*ໃນໄລຍະຜ່ານແຂວງຫລວງນໍ້າທາ ໄດ້ສຸມໃສ່ພັດທະນາພື້ນຖານໂຄງລ່າງເສດຖະກິດໃຫ້ເຂ້ັມແຂງ, ເອົາໃຈໃສ່ຊຸກຍູ້ສົ່ງເສີມປະຊາຊົນພາຍໃນແຂວງ ປູກຝັງ- ລ້ຽງສັດ ຢ່າງເປັນຂະບວນ. ອັນພົ້ນເດັ່ນໃນ 2024 ແມ່ນການຂະຫຍາຍຕົວຂອງຂະແໜງກະສິກຳ ແລະ ປ່າໄມ້ ຢູ່ໃນລະດັບ 4,9% ກວມເອົາ 49,03% ຂອງຈີດີພີ, ຊຶ່ທາງແຂວງໄດ້ເອົາໃຈໃສ່ລົງຊຸກຍູ້, ສົ່ງເສີມກະສິກອນພາຍໃນແຂວງປູກເຂົ້ານາແຊງ, ນາປີ ແລະ ເຂົ້າເນີນສູງເພື່ອຄໍ້າປະກັນສະບຽງອາຫານ ແລະ ເປັນສິນຄ້າໂດຍສາມາດປູກເຂົ້າໄດ້ 16.193 ເຮັກຕາ ໄດ້ຜົນຜະລິດ 50.968 ໂຕນ ເທົ່າກັບ 97% ຂອງເນື້ອທີ່ແຜນການ 16.712 ເຮັກຕາ, ສະເລ່ຍເຂົ້າເປືອກໃສ່ພົນລະເມືອງ ໄດ້ຮັບ 240,40 ກິໂລຕໍ່ຄົນຕໍ່ປີ (ຖ້າທຽບໃສ່ມາດຕະຖານຂອງກະຊວງກະສິກຳ ແລະ ປ່າໄມ້ 234 ກິໂລຕໍ່ຄົນຕໍ່ປີ) ໃນນີ້, ການຜະລິດເຂົ້ານາແຊງຕາມແຜນການ 200 ເຮັກຕາ ປະຕິບັດຕົວຈິງໄດ້ 33,5 ເຮັກຕາ, ຜົນຜະລິດ 150,75 ໂຕນ, ທຽບໃສ່ແຜນການປີປະຕິບັດໄດ້ 17% ສາເຫດຫລຸດລົງເນື່ອງຈາກປະຊາຊົນ ຫັນເອົາເນື້ອທີ່ນາ ໄປປູກພືດອື່ນທີ່ມີເສດຖະກິດດີກວ່າ ເຊັ່ນ: ແຕງໂມ, ໝາກອຶ, ພືດຕະກຸນຖົ່ວ ແລະ ພືດຜັກອື່ນໆ; ເຂົ້ານາປີ ແຜນການສູ້ຊົນ 8.140 ເຮັກຕາ; ເຂົ້າເນີນສູງແຜນການສູ້ຊົນ 8.330 ເຮັກຕາ ປະຕິບັດໄດ້ 7.076 ເຮັກຕາ, ທຽບໃສ່ແຜນການ ປີ 85%; ການປູກອ້ອຍແຜນການ ປີ 11.287 ເຮັກຕາ, ປະຕິບັດໄດ້ 9.382 ເຮັກຕາ ທຽບໃສ່ແຜນການປີປະຕິບັດໄດ້ 83%; ການປູກຖ່ົວເຫລືອງແຜນການປີ 492 ເຮັກຕາ ປະຕິບັດຕົວຈິງໄດ້ 856 ເຮັກຕາ, ຜົນຜະລິດ 10.272 ໂຕນ, ທຽບໃສ່ແຜນການປີປະຕິບັດໄດ້ 174%; ການປູກແຕງໂມແຜນການປີ 450 ເຮັກຕາ ປະຕິບັດໄດ້ 528 ເຮັກຕາ, ທຽບໃສ່ແຜນການປີປະຕິບັດ ໄດ້ 117%; ມັນຕົ້ນແຜນການປີ 2.200 ເຮັກຕາ ປະຕິບັດຕົວຈິງໄດ້ 2.176 ເຮັກຕາ, ທຽບໃສ່ແຜນການປີປະຕິບັດໄດ້ 99%. ນອກນັ້ນ, ຍັງມີກ້ວຍ, ສາລີ, ຖົ່ວເບີ, ຢາສູບ, ໝາກອຶ, ກາເຟ ແລະ ໄມ້ໃຫ້ໝາກ.

     ທ່ານ ສອນໄຊ ອຸດົມ ຮອງຫົວໜ້າພະແນກກະສິກຳ ແລະ ປ່າໄມ້ ແຂວງຫລວງນ້ຳທາ ລາຍງານໃນກອງປະຊຸມສະຫລຸບການຈັດຕັ້ງປະຕິບັດວຽກງານກະສິກຳ ແລະ ປ່າໄມ້ ປະຈຳປີ 2024 ແລະ ວາງທິດທາງແຜນການປະຈຳປີ 2025 ໃນທ້າຍອາທິດຜ່ານມາວ່າ: ສຳລັບການລ້ຽງສັດທົ່ວແຂວງ ມີຟາມລ້ຽງສັດ 44 ຟາມ ໃນນີ້, ຟາມລ້ຽງງົວ-ຄວາຍ 28 ຟາມ ມີ 1.589 ໂຕ, ມີສູນກັກກັນສັດກ່ອນການສົ່ງອອກ 2 ແຫ່ງ, ສາມາດກັກກັ້ນໄດ້ 11.000 ໂຕຕໍ່ຊຸດ, ຟາມລ້ຽງທອມງົວ-ຄວາຍ 6 ຟາມ ສາມາດລ້ຽງໄດ້ 8.800 ໂຕຕໍ່ຊຸດ, ຟາມລ້ຽງໄກ່ໄຂ່ 4 ຟາມ ມີໄກ່ 74.000 ແມ່ ຜະລິດໄຂ່ໄດ້ 20-25 ລ້ານໜ່ວຍຕໍ່ປີ ສາມາດສະໜອງການບໍລິໂພກພາຍໃນແຂວງພຽງພໍ ແລະ ສົ່ງອອກໄປຕ່າງແຂວງຈໍານວນໜຶ່ງ. ໄປຄຽງຄູ່ກັນນັ້ນ ກໍໄດ້ຊຸກຍູ້-ສົ່ງເສີມການສ້າງຕັ້ງກຸ່ມການລ້ຽງສັດແລ້ວ ເພື່ອປະຕິບັດຕາມແຜນຍຸດທະສາດການເຕີບໂຕສີຂຽວ. ສຳລັບຍຸດທະສາດການພັດທະນາປ່າໄມ້ຮອດປີ 2025 ໃຫ້ມີເນື້ອທີ່ປົກຫຸ້ມກວມ 70% ນັ້ນ, ໄດ້ຖືເປັນວຽກງານທີ່ສຳຄັນ ແລະ ໄດ້ສຸມໃສ່ການຈັດຕັ້ງປະຕິບັດຕາມແຜນຈັດສັນຄຸ້ມຄອງໄປຕາມ 3 ປະເພດປ່າ, ປະຕິບັດຕາມຄຳສັ່ງ ເລກທີ 11/ນຍ ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ, ປົກປັກຮັກສາ, ພັດທະນາ ແລະ ນຳໃຊ້ປ່າໄມ້, ທີ່ດິນປ່າໄມ້ ແລະ ສະກັດກັ້ນໄຟໄໝ້ລາມປ່າ.

     ທ່ານ ສອນໄຊ ອຸດົມ ກ່າວຕື່ມວ່າ: ສຳລັບແຜນໃນຕໍ່ໜ້າ ແຂວງ ຫລວງນ້ຳທາ ໄດ້ຖືສຳຄັນວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ເຊິ່ງແມ່ນໜຶ່ງໃນສີ່ແຜນງານໃຫຍ່ຂອງຂະແໜງກະສິກຳ ແລະ ປ່າໄມ້ ເພື່ອສຸມທຸກກຳລັງໃສ່ການແກ້ໄຂຄວາມທຸກຍາກຂອງປະຊາຊົນໃຫ້ໄດ້ໂດຍພື້ນຖານ ດ້ວຍນະໂຍບາຍ ແລະ ມາດຕະການສ່ົງເສີມເຕັກນິກການປູກ-ການລ້ຽງແບບໃໝ່ແນໃສ່ຊຸກຍູ້ການຜະລິດ ເພື່ອຄໍ້າປະກັນຄວາມໝັ້ນຄົງ ດ້ານສະບຽງອາຫານ ໃຫ້ແຂງແຮງກວ່າເກົ່າ ພ້ອມທັງສືບຕໍ່ເຜີຍແຜ່ເຊື່ອມຊຶມມະຕິ, ຄຳສັ່ງ, ລະບຽບ, ກົດໝາຍທີ່ກ່ຽວຂ້ອງ ກັບ ວຽກງານກະສິກຳ ແລະ ປ່າໄມ້ ໃຫ້ກວ້າງຂວາງ, ທົ່ວເຖິງບັນດາກຸ່ມເປົ້າໝາຍ, ເອົາໃຈໃສ່ຊຸກຍູ້ສົ່ງເສີມກະສິກອນ ໂດຍປະສານສົມທົບກັບຜູ້ປະກອບການໃນການຖ່າຍທອດຄວາມຮູ້, ການນຳໃຊ້ເຕັກນິກ ວິຊາການ, ກົນຈັກ, ແນວພັນປັບປຸງພືດ-ສັດທີ່ດີ ເຂົ້າໃນຂະບວນການຜະລິດ ໃຫ້ກວ້າງຂວາງຂຶ້ນກວ່າເກົ່າ, ຊຸກຍູ້ກະສິກອນຜະລິດກະສິກຳເປັນສິນຄ້າຕິດພັນກັບຂໍ້ມູນຂ່າວສານດ້ານການຕະຫລາດ ເພື່ອເຮັດໃຫ້ຂະບວນການຜະລິດ ມີການຂະຫຍາຍຕົວໄວ, ມີປະສິດທິຜົນສູງ ແລະ ມີຄວາມຍືນຍົງ.

ຂ່າວ: ແກ້ວ ກວ໋າງບັນແຄັດ
(ແຫລ່ງຂ່າວຈາວຈາກ ແຂວຫລວງນໍ້າທາ))

KPL