ຂປລ.ວິທະຍຸ ກະຈາຍສຽງ ຫວຽດນາມ, ເມື່ອບໍ່ດົນມານີ້ ເທດສະບານ ເຟືອກລອງ, ແຂວງ ບິ່ງເຟືອກ ໄດ້ດຳເນີນພິທີ ສະເຫລີມ ສະຫລອງ 50 ປີ ແຫ່ງວັນ ປົດປ່ອຍ ເຟືອກລອງ (06/01/1975-06/01/2025). ໂດຍມີ ທ່ານ ໂຕເລິມ, ເລຂາທິການໃຫຍ່ ພັກກອມມູນິດ ຫວຽດນາມ ເຂົ້າຮ່ວມ ພ້ອມທັງ ໄດ້ກ່າວເນັ້ນໜັກວ່າ: ໄຊຊະນະ ເຟືອກລອງ ເມື່ອ50 ປີກ່ອນ ໄດ້ສ້າງພື້ນຖານ ອັນສຳຄັນ ເພື່ອໃຫ້ທົ່ວພັກ, ທົ່ວກອງທັບ, ທົ່ວປວງຊົນຕັດສິນໃຈ ທ້ອນໂຮມ ປະເທດຊາດ ເປັນເອກະພາບ, ນຳຫວຽດນາມ ກ້າວເຂົ້າສູ່ ສັງກາດ ສັນຕິພາບ, ເອກະລາບ, ເສລີພາບ. ປະດັບຫລຽນໄຊແຮງງານ ຊັ້ນໜຶ່ງ ໃຫ້ແກ່ ອົງຄະນະພັກ, ອຳນາດ ການປົກຄອງ  ແລະ ປະຊາຊົນ ເທດສະບານ ເຟືອກລອງ, ທ່ານ ເລຂາທິການໃຫຍ່ ໂຕເລິມ ຢັ້ງຢືນວ່າ: ປະເທດຊາດ ແລະ ປະຊາຊົນ ຍາມໃດກໍ່ຈາລຶກ ຄຸນງາມຄວາມດີ ຂອງບັນດາ ນັກວິລະຊົນ ທີ່ເສຍສະຫລະ ຊີວິດ ເພື່ອຊາດ, ພໍ່ແມ່ປະຊາຊົນ ທີ່ໄດ້ມີການຕໍ່ສູ້ ຢ່າງອົງອາດກ້າຫານ, ຍອມເສຍສະຫລະ ຊີວິດເພື່ອພາລະກິດ ປົດປ່ອຍຊາດ, ທ້ອນໂຮມ ປະເທດຊາດ ເປັນເອກະພາບ. ເພື່ອເສີມຂະຫຍາຍ ກຳລັງຄວາມສາມາດ ບົ່ມຊ້ອນ ທ່າໄດ້ປຽບ ຂອງທ້ອງຖິ່ນ, ຈາກນັ້ນ ທ່ານ  ໂຕເລິມ ສະເໜີວ່າ: ຄ່ອຍໆຫັນເປັນ ອຳນາດ ການປົກຄອງ ດີຈີຕອນ, ເສດຖະກິດ ດີຈີຕອນ, ສັງຄົມ ດີຈີຕອນ ເທື່ອລະກ້າວ. ເອົາໃຈໃສ່ ເປັນພິເສດ ເຖິງການສ້າງ ວັດທະນະທຳ ບິ່ງເຟືອກ ເປັນຫລາຍຮູບແບບ, ຫລາຍສີສັນ, ເຊື່ອມໂຍງສາກົນ, ຊາວບິ່ງເຟືອກ ທີ່ມີຄວາມປ່ອງດອງ, ເຕັມໄປດ້ວຍ ນ້ຳໃຈ ຄວາມຮັກແພງ, ສ້າງຄວາມເຂັ້ມແຂງ ດ້ວຍຕົນເອງ, ມີລະບຽບວິໄນ, ປະດິດຄິດສ້າງ, ເພື່ອເຮັດ ໃຫ້ແຫລ່ງ ຊັບພະຍາກອນ ທາງດ້ານຈິດໃຈ ຂອງຊາດອຸ ດົມສົມບູນ ກ່ວາເກົ່າ./.

(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ

KPL