ຂປລ. ກອງປະຊຸມຄະນະອະນຸ ກໍາມະການເຕັກນິກຮ່ວມ ລາວ-ໄທ, ໄທ-ລາວ ຄັ້ງທີ 16 ຈັດຂຶ້ນໃນວັນທີ 19-23 ມັງກອນ 2025 ຢູ່ເມືອງບາງລະມຸງ ແຂວງຊົນບູລີ ຣາຊະອານາຈັກໄທ, ຫົວໜ້າ ຝ່າຍລາວນຳ​ໂດຍ ທ່ານ ອານຸສິນ ຂັດຕິຍະລາດ ​ຫົວ​ໜ້າ​ຫ້ອງ​ການ​ ຄະ​ນະ​ກຳ​ມະ​ການ​ຊາຍ​ແດນ​ແຫ່ງ​ຊາດ, ກະ​ຊວງ​ການ​ຕ່າງ​ປະ​ເທດ, ປະທານຄະນະອະນຸກໍາ ມະການເຕັກນິກ​​ຮ່ວມ ລາວ-ໄທ ແລະ ຝ່າຍໄທນໍາໂດຍ ທ່ານ ພົນໂທ ຊາຄອນ ບຸນພັກດີ ເຈົ້າກົມແຜນທີ່ທະຫານ, ກອງບັນຊາການກອງທັບໄທ, ປະທານຄະນະອະນຸກໍາມະການເຕັກນິກຮ່ວມ ໄທ-ລາວ, ມີຄະນະອະນຸກໍາມະການເຕັກນິກ ຂອງສອງຝ່າຍ ເຂົ້າຮ່ວມ.

ກອງປະຊຸມຄັ້ງນີ້, ສອງຝ່າຍໄດ້ປຶກສາຫາລື ແລະ ແລກປ່ຽນຄໍາຄິດເຫັນຮ່ວມກັນຢ່າງກົງໄປກົງມາ ບົນພື້ນຖານໄມຕີຈິດມິດຕະພາບທີ່ດີ ເພື່ອເຮັດໃຫ້ວຽກງານການສໍາຫລວດ ແລະ ປັກຫລັກໝາຍຊາຍແດນ ລາວ-ໄທ ທາງບົກ ແລະ ທາງນໍ້າ (ແມ່ນໍ້າຂອງ) ມີຄວາມຄືບໜ້າ ເປັນຕົ້ນວຽກງານກວດກາສະພາບ ແລະ ບູລະນະຫລັກໝາຍຊາຍແດນ ລາວ-ໄທ ທີ່ສອງຝ່າຍໄດ້ຮ່ວມກັນກໍ່ສ້າງ ແຕ່ປີ 1997 ເຖິງ 2018 ໄດ້ທັງໝົດ 211 ຫລັກໝາຍ, ຜ່ານມາໄດ້ເຮັດໃຫ້ຫລັກໝາຍຊາຍແດນຈໍານວນໜຶ່ງຊຸດໂຊມ ແລະ ເປ່ເພ. ສະນັ້ນ, ນັບແຕ່ປີ 2022 ເປັນຕົ້ນມາ, ສອງຝ່າຍຈຶ່ງໄດ້ຮ່ວມກັນ ບູລະນະຫລັກໝາຍໃຫ້ມີ ສະພາບຕາມເດີມ, ມາຮອດປັດຈຸບັນ ໄດ້ບູລະນະຫລັກໝາຍຊາຍແດນ ສໍາເລັດ 109 ຫລັກໝາຍ, ຍັງເຫລືອ 102 ຫລັກໝາຍ ແມ່ນກໍາລັງສືບຕໍ່ບູລະນະ. ພ້ອມນີ້, ຍັງໄດ້ປຶກສາຫາລື ກ່ຽວກັບການບິນຖ່າຍພາບທາງອາກາດ ແລະ ສ້າງແຜນທີ່ຕາມລໍານໍ້າເຫືອງ ເພື່ອເປັນບ່ອນອີງໃຫ້ແກ່ການສໍາຫລວດ ແລະ ປັກຫລັກໝາຍຊາຍແດນ ຕາມລໍານໍ້າເຫືອງຮ່ວມກັນໃນຕໍ່ໜ້າ; ກໍານົດຈຸດ ສະເໜີຂັ້ນເທິງພິຈາລະນາ ກໍ່ສ້າງຫລັກໝາຍຊາຍແດນ ຢູ່ພູມີປະເທດຕົວຈິງເພີ່ມເຕີມ; ເອກະພາບປັບປຸງແຜນຜັງສະໜາມ ແລະ ວຽກງານພາກສະໜາມອື່ນໆ ຮ່ວມກັນອີກຈໍານວນໜຶ່ງ; ວຽກງານຊາຍແດນ ລາວ-ໄທ ທາງນໍ້າ (ແມ່ນໍ້າຂອງ), ສອງຝ່າຍຈະສືບຕໍ່ເລັ່ງລັດການປຽບທຽບ ຜົນການທົດລອງຖ່າຍທອດ ເສັ້ນຊາຍແດນລົງໃນແຜນ ທີ່ແມ່ນໍ້າຂອງ ສະບັບໃໝ່ຮ່ວມ ລະຫວ່າງ ລາວ-ໄທ ໃນຈໍານວນ 6 ບໍລິເວນ ແລະ ການຮ່ວມກັນລົງສໍາຫລວດ ພູມີປະເທດຕົວຈິງ ຢູ່ບັນດາດອນຕ່າງໆ ໃຫ້ສໍາເລັດຢ່າງເປັນຮູບປະທໍາ.

ຜົນສໍາເລັດຂອງກອງປະຊຸມຄັ້ງນີ້, ເປັນການປະກອບສ່ວນສໍາຄັນ ໃນການສ້າງເສັ້ນຊາຍແດນ ລະຫວ່າງສອງປະເທດ ໃຫ້ກາຍເປັນເສັ້ນຊາຍແດນ ແຫ່ງສັນຕິພາບ, ມິດຕະພາບ ແລະ ການຮ່ວມມືພັດທະນາ.

ໃນໂອກາດເຂົ້າຮ່ວມກອງປະຊຸມດັ່ງກ່າວ, ຄະນະອະນຸກໍາມະການເຕັກນິກ ຊາຍແດນຮ່ວມຝ່າຍລາວ ຍັງໄດ້ໄປທັດສະນະສຶກສາ ແລະ ຖອດຖອນບົດຮຽນກ່ຽວກັບ ການນໍາໃຊ້ເຮືອບິນບໍ່ມີຄົນຂັບ (UAV) ແລະ ການນໍາໃຊ້ເຕັກໂນໂລຊີ LiDAR ທີ່ຝ່າຍໄທ ໄດ້ທົດລອງນໍາໃຊ້ຊ່ວຍ ໃນການສໍາຫລວດພູມີປະເທດຕົວຈິງ ຕາມບໍລິເວນຊາຍແດນຮ່ວມກັບປະເທດໃກ້ຄຽງ ເພື່ອເປັນບ່ອນອີງທາງດ້ານຂໍ້ມູນ ໃຫ້ແກ່ການຄົ້ນຄວ້າ ຄວາມເປັນໄປໄດ້ໃນການນໍາໃຊ້ ເຕັກໂນໂລຊີດັ່ງກ່າວນີ້ ເຂົ້າໃນວຽກງານການສໍາຫລວດພູມີປະເທດ ແລະ ສ້າງແຜນທີ່ຕາມລໍານໍ້າເຫືອງ ທີ່ສອງຝ່າຍວາງແຜນ ຈະຈັດຕັ້ງປະຕິບັດຮ່ວມກັນໃນຕໍ່ໜ້ານີ້.

ຂ່າວ-ພາບ: ກຕທ

KPL