ຂປລ
ເມື່ອບ່ໍດົນມານີ້, ສູນພັດທະນາສີມືແຮງງານ ພະແນກແຮງງານ ແລະ ສະຫວັດດີການສັງຄົມ ແຂວງບໍ່ແກ້ວ ຈັດພິທີມອບໃບຢັ້ງຢືນໃຫ້ຜູ້ທີ່ໄດ້ຜ່ານການຝຶກອົບຮົມສີມແຮງງານສາຂາອາຊີບ ດ້ານການບໍລິການອາຫານ ແລະ ເຄື່ອງດື່ມ ຈຳນວນ 59 ຄົນ ຍິງ 36 ຄົນ.
*ເມື່ອບ່ໍດົນມານີ້, ສູນພັດທະນາສີມືແຮງງານ ພະແນກແຮງງານ ແລະ ສະຫວັດດີການສັງຄົມ ແຂວງບໍ່ແກ້ວ ຈັດພິທີມອບໃບຢັ້ງຢືນໃຫ້ຜູ້ທີ່ໄດ້ຜ່ານການຝຶກອົບຮົມສີມແຮງງານສາຂາອາຊີບ ດ້ານການບໍລິການອາຫານ ແລະ ເຄື່ອງດື່ມ ຈຳນວນ 59 ຄົນ ຍິງ 36 ຄົນ, ຕາງໜ້າມອບໃບຢັ້ງຢືນຄັ້ງນີ້ໂດຍທ່ານ ຄຳທອນ ພັນທະນິດ ຮອງຫົວໜ້າພະແນກແຮງງານ ແລະ ສະຫວັດດີການ-ສັງຄົມແຂວງ.
ທ່ານ ທອງວັນ ແກ້ວປະເສີດ ຫົວໜ້າສູນພັດທະນາສີມືແຮງງານ, ພະແນກແຮງງານ ແລະ ສະຫວັດດີການສັງຄົມແຂວງ ໄດ້ລາຍງານຜົນສຳເລັດໃນການຈັດຕັ້ງປະຕິບັດໂຄງການຝຶກອົບຮົມ ແລະ ທົດສອບ ສີມືແຮງງານສາຂາອາຊີບດ້ານການບໍລິການ ແລະ ເຄື່ອງດື່ມ ໂດຍມີສຳມະນາກອນເຂົ້າຮ່ວມຝຶກທັງໝົດ 59 ຄົນ ຍິງ 36 ຄົນ, ໃນນັ້ນ ຮ້ານອາຫານ 47 ຄົນ ຍິງ 29 ຄົນ, ໂຮງງານເຈຍລະໄນ 10 ຄົນ ຍິງ 7 ຄົນ, ຊ່າງເຊື່ອມຈອດໂລຫະ 2 ຄົນ, ເຊິ່ງການຝຶກອົບຮົມຄັ້ງນີ້ ດໍາເນີນແຕ່ວັນທີ 23-27 ທັນວາ 2024.
ສຳລັບຫລັກສູດການຮຽນ-ການສອນ ແມ່ນໄດ້ກຳນົດເອົາຮ້ານອາຫານ ແລະ ສູນພັດທະນາສີມືແຮງງານ ເປັນບ່ອນຝຶກອົບຮົມຕົວຈິງເຮັດໃຫ້ນັກສໍາມະນາກອນໄດ້ຮຽນຮູ້ກ່ຽວກັບພາກທິດສະດີ ແລະ ປະຕິບັດຕົວຈິງໄປພ້ອມກັນ, ທັງນີ້ກໍເພື່ອຍົກລະດັບມາດຖານດ້ານສີມືແຮງງານ ແລະ ສ້າງຄວາມຮູ້ຄວາມສາມາດທັກສະສີມືແຮງງານ ໃຫ້ພະນັກງານເສີບຢູ່ຫົວໜ່ວຍຜູ້ປະກອບການພາຍໃນຮ້ານອາຫານ. ຜ່ານການຝຶກ ແລະ ທົດສອບສີມືແຮງງານສາມາດປະເມີນຄວາມຮູ້, ຄວາມສາມາດຂອງຜູ້ເຂົ້າຝຶກ, ຈັດຢູ່ລະດັບດີຫລາຍມີ 42 ຄົນ, ລະດັບ ດີມີ 5 ຄົນ.
ຂ່າວ: ບຸນຈັນ ມະນີໄຊ
KPL
