*ທ່ານ ສາຍທອງ ໄຊຍະວົງ, ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15, ຮອງປະທານສະພາປະຊາຊົນແຂວງຈໍາປາສັກ​ໃຫ້​ຮູ້​ວ່າ ​ໃນ​ໄລ​ຍະ 1 ປີຜ່ານມາ ນັບແຕ່ກອງປະຊຸມສະໄໝສາມັນເທື່ອທີ 7 ມາຮອດ ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ IX ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ແຂວງຈໍາປາສັກ ພວກເຮົາໄດ້ເອົາໃຈໃສ່ໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ ຕາມທີ່ກົດໝາຍກໍານົດໄວ້ ແລະ ສຸມໃສ່ການລົງພົບປະຜູ້ ມີສິດເລືອກຕັ້ງ ເພື່ອນໍາເອົາມະຕິກອງປະຊຸມຂອງສະພາແຫ່ງຊາດ, ສະພາປະຊາຊົນແຂວງ ແລະ ມະຕິກອງປະຊຸມຂອງຄະນະປະຈໍາສະພາແຫ່ງຊາດ, ຄະນະປະຈໍາປະຊາຊົນແຂວງ ແລະ ມະຕິ XI ຂອງສູນກາງພັກ, ມະຕິກອງປະຊຸມໃຫຍ່ຄັ້ງທີ VIII ຂອງຄະນະບໍລິຫານງານພັກແຂວງຈໍາປາສັກ ທີ່ວາງອອກໃນແຕ່ລະໄລຍະ ໄປເຜີຍແຜ່ໃຫ້ປະຊາຊົນໄດ້ຮັບຮູ້ເຂົ້າໃຈ.

     ນອກນັ້ນ, ຍັງໄດ້ເອົາໃຈໃສ່ຈັດຕັ້ງຜັນຂະຫຍາຍ ການຈັດຕັ້ງປະຕິບັດວຽກງານຂອງຄະນະສະມາຊິກສະພາແຫ່ງຊາດ ປະຈໍາເຂດ ເລືອກຕັ້ງທີ 15 ກໍຄືວຽກງານຂອງສະພາປະຊາຊົນ ແຂວງຈໍາປາສັກ ຜ່ານໂທລະພາບ, ວິທະຍຸ, ໜັງສືພີມ, ຜ່ານ facebook ຂ່າວສະພາປະຊາຊົນແຂວງຈໍາປາສັກ ແລະ ລາຍການຜູ້ແທນປະຊາຊົນຂອງແຂວງຈໍາປາສັກ. ຜ່ານການເຄື່ອນໄຫວຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ສາມາດສັງລວມໄດ້ວ່າການປະກອບສ່ວນຂອງຄະນະສະມາຊິກສະພາແຫ່ງຊາດ ແລະ ສະພາປະຊາຊົນແຂວງໃນຖານະເປັນຕົວແທນແຫ່ງສິດ ອໍານາດຂອງປະຊາຊົນບັນດາເຜົ່າໃນໄລຍະແຕ່ກອງປະຊຸມສະໄຫມສາມັນເທື່ອທີ 7 ຫາ ກອງປະຊຸມສະໄໝ ສາມັນເທື່ອທີ 8 ຂອງ ສະພາແຫ່ງຊາດ ຊຸດທີ IX ໄດ້ດັ່ງນີ້: 1) ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ໄດ້ປະສານສົມທົບກັບຄະນະສະມາຊິກ ສະພາປະຊາຊົນແຂວງປະຈໍາເຂດເລືອກຕັ້ງເມືອງ, ນະຄອນ ໃນການລົງເຄື່ອນໄຫວເຜີຍແຜ່ຜົນສໍາເລັດກອງ ປະຊຸມສະໄໝສາມັນເທື່ອທີ 06, 07 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຈໍາປາສັກ ຊຸດ ທີ II ສາມາດເຄື່ອນໄຫວໄດ້ທັງໝົດ 27 ຈຸ, ມີ 185 ຈຸດ, 166 ບ້ານ, 21 ກົມກອງ, 2 ສະຖາບັນການສຶກສາ ມີຜູ້ເຂົ້າຮ່ວມຮັບຟັງທັງໝົດ 18.402 ເທື່ອຄົນ, ຍິງ 7.699 ເທື່ອຄົນ ການລົງເຄື່ອນໄຫວໃນຄັ້ງນີ້ ໄດ້ຮັບຄໍາສະເໜີຂອງຜູ້ມີສິດເລືອກຕັ້ງ ທັງຫມົດ 617 ບັນຫາ ຕໍ່ຄໍາສະເໜີດັ່ງກ່າວ ສະມາຊິກສະພາແຫ່ງຊາດໄດ້ສົມທົບກັບສະມາຊິກສະພາປະຊາຊົນແຂວງ, ອໍານາດການປົກຄອງເມືອງ ອະທິບາຍຕອບແກ້ໃຫ້ພໍ່ແມ່ປະຊາຊົນຮັບຮູ້ເຂົ້າໃຈ ແລະ ມີຄວາມເປັນເອກະພາບແລ້ວ ຈໍານວນ 272 ບັນຫາ, ຮັບມາຊຸກຍູ້ພາກສ່ວນທີກ່ຽວຂ້ອງຂັ້ນແຂວງ ແກ້ໄຂຈໍານວນ 134 ບັນຫາ, ຕິດພັນກັບສະພາແຫ່ງຊາດ 4 ບັນຫາ, ໄປພ້ອມກັບການເຄື່ອນໄຫວໃນຄັ້ງນີ້ ຍັງໄດ້ລະດົມການຊ່ວຍເຫລືອດ້ານທຶນຮອນ ແລະ ວັດຖຸເຄື່ອງໃຊ້ຕ່າງໆໃຫ້ແກ່ປະຊາຊົນ ລວມມູນຄ່າທັງຫມົດ 141 ລ້ານກວ່າກີບ; 2) ເອົາໃຈໃສ່ຊີ້ນໍາຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງ ໃນການຜັນຂະຫຍາຍ ແລະ ຈັດຕັ້ງປະຕິບັດແຜນການເຄື່ອນໄຫວຂອງສະພາປະຊາຊົນແຂວງ ໃນເຂດເລືອກຕັ້ງຂອງຕົນ ເຊິ່ງໄດ້ຮັບຜົນສໍາເລັດຫລາຍດ້ານ ເປັນຕົ້ນ: ຈັດຕັ້ງການຄົ້ນຄວ້າ, ປະກອບຄໍາເຫັນຕໍ່ຮ່າງກົດໝາຍທີ່ສະພາປະຊາຊົນແຂວງສົ່ງໃຫ້; ເຂົ້າຮ່ວມຕິດຕາມກວດກາຕາມການຈັດຕັ້ງປະຕິບັດມະຕິຂອງຄະນະປະຈໍາສະພາແຫ່ງຊາດ, ມະຕິຂອງຄະນະປະຈໍາສະພາ ປະຊາຊົນແຂວງຈໍາປາສັກ, ບັນດາຄະນະກໍາມະການ; ເກັບກໍາຂໍ້ມູນ, ບັນຫາພົ້ນເດັ່ນ ເພື່ອປະກອບຄໍາເຫັນ ແລະ ຕັ້ງເປັນຄໍາຊັກຖາມ ໃນກອງປະຊຸມສະພາປະຊາຊົນແຂວງ ແລະ ຕິດຕາມກວດກາຕາມຄໍາສະເໜີຂອງປະຊາຊົນບັນດາເຜົ່າ ຢູ່ເຂດເລືອກຕັ້ງ ເພື່ອຊຸກຍູ້ໃຫ້ພາກສ່ວນທີ່ກ່ຽວຂ້ອງພິຈາລະນາ, ແກ້ໄຂ ຕາມພາລະບົດບາດ ແລະ ຕິດຕາມກວດກາວຽກງານຮີບດ່ວນ, ວຽກງານສະເພາະກິດຂອງສະພາປະຊາຊົນແຂວງ. ສໍາລັບ ວຽກງານ​ໃນຕໍ່ໜ້າ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ໄດ້ມີຄວາມພະຍາຍາມສູງໃນການຕິດຕາມ, ຊຸກຍູ້ ລັດຖະບານ, ອົງການປົກຄອງຂັ້ນທ້ອງຖິ່ນ ສຸມໃສ່ການແກ້ ໄຂບັນຫາເຄັ່ງຮ້ອນດ້ານເສດຖະກິດ ແຕ່ເຫັນວ່າບັນຫາດັ່ງກ່າວ, ກໍ່ຍັງເປັນບັນຫາທີ່ຍັງຄົງຄ້າງ ເປັນຕົ້ນ ກໍ່ຄືບັນຫາການອ່ອນຄ່າຂອງເງິນກີບ, ອັດຕາເງິນເຟີ້, ລາຄາສິນຄ້າເພີ່ມສູງຂຶ້ນ, ຄວາມຮັບຜິດຊອບຂອງອົງການ ປົກຄອງຂັ້ນສູນກາງ-ທ້ອງຖິ່ນໃນການປະຕິບັດມະຕິຂອງສະພາແຫ່ງຊາດ, ສະພາປະຊາຊົນແຂວງ ຍັງບໍ່ທັນ ປະຕິບັດຕາມຫລັກການໂປ່ງໃສ, ເດັດຂາດ ແລະ ເປັນມືອາຊີບຢ່າງມີປະສິດທິພາບແລະ ປະສິດທິຜົນ, ຍັງບໍ່ຖືເອົາ ຜົນສໍາເລັດຂອງການຈັດຕັ້ງປະຕິບັດວຽກງານເປັນຕົວຊີ້ວັດການປະເມີນຜົນຄວາມຮັບຜິດຊອບທາງດ້ານຫນ້າທີ່ ການເມືອງ, ການແບ່ງຂັ້ນຄຸ້ມຄອງ ລະຫວ່າງສູນກາງ ແລະທ້ອງຖິ່ນ ກ່ຽວກັບການສ້າງແຜນ, ການຈັດສັນທຶນ ແລະການປະຕິບັດໂຄງການລົງທຶນຂອງລັດບໍ່ທັນສອດຄ່ອງຕາມກົດໝາຍ, ການຫັນເປັນທັນສະໄຫມໃນການ ເກັບລາຍຮັບຍັງບໍ່ທັນກ້ວາງຂວາງ ແລະທົ່ວເຖິງ, ການແກ້ໄຂຜົນການກວດສອບ-ກວດກາຍັງບໍ່ທັນມີຄວາມ ຄືບຫນ້າເທົ່າທີ່ຄວນ ແລະການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນແຂວງ ຍັງບໍ່ສາມາດ ປະຕິບັດໄດ້ຢ່າງຄົບຖ້ວນຕາມພາລະບົດບາດທີ່ໄດ້ກໍານົດໄວ້ໃນກົດໝາຍ.

    ຕໍ່ກັບເນື້ອໃນທີ່ກ່າວມາຂ້າງເທິງນັ້ນ, ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ສາມາດ ຖອດຖອນບົດຮຽນ ແລະເຫັນວ່າຈະໄດ້ສືບຕໍ່ ແລະ ເພີ່ມທະວີໃນການປະສານສົມທົບກັບສະພາແຫ່ງຊາດ ຊຸກຍູ້ ແລະ ຕິດຕາມອົງການປົກຄອງແຂວງ, ເມືອງ, ນະຄອນ ແລະ ບັນດາອົງການຈັດຕັ້ງທຸກຂັ້ນ ເອົາໃຈໃສ່ແກ້ໄຂບັນຫາຕ່າງໆທີ່ເກີດຂຶ້ນ ໂດຍສະເພາະການແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ ໃຫ້ກັບມາສູ່ສະພາວະປົກກະຕິ, ພ້ອມທັງກະຕຸກຊຸກຍູ້ອົງການປົກຄອງ ໃນການຈັດຕັ້ງປະຕິບັດແຜນພັດທະນາເສດຖະກິດ - ສັງຄົມ, ແຜນງົບປະມານ ແລະ ການຄົ້ນຄວ້າສ້າງຖານແຫລ່ງລາຍຮັບໃໝ່ ຂອງແຂວງຈໍາປາສັກ ເພື່ອຮັບປະກັນດ້ານງົບປະມານ ແລະ ສືບຕໍ່ຈັດຕັ້ງປະຕິບັດຜັນຂະຫຍາຍ 2 ເນື້ອໃນວາລະແຫ່ງຊາດ ໂດຍສະ​ເພາະ 5 ວຽກຈຸດສຸມ ​ໃນ​ການ​ແກ້​ໄຂ​ບັນຫາ​ເສດຖະກິດການ​ເງິນ ​ແລະ ​ເພີ່ມ​ທະວີ​ຄວາມ​ຮັບຜິດຊອບ​ ​ໃນ​ການ​ແກ້​ໄຂ​ບັນຍາ​ເສບ​ຕິດ​ໃຫ້​ມີ​ຄວາມ​ເຂັ້ມງວດ.