ຂປລ
ມີເດັກນ້ອຍ ປະມານ 473 ລ້ານຄົນ ເທົ່າກັບ 1/6 ຈຳນວນ ເດັກນ້ອຍ ໃນທົ່ວໂລກ ພວມດຳລົງຊີວິດ ຢູ່ບັນດາເຂດ ເກີດການປະທະກັນ ໃນໂລກ.
ຂປລ.ວິທະຍຸ ກະຈາຍສຽງ ຫວຽດນາມ, ຕາມບົດລາຍງານຂອງ UNICEF ປະກາດ ເມື່ອບໍ່ດົນມານີ້ວ່າ: ມີເດັກນ້ອຍ ປະມານ 473 ລ້ານຄົນ ເທົ່າກັບ 1/6 ຈຳນວນ ເດັກນ້ອຍ ໃນທົ່ວໂລກ ພວມດຳລົງຊີວິດ ຢູ່ບັນດາເຂດ ເກີດການປະທະກັນ ໃນໂລກ. ອັດຕາສ່ວນ ເດັກນ້ອຍ ດຳລົງຊີວິດ ຢູ່ເຂດເກີດ ການປະທະກັນ ໄດ້ເພີ່ມຂຶ້ນ ສອງເທົ່າ, ຈາກ 10% ໃນທົດສະວັດ 1990 ຂຶ້ນເຖິງເກືອບ 19% ໃນປະຈຸບັນ. ຮອດທ້າຍປີກາຍ, ມີເດັກນ້ອຍ 47,2 ລ້ານຄົນ ຕ້ອງປະລະ ເຮືອນຊານ ຍ້ອນການປະທະກັນ ແລະ ການໃຊ້ຄວາມຮຸນແຮງ. ທ່າອ່ຽງນີ້ ຄາດວ່າ ສືບຕໍ່ເພີ່ມຂຶ້ນ ໃນປີນີ້ ເມື່ອບັນດາການປະທະກັນ ພວມເພີ່ມຂຶ້ນຢູ່ ໄຮຕີ ແລະ ລີບັງ, ມຽນມາ, ປາແລດສະຕິນ ແລະ ຊູດັງ. ພິເສດ ຢູ່ ເຂດກາຊາ, ການປະທະກັນພວມເກີດຂຶ້ນ ຢ່າງຮ້າຍແຮງ. ທ່ານ ໂຣຊາລາຍ ໂບເລັນ(Rosalia Bollen), ຜູ້ຊ່ຽວຊານ ດ້ານສື່ມວນຊົນຂອງ UNICEF ໃຫ້ຮູ້ວ່າ: ເດັກນ້ອຍ ຢູ່ ເຂດກາຊາ ພວມຮັບມືກັບ ສະພາບອາກາດ ໜາວແຮງ, ພະຍາດ ແລະ ຖືກຜົນສະທ້ອນ ຢ່າງແຮງ ດ້ານຈິດຕະສາດ. ມີເດັກນ້ອຍ ຢ່າງໜ້ອຍສຸດແມ່ນ 17.492 ຄົນ ຖືກເສຍຊີວິດ ໃນເກືອບ 15 ເດືອນ ເກີດການປະທະກັນ. ຕາມການສະຖິຕິຂອງ UNICEF ແລ້ວ, ມີແມ່ຍິງ ແລະ ເດັກນ້ອຍ ປະມານ 96% ຢູ່ເຂດ ກາຊາ ບໍ່ສາມາດຕອບສະໜອງ ຄວາມຕ້ອງການ ດ້ານທາດບຳລຸງ ໂດຍພື້ນຖານ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
