ຂປລ
ສປ ຈີນ ຈະປັບອັດຕາ ແລະ ປະເພດ ຂອງການເກັບພາສີ ຕໍ່ສິນຄ້າ ນຳເຂົ້າ ຈຳນວນໜຶ່ງ ໃນຕົ້ນປີ 2025 ຊຶ່ງຈະປະຕິບັດ ອັດຕາພາສີ ການນຳເຂົ້າ ທີ່ກຳນົດໄວ້ ຊົ່ວຄາວຕໍ່ ສິນຄ້າ 935 ປະເພດ ເຊິ່ງຕ່ຳກວ່າ ອັດຕາພາສີ ຂອງປະເທດ ທີ່ມີບຸລິມະສິດ.
ຂປລ.ວິທະຍຸ ສາກົນ ແຫ່ງ ສປ ຈີນ, ຄະນະ ກຳມະການ ກົດລະບຽບ ພາສີ ອາກອນ ຂອງລັດຖະບານຈີນ ໄດ້ປະກາດ ແຈ້ງການ ຕໍ່ພາຍນອກ ເມື່ອບໍ່ດົນມານີ້ວ່າ: ສປ ຈີນ ຈະປັບອັດຕາ ແລະ ປະເພດ ຂອງການເກັບພາສີ ຕໍ່ສິນຄ້າ ນຳເຂົ້າ ຈຳນວນໜຶ່ງ ໃນຕົ້ນປີ 2025 ຊຶ່ງຈະປະຕິບັດ ອັດຕາພາສີ ການນຳເຂົ້າ ທີ່ກຳນົດໄວ້ ຊົ່ວຄາວຕໍ່ ສິນຄ້າ 935 ປະເພດ ເຊິ່ງຕ່ຳກວ່າ ອັດຕາພາສີ ຂອງປະເທດ ທີ່ມີບຸລິມະສິດ. ເພື່ອຊ່ວຍເຫລືອ ປະເທດ ທີ່ດ້ອຍພັດທະນາ ແລະ ເຮັດໃຫ້ຕ່າງຝ່າຍ ຕ່າງໄດ້ຮັບ ຜົນປະໂຫຍດ, ນອກນີ້ ສປ ຈີນ ຈະສືບຕໍ່ ປະຕິບັດ ການປອດພາສີ ຕໍ່ປະເພດສິນຄ້າ 100% ຈາກປະເທດທີ່ດ້ອຍພັດທະນາ ຈຳນວນ 43 ປະເທດ ທີ່ໄດ້ສ້າງ ສາຍພົວພັນ ທາງການທູດກັບ ສປ ຈີນ. ຂະນະດຽວກັນ, ສປ ຈີນ ຈະສືບຕໍ່ປະຕິບັດ ອັດຕາພາສີ ທີ່ເປັນ ບຸລິມະສິດ ພິເສດ ຕໍ່ສິນຄ້ານຳເຂົ້າ ທີ່ຜະລິດຢູ່ ສປປ ລາວ, ບັງກລາເທດ,ກຳປູເຈຍ ແລະ ມຽນມາ ຈຳນວນໜຶ່ງ ຕາມສັນຍາ ການຄ້າ ອາຊີ ປາຊີຟິກ ແລະ ສັນຍາ ແລກເອກະສານ ລະຫວ່າງ ລັດຖະບານຈີນ ກັບປະເທດ ສະມາຊິກ ອາຊຽນ ທີ່ກ່ຽວຂ້ອງ ແລະ ເນື້ອໃນອື່ນໆ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
