, ປັບເນື້ອທີ່ດິນນາປະກອບແຝງໂຊລາແຊວ ພະລັງງານແສງຕາເວັນ, ຈົກໜອງເກັບນໍ້າຮັບໃຊ້ການຜະລິດລະດູແລ້ງ, ເຈາະນໍ້າບາດານ, ສ້ອມແປງຄອງນໍ້າເຂົ້າໃສ່ນາ, ເຮັດລານຕາກເຂົ້າ ແລະ ອື່ນໆ. ທັງໝົດເຫລົ່ານີ້ເພື່ອສົ່ງເສີມໃຫ້ກຸ່ມຊາວນາຜູ້ຜະລິດເຂົ້າ-ແນວພັນເຂົ້າເປັນສິນຄ້າໃນ 5 ກຸ່ມບ້ານເປົ້າໝາຍ ພາຍໃນເມືອງວາປີ ຫລຸດຜ່ອນຄວາມສ່ຽງ ແລະ ສາມາດປັບຕົວເຂົ້າກັບການປ່ຽນແປງສະພາບດິນຟ້າອາກາດ, ຫລຸດຜ່ອນການປ່ອຍທາດອາຍທີ່ເປັນມົນລະພິດຕ່າງໆ, ການນໍາໃຊ້ກົນຈັກທີ່ທັນສະໄໝເຂົ້າໃນ ການຜະລິດເພື່ອຍົກສູງສະມັດຕະພາບການຜະລິດຂອງກຸ່ມຊາວນາໃຫ້ສູງຂຶ້ນຈາກເມື່ອກ່ອນ.

ແຫລ່ງຂໍ້ມູນ ຖວທ ສາລະວັນ

KPL