*ໄຊຊະນະປະຫວັດສາດ ແຫ່ງການລຸກຮືຂຶ້ນຢຶດອຳນາດການປົກຄອງທົ່ວປະເທດ ແລະ ສະຖາປະນາ ເປັນສາທາລະນະລັດ ປະຊາທິປະໄຕ ປະຊາຊົນລາວ ໃນປີ 1975 ໄດ້ເຮັດໃຫ້ການປະຕິວັດລາວກ້າວເຂົ້າສູ່ໄລຍະໃໝ່, ໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ສືບຕໍ່ສ້າງ ແລະ ຂະຫຍາຍລະບອບປະຊາທິປະໄຕ ປະຊາຊົນລາວ ສ້າງປະຖົມປັດໄຈເພື່ອກ້າວຂຶ້ນສັງຄົມນິຍົມເທື່ອລະກ້າວ. ປະເທດລາວໄດ້ເປັນປ້ອມດ່ານໜ້າຂອງສັງຄົມນິຍົມ, ດ້ວຍທ່ີຕັ້ງອັນສຳຄັນນີ້, ພວກຈັກກະພັດ ແລະ  ອິດທິກຳລັງປໍລະປັກໄດ້ສຸມໃສ່ມ້າງເພທຳລາຍການປະຕິວັດລາວໃນທຸກດ້ານ. ພວກເຂົາໄດ້ດຳເນີນກົນອຸບາຍຫລາຍຮູບຫລາຍສີທີ່ເລິກແລກທາງດ້ານການເມືອງ, ການທະຫານ, ເສດຖະກິດ, ວັດທະນະທຳສັງຄົມ ແລະ ການຕ່າງປະເທດ, ຫວັງມ້າງເພທຳລາຍການປະຕິວັດລາວ ໃນສະເພາະໜ້າ ແລະ ຍາວນານ.

    ໃນຊຸມປີທຳອິດແຫ່ງການປົກປັກຮັກສາປະເທດຊາດ ແລະ ສ້າງສາລະບອບໃໝ່, ພວກຈັກກະພັດ ແລະ ອິດທິກຳລັງປໍລະປັກໄດ້ສຸມ ໃສ່ມ້າງການປະຕິວັດລາວໃນທຸກດ້ານຢ່າງຕໍ່ເນ່ືອງ, ພວກເຂົາໄດ້ເຂົ້າມາເຄື່ອນໄຫວໃນບາງບໍລິເວນ ທີ່ສຳຄັນຂອງບາງແຂວງ, ຈັດຕັ້ງໜ່ວຍເຄື່ອນໄຫວໃຕ້ດິນ ຢູ່ບໍລິເວນທົ່ງພຽງອ້ອມແອ້ມຕົວເມືອງ ແລະ  ຢູ່ໃນບາງຕົວເມືອງ, ຈັດຕັ້ງການປຸ້ນເອົາວັດຖຸສິ່ງຂອງເງິນຄຳ ຂອງປະຊາຊົນ ທີ່ຜ່ານໄປມາຕາມເສັ້ນທາງລຳລຽງຂົນສົ່ງທີ່ສຳຄັນ, ຫລອນຕີເຂົ້າບາງຕົວເມືອງທີ່ພວກເຮົາເຜີ. ພວກເຂົາກໍ່ການປະທະດ້ວຍອາວຸດຫລາຍສິບຄັ້ງຢູ່ລຽບຕາມຊາຍແດນເບື້ອງຕາເວັນຕົກຂອງປະເທດ. ດຳເນີນການອັດຊາຍແດນແຕ່ຝ່າຍດຽວເພື່ອປິດລ້ອມ ທາງດ້ານເສດຖະກິດຕໍ່ລາວ. ອອກແຮງໂຄສະນາໃສ່ຮ້າຍປ້າຍສີລະບອບໃໝ່ຂອງລາວ, ໃສ່ຮ້າຍປ້າຍສີ ຫວຽດນາມ ແລະ ບັນດາປະເທດສັງຄົມນິຍົມ, ແບ່ງແຍກການປະຕິວັດລາວກັບການປະຕິວັດຂອງບັນດາປະເທດອ້າຍນ້ອງໃນອິນດູຈີນ ແລະ ໃນໂລກ. ບັນດາກົນອຸບາຍ ແລະ ການກະທຳຂອງສັດຕູດັ່ງກ່າວມານັັ້ນ ຖືກກອງທັບ ແລະ ປະຊາຊົນເຮົາສະກັດກັນ ແລະ ທັບມ້າງຢ່າງທັນການ, ການຈັດຕັ້ງໃຕ້ດິນຂອງສັດຕູຖືກມ້າງ ແລະ ຮື້ຖອນທັງໝົດ, ໂຄ່ນ ລົ້ມອຳນາດການປົກຄອງປະຕິວັດ ຖືກດັບມອດ; ເຮືອນຮັງທີ່ສຳຄັນ ຂອງພວກປຸ້ນຢູ່ຕາມບໍລິເວນຕ່າງໆ ຖືກກວາດລ້າງ ແລະ ດັບສູນ. ການ ກະທຳເກາະຜິດຂອງສັດຕູ ຢູ່ຕາມ ຊາຍແດນຖືກສະກັດກັ້ນ ແລະ ຕີຖອຍ; ກົນອຸບາຍຫວັງຈະໂຄ່ນລົ້ມລະບອບໃໝ່ຂອງລາວໂດຍໄວ ດ້ວຍກຳລັງອາວຸດຖືກຕີຕ້ານໃຫ້ປະລາໄຊລົງ. ອຳນາດການປົກຄອງປະຕິວັດໄດ້ປັບປຸງເພີ່ມທະວີໃຫ້ມີຄວາມໜັກແໜ້ນເຂັ້ມແຂງຂຶ້ນ, ປະເທດຊາດໄດ້ຄ່ອຍໆມີຄວາມສະຫງົບ, ລະບອບໃໝ່ໄດ້ຮັບການປົກປັກຮັກສາໄວ້ໄດ້.

    ວຽກງານທ່ີສຳຄັນອີກປະການໜຶ່ງ ທີ່ພັກເຮົາໄດ້ເອົາໃຈໃສ່ແກ້ໄຂ ແມ່ນການຟ້ືນຟູເສດຖະກິດ-ສັງຄົມຂອງຊາດ, ແກ້ໄຂຜົນຮ້າຍຂອງສົງຄາມ ແລະ ຜົນຮ້າຍຂອງລະບອບເກົ່າປະໄວ້, ເຮັດໃຫ້ຊີວິດການເປັນຢູ່ຂອງປະຊາຊົນເຂົ້າສູ່ຄວາມສະຫງົບປົກກະຕິ. ສູ້ຊົນປະຕິບັດແຜນນະໂຍບາຍສ້າງເສດຖະກິດເອກະລາດ, ເປັນເຈົ້າຕົນເອງຕາມ ທິດສັງຄົມນິຍົມໄດ້ປຸກລະດົມ ປະຊາຊົນເຂົ້າຮ່ວມໃນແນວຮົບການຜະລິດກະສິກຳ, ຟື້ນຟູນາເຮື້ອ, ຊ່າວນາໃໝ່, ຕ້ານໄພທຳມະຊາດຢ່າງເປັນຂະບວນກວ້າງຂວາງ ແລະ ຟົດຟື້ນນຳໃຊ້ເຕັກນິກໃໝ່ເຂົ້າສູ່ການຜະລິດ. ຟື້ນຟູການຜະລິດຂອງໂຮງຈັກ, ໂຮງງານທັງໃຫຍ່ ແລະ ນ້ອຍນັບເປັນຮ້ອຍໆແຫ່ງ ເຊັ່ນ: ໂຮງງານໄຟຟ້າ, ນ້ຳປະປາ, ສ້ອມແປງກົນຈັກ, ພື້ນຖານໂຮງເລື່ອຍ ແລະ ປຸງແຕ່ງໄມ້, ໂຮງງານຜະລິດເບຍ, ນ້ຳຫວານ, ນ້ຳປາ, ໂຮງງານຕ່ຳແຜ່ນ ແລະ ອື່ນໆ. ພັກຖືສຳຄັນ ແລະ ເອົາໃຈໃສ່ປະຕິບັດນະໂຍບາຍສາມັກຄີ ລະຫວ່າງ ເຜົ່າ, ຊັ້ນຄົນ, ເພດໄວ ແລະ ສາສະໜາ ໃນວົງຄະນາຍາດແຫ່ງຊາດ ບົນພື້ນຖານພັນທະພາບກຳມະກອນ-ຊາວນາໃຕ້ການນຳພາຂອງພັກ. ປະຕິບັດສິດເສລີພາບປະຊາທິປະໄຕຂອງພົນລະເມືອງ, ລົບລ້າງຄວາມອາຄາດບາດໝາງ ລະຫວ່າງຊົນເຜົ່າ; ເສີມຂະຫຍາຍພາລະບົດບາດຂອງບັນດາອົງການຈັດຕັ້ງມະຫາຊົນ ເຂົ້າໃນການເພີ່ມທະວີຄວາມສາມັກຄີປວງຊົນລາວທັງຊາດ ເພື່ອປົກປັກຮັກສາ ແລະ ສ້າງສາປະເທດຊາດ. ພາຍຫລັງຢຶດອຳນາດການປົກ ຄອງທົ່ວປະເທດ ພັກປະຊາຊົນປະ ຕິວັດລາວ ໄດ້ກາຍມາເປັນພັກກຳ ອຳນາດ, ເປັນຜູ້ຈັດຕັ້ງທົ່ວສັງຄົມ. ນີ້ເປັນບາດລ້ຽວປະຫວັດສາດທີ່ສຳ ຄັນ, ເປັນຂີດໝາຍແຫ່ງການເຕີບ ໃຫຍ່ຂະຫຍາຍຕົວຂອງພັກເຮົາ, ມັນແມ່ນພາລະກຳປະຫວັດສາດຂອງພັກ ທີ່ປະເທດຊາດ ແລະ ປະຊາຊົນມອບໝາຍ. ເດືອນພະຈິກປີ 1979, ຄະນະບໍລິຫານງານສູນກາງພັກ ດຳເນີນກອງປະຊຸມຄັ້ງທີ 7 ສະໄໝທີ II, ໃນກອງປະຊຸມຄັ້ງນີ້ ພາຍຫລັງໄດ້ໄຈ້ແຍກສະພາບການສາກົນ ແລະ ພາຍໃນປະເທດ, ສະຫາຍ ໄກສອນ ພົມວິຫານ ເລຂາທິການໃຫຍ່ໄດ້ຍົກໃຫ້ເຫັນແຈ້ງຈຸດພິເສດ ຂອງການປະຕິວັດລາວໃນໄລຍະໃໝ່, ປະເທດລາວພ້ອມກັບຫວຽດນາມ ແລະ ກຳປູເຈຍ ໄດ້ເປັນປ້ອມດ່ານໜ້າຂອງລະບົບສັງຄົມນິຍົມຢູ່ອາຊີອາຄະເນ, ມີສັດຕູໂຕດຽວກັນ ແລະ ສາມັກຄີເປັນເອກະພາບ ໃນຍຸດທະສາດລວມອັນດຽວກັນ.

    ພັກໄດ້ເອົາໃຈໃສ່ຂະຫຍາຍການສຶກສາ ແລະ ບຳລຸງວັດທະນະທຳ, ປີ 1979 ຫລັກສູດການສຶກສາ ໃນທົ່ວປະເທດໄດ້ເປັນເອກະພາບກັນ, ມາຮອດປີ 1980 ນັກຮຽນປະຖົມເພ່ີ່ມຂຶ້ນສອງເທົ່າ, ນັກຮຽນມັດທະຍົມເພີ່ມຂຶ້ນ 6 ເທົ່າ ແລະ ນັກຮຽນອຸດົມເພ່ີ່ມຂຶ້ນ 11 ເທົ່າທຽບ ໃສ່ສົກປີ 1975-1976, ໂຮງຮຽນມະຫາວິທະຍາໄລ, ສະຖາບັນການສຶກສາຊັ້ນສູງ ແລະ ໂຮງຮຽນວິຊາຊີບມີເກືອບ 40 ແຫ່ງໃນທົ່ວປະເທດ ລົບລ້າງຄວາມບ່ໍຮູ້ໜັງສືໃນທ່ົວປະເທດ; ຕາງໜ່າງສາທາລະນະສຸກເພີ່ມຂຶ້ນ 20%, ຮາກຖານປິ່ນປົວພະຍາດໄດ້ເພີ່ມຂຶ້ນ, ຢາພື້ນເມືອງໄດ້ຮັບການສົ່ງເສີມເຜີຍແຜ່ຢ່າງກວ້າງຂວາງການແກ້ໄຂວຽກເຮັດງານທຳ ໄດ້ຮັບຄວາມເອົາໃຈໃສ່.

ຮຽບຮຽງໂດຍ:ແສງສະຫວັນ

KPL