ຂປລ
ພະນັກງານ ລັດຖະກອນ ຫລາຍລ້ານຄົນ ທົ່ວປະເທດ ສປຈີນ ໄດ້ຮັບການ ປັບຂຶ້ນ ເງິນເດືອນ ໃນຕົ້ນປີນີ້ ຊຶ່ງເປັນໄປຕາມ ແນວທາງ ຂອງ ລັດຖະບານ ສປຈີນ ເພື່ອຊຸກຍູ້ ເສດຖະກິດທີ່ຢຸດຈຶ້ງ.
ຂປລ. ສຳນັກຂ່າວ ເອເອຟພີ ລາຍງານຈາກ ນະຄອຫລວງ ປັກກິ່ງ ປະເທດ ສປຈີນ, ວັນທີ 4 ມັງກອນ ພະນັກງານ ລັດຖະກອນ ຫລາຍລ້ານຄົນ ທົ່ວປະເທດ ສປຈີນ ໄດ້ຮັບການ ປັບຂຶ້ນ ເງິນເດືອນ ໃນຕົ້ນປີນີ້ ຊຶ່ງເປັນໄປຕາມ ແນວທາງ ຂອງ ລັດຖະບານ ສປຈີນ ເພື່ອຊຸກຍູ້ ເສດຖະກິດທີ່ຢຸດຈຶ້ງ. ການຈ່າຍເງິນທັນທີ ໃນລັກສະນະດັ່ງກ່າວ ຈະເທົ່າກັບ ການກະຕຸ້ນ ເສດຖະກິດ ຄັ້ງດຽວ ຊຶ່ງກວມເອົາ ມູນຄ່າ ປະມານ 12.000-20.000 ລ້ານໂດລາ ສະຫະລັດ ແລະ ຈະກວມເອົາ ພະນັກງານ ລັດຖະກອນ ເຖິງ 48 ລ້ານຄົນ ໃນສປຈີນ.
ການປັບຂຶ້ນເງິນເດືອນ ພະນັກງານ ລັດຖະກອນ ຄັ້ງຫລ້າສຸດ ກ່ອນໜ້ານີ້ ຂອງ ສປຈີນ ເມື່ອປີ 2015, ໂດຍ ເງິນເດືອນ ເຈົ້າໜ້າທີ່ ທ້ອງຖິ່ນ ປັບຂຶ້ນ ຫລາຍກວ່າ 30% ເພື່ອປາບປາມ ການສໍ້ລາດບັງຫລວງ ແລະ ເພີ່ມອຳນາດຊື້ ຂອງ ຜູ້ບໍລິໂພກ. ສ່ວນເງິນເດືອນ ພະນັກງານ ລັດຖະກອນ ເພີ່ມຂຶ້ນ ສະເລ່ຍ ປະມານ 500 ຢວນຕໍ່ເດືອນ, ໃນຂະນະທີ່ ພະນັກງານ ລະດັບ ຂັ້ນຕໍ່າ ບາງຄົນ ໄດ້ຮັບ ຄ່າຕອບແທນ ເພີ່ມຂຶ້ນເກືອບ 300 ຢວນຕໍ່ເດືອນ, ໂດຍໃນຫລາຍກໍລະນີ ການປັບຂຶ້ນເງິນເດືອນ ຈະມີຜົນ ຍ້ອນຫລັງ ໄປເຖິງເດືອນ ກໍລະກົດ ປີຜ່ານມາ ແລະ ຈ່າຍເປັນງວດດຽວ ຄື ກັບເງິນໂບນັດ.
ທັງນີ້, ລັດຖະບານ ສປຈີນ ຕ້ອງການເພີ່ມ ການຂາດດູນ ງົບປະມານ ໃຫ້ເທົ່າກັບ 4% ຂອງ ລວມຍອດຜະລິດ ຕະພັນພາຍໃນ ປະເທດ (ຈີດີພີ) ໃນປີ 2025 ຊຶ່ງຄາດວ່າ ຈະຊ່ວຍໃຫ້ ສາມາດ ບັນລຸ ເປົ້າໝາຍ ການເຕີບໂຕ ທາງເສດຖະກິດ ປະມານ 5% ໃນປີນີ້, ເຖິງແມ່ນວ່າ ສປຈີນ ຕ້ອງຜະເຊີນກັບ ອະສັງຫາລິມະຊັບ ທີ່ຍາວນານ, ລາຄາທີ່ຢູ່ອາໄສ ຫລຸດລົງ ແລະ ທ່າອ່ຽງ ຂອງ ພາສີ ຈະເພີ່ມສູງຂຶ້ນ ສຳລັບ ສິນຄ້າສົ່ງອອກ ໄປຍັງ ສ.ອາເມລິກາ. /
KPL
