*ຜະລິດຕະພັນຈັກສານຫວາຍເຂດຈັດສັນຫາດໝວກ ແລະ ຜະລິດຕະພັນທັກຍູກວາດ ເຂດບ້ານກາງ ເມືອງຜາອຸດົມ ແຂວງບໍ່ແກ້ວ ແມ່ນກຸ່ມຜະລິດຕະພັນໜຶ່ງ ທີ່ມີທ່າແຮງທາງສີມືມາຫລາຍເຊັ່ນຄົນທີ່ສືບທອດກັນມາຈົນເຖິງປັດຈຸບັນ. ສີມ ທາງດ້ານການຈັກສານຫວາຍ ແລະ ທັກຍູກວາດ ຜະລິດແບບທຳມະຊາດໃຊ້ໃນຄົວເຮືອນ, ເຫລືອໃຊ້ກໍຜະລິດຂາຍອອກຈໍານວນໜຶ່ງເພື່ອມາແລກເຂົ້າ, ແລກນໍ້າຕາມບ້ານ ໃກ້ຄຽງກັນ ແລະ ຕໍ່ມາໄດ້ມີໂຄງການເຂົ້າມາພ້ອມໄດ້ຮັບການສົ່ງເສີມຈາກໂຄງການຄອນເຊີນ ແລະ ໂຄງການ MHP ໃຫ້ມີການຜະລິດເປັນສິນຄ້າຜະລິດຕະພັນຂອງກຸ່ມຈັກສານຫວາຍເຂດຈັດສັນຫາດໝວກ ເປັນຕົ້ນຕັ້ງອີ້ມົນຕໍ່າ, ຕັ້ງອ້ີມົນສູງ, ດັ່ງອີ້ມີບ່ອນອີງ, ຊຸດໂຊພາຫວາຍ, ພາເຂົ້າທັງນ້ອຍ-ໃຫຍ່ ແລະ ອື່ນໆ, ສ່ວນຜະລິດຕະພັນທັກຍູກວາດ ເຂດບ້ານກາງ ໄດ້ແກ່ຍູກວາດ ຍາວ 85 ຊັງຕີແມັດ, ຍູກວາດສັ້ນ 60 ຊັງຕີແມັດ, ຍູປັດໄຍແມງມູມ ແລະ ອື່ນໆ. ເຊິ່ງໄດ້ຈຳໜ່າຍຜະລິດຕະພັນທັງພາຍໃນເມືອງ, ຕ່າງເມືອງ, ຕ່າງແຂວງ ແລະ ຕ່າງປະເທດ ໂດຍມີນັກທຸລະກິດມາຮັບຊື້ຈາກກຸ່ມເພື່ອນໍາໄປຂາຍຕໍ່ຕາມຄວາມຕ້ອງ ການຊົມໃຊ້ຂອງລູກຄ້າ.

     ຜະລິດຕະພັນສ່ວນຫລາຍ ແມ່ນຂາຍໝົດທຸກໆເດືອນ ບາງເດືອນກໍບໍ່ພຽງພໍຕໍ່ກັບຄວາມຕ້ອງການຂອງລູກຄ້າ, ການຜະລິດສ່ວນໃຫຍ່ ແມ່ນນໍ້າໃຊ້ແຮງງານຄົນ, ເຄື່ອງມືປະຖົມປະຖານແບບທຳມະຊາດຍັງຂາດເຄື່ອງມືທີ່ທັນສະໄໝ ເຮັດໃຫ້ຜະລິດຕະພັນອອກມາບໍ່ທັນຕໍ່ຄວາມຕ້ອງການຂອງລູກຄ້າ. ພ້ອມນີ້, ວັດຖຸດິບ ແມ່ນຫາໄດ້ຈາກທຳມະຊາດເຂດໃກ້ຄຽງມີປ່າປ້ອງກັນ, ປ່າຊົມໃຊ້ທີ່ຍັງຮັກສາທຳມະຊາດ ແລະ ປ່າຫວາຍໄວ້ນໍາໃຊ້. ພ້ອມນີ້, ຍັງມີສວນປູກຫວາຍ, ສວນປູກດອກແຂມຂອງປະຊາຊົນ ຢູ່ໃນເຂດໃກ້ຄຽງຕື່ມອີກຈຶ່ງເຮັດໃຫ້ວັດຖຸດິບມີພຽງພໍໃນການຜະລິດສາມາດຕອບສະໜອງຄວາມຕ້ອງການຂອງລູກຄ້າໄດ້  ແລະ ເຮັດໃຫ້ຜະລິດຕະພັນດັ່ງກ່າວໄດ້ຮັບຄວາມນິຍົມຊົມຊອບທັງພາຍໃນ ແລະ ຕ່າງປະເທດນັບມື້ຫລາຍຂຶ້ນ.

    ເມື່ອມໍ່ໆມານີ້ ເມືອງຜາອຸດົມ ແຂວງບໍ່ແກ້ວ ໄດ້ຈັດພິທີເປີດປ້າຍກາໝາຍ ໜຶ່ງເມືອງໜຶ່ງຜະລິດຕະພັນແຫ່ງຊາດ ຕາງໜ້າມອບໃບອະນຸຍາດນໍາໃຊ້ກາໝາຍ ແລະ ປ້າຍໜຶ່ງເມືອງໜຶ່ງຜະລິດຕະພັນແຫ່ງຊາດ ໂດຍທ່ານ ນາງ ສີອຳໄພ ໂສລະຖີ ຮອງຫົວໜ້າພະແນກອຸດສາຫະກຳ ແລະ ການຄ້າແຂວງຕາງໜ້າຮັບໂດຍ ທ່ານ ກາງ ມະນີຫວ່າງ ຮອງເຈົ້າເມືອງຜາອຸດົມ ແລະ ໃນພິທີ, ຜູ້ຕາງໜ້າຈາກກຸ່ມຜະລິດຕະພັນຈັກສານຫວາຍ ແລະ ທັກຍູກວາດ ໄດ້ລາຍງານວ່າ: ການມອບປ້າຍສິນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດໃຫ້ກັບກຸ່ມຜະລິດຕະພັນ ຈັກສານຫວາຍ ເຂດຈັດສັນ ຫາດໝວກ ແລະ ກຸ່ມຜະລິດຕະພັນ ທັກຍູກວາດ ເຂດບ້ານກາງ ຕາງໜ້າມອບໂດຍ ທ່ານ ຈັນທອນ ພົນທະລາ ເຈົ້າເມືອງຜາອຸດົມ ແລະ ຕາງໜ້າຮັບໂດຍກຸ່ມຜະລິດສິນຄ້າ.

ຂ່າວ-ພາບ: ພອນສະຫວັນ ມະນີສີ

KPL