ຂປລ. ໃນປີ 2024 ນີ້, ແຂວງສະຫວັນນະເຂດ ໄດ້ກະກຽມ ແລະ ບັນລຸໄດ້ຫລາຍຄາດໝາຍສຳຄັນ ເປັນຕົ້ນ ການພັດທະນາ ເສດຖະກິດ-ສັງຄົມ ຂອງແຂວງ ສາມາດບັນລຸໄດ້ 7,9% ເຊິ່ງຖືວ່າເກີນແຜນການທີ່ວາງໄວ້, ງົບປະມານເກີນແຜນກວ່າ 50%. ສ່ວນການຜະລິດທີ່ພົ້ນເດັ່ນ ກວ່າໝູ່ແມ່ນການຜະລິດເຂົ້າ ບັນລຸ 884.000 ໂຕນ, ມັນຕົ້ນເກັບກູ້ໄດ້ 629.000 ໂຕນ, ອ້ອຍເກັບກູ້ໄດ້ 48.000 ໂຕນ, ຢາງພາລາບັນລຸ 35.000 ໂຕນ ເຊິ່ງເປັນປີທີ່ບັນລຸການຜະລິດສູງ. ຂະນະດຽວກັນ, ກໍສາມາດຜະລິດສິນຄ້າທົດແທນ ການນໍາເຂົ້າໄດ້ ຫລາຍປະເພດ ເປັນຕົ້ນ ຊີ້ນ, ປາ ແລະ ໄຂ່ ເຊິ່ງເປັນຂະບວນການໃຫຍ່ ສໍາລັບການຜະລິດຂອງແຂວງ ​ໂດຍຂໍ້ມູນດັ່ງກ່າວ, ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ໄດ້ໃຫ້ສໍາພາດ ຕໍ່ນັກຂ່າວສໍານັກ ຂ່າວສານປະເທດລາວ ເມື່ອບໍ່ດົນມານີ້.

ທ່ານເຈົ້າແຂວງສະຫວັນນະເຂດ ຍັງໃຫ້ຮູ້ອີກວ່າ: ນອກຈາກນັ້ນ, ແຂວງສະຫວັນນະເຂດ ພວກເຮົາຍັງໄດ້ສຸມໃສ່ແກ້ໄຂ ຄວາມທຸກຍາກຂອງປະຊາຊົນ ຢູ່ເຂດຫ່າງໄກສອກຫລີກ, ປີນີ້ໄດ້ສຸມໃສ່ 3 ຈຸດຄື: ກຸ່ມບ້ານຈຽງຕູບ ເມືອງເຊໂປນ ມີ 6 ບ້ານ 12 ຄຸ້ມ ໂດຍໄດ້ສ້າງເສັ້ນທາງທຽວ ໄດ້ທຸກລະດູ, ບຸກ ເບີກເນື້ອທີ່ສ່ວນ ແລະ ເນື້ອນທີ່ນາໃຫ້ປະຊາຊົນ, ສ້າງສຸກສາລາ, ສ້າງໂຮງຮຽນກິນນອນ ມ1 ແລະ ມ2 ແນໃສ່ແກ້ໄຂປະຊາຊົນ ທີ່ບໍ່ຮູ້ໜັງສື ແລະ ບໍ່ຮູ້ພາສາລາວ; ສຸມໃສ່ແກ້ເຂດບ້ານຄໍາປາແໜ ເມືອງຊົນນະບູລີ (ແກ້ໄຂບັນຫາຄົນຂໍທານ) ແລະ ສຸມໃສ່ແກ້ໄຂ ຢູ່ເຂດຕັງອາໄລ-ລະແບງ ເມືອງນອງ ເຊິ່ງເປັນບ້ານວິລະຊົນ. ໃນປີ 2024 ນີ້, 3 ຈຸດດັ່ງກ່າວ ຖືວ່າມີການຫັນປ່ຽນໃໝ່ ໄດ້ສ້າງຊົນລະປະທານ, ເອົາໄຟຟ້າເຂົ້າ, ສ້າງສູນການຜະລິດ ເພື່ອໃຫ້ປະຊາຊົນໄດ້ທໍາມາຫາກິນ.

ສໍາລັບ ການກະກຽມໃຫ້ແກ່ ການດຳເນີນກອງປະຊຸມໃຫຍ່ 3 ຂັ້ນ, ຢູ່ບັນດາເມືອງໃນທົ່ວແຂວງ ແມ່ນສໍາເລັດການດຳເນີນກອງປະຊຸມໃຫຍ່ ຂອງຮາກຖານຕ່າງໆ, ປັດຈຸບັນແມ່ນ ກໍາລັງກະກຽມ ດຳເນີນກອງປະຊຸມໃຫຍ່ ຢູ່ 5 ເມືອງ ເຊິ່ງເມືອງທໍາອິດ ແມ່ນເມືອງວິລະບູລີ ໂດຍສໍາເລັດຂັ້ນຕອນການກະ ກຽມຕ່າງໆ ແລະ ຈະຈັດຂຶ້ນໃນວັນທີ 6-7 ມັງກອນ 2025, ຈາກນັ້ນຈະດຳເນີນຢູ່ ເມືອງຕໍ່ໆໄປຕາມລໍາດັບ, ແຂວງສະຫວັນນະເຂດມີ 14 ເມືອງ, 1 ນະຄອນ ແລະ ຄະນະພັກ 2 ກອງບັນຊາການ ປກຊ-ປກສ ຖືວ່າເປັນແຂວງທີ່ມີຈໍາເມືອງຫລາຍ ເຊິ່ງໂດຍລວມແລ້ວ ການກະກຽມຖືວ່າສໍາເລັດໂດຍພື້ນຖານ. ສ່ວນການກະກຽມດໍາເນີນ ກອງປະຊຸມໃຫຍ່ຂັ້ນແຂວງ ແມ່ນໄດ້ສໍາເລັດການຮ່າງບົດລາຍງານການເມືອງ, ຮ່າງແຜນພັດ ທະນາ ເສດຖະກິດ-ສັງຄົມຂອງແຂວງ 5 ປີ ຄັ້ງທີ 10.

ສ່ວນການກະກຽມໃຫ້ແກ່ ການສະເຫລີມສະຫລອງ 3 ວັນປະຫວັດສາດໃນປີ 2025 ທີ່ຈະມາເຖິງ ຄື: ວັນສ້າງຕັ້ງພັກປະຊາຊົນ ປະຕິວັດລາວ ຄົຍຮອບ 70 ປີ, ວັນສະຖາປະນາ ສປປ ລາວ ຄົບຮອບ 50 ປີ ແລະ ວັນເກີດປະທານໄກສອນ ພົມວິຫານ ຄົບຮອບ 105 ປີ ສະເພາະແຂວງສະຫວັນະເຂດ ແມ່ນຈະໄດ້ກະກຽມປະຫວັດການເຄື່ອນໄຫວ ຄົບຮອບ 70 ປີ ຂອງພັກ ໂດຍສະເພາະ ຄະນະພັກແຂວງສະຫວັນນະເຂດ ນັບແຕ່ກອງປະຊຸມໃຫຍ່ຄັ້ງທີ 1 ເຖິງປັດຈຸບັນ; ເກັບກໍາຂໍ້ມູນການພັດທະນາ ແຂວງສະຫວັນນະເຂດ 50 ປີຜ່ານມາ ເພື່ອສົມທົບ ໃສ່ກັບຂັ້ນສູນກາງ. ສໍາລັບ ການສະເຫລີມສະຫລອງ ວັນເກີດປະທານ ໄກສອນ ພົມວິຫານ ຄົບຮອບ 105 ປີ ທາງແຂວງກໍໄດ້ມີການກະກຽມ ເປັນຕົ້ນ ຢູ່ບ້ານນາເຊັງ ເຊິ່ງເປັນບ້ານເກີດ ຂອງປະທານໄກສອນ ພົມວິຫານ ໄດ້ມີການສ້າງເສັ້ນ ທາງເບຕົງເຂົ້າຫາບ້ານ, ພ້ອມນີ້ ຈະໄດ້ເຮັດສວນອະນຸສອນສະຖານ ໂດຍສ້າງເຮືອນຈໍາລອງ, ຖຽງນາທີ່ເພິ່ນເກີດ ​ແລະ ບ່ອນຢູ່ກໍາ ເພື່ອໃນອະນາຄົດໃຫ້ ລູກຫລານຄົນຮຸ່ນໃໝ່ ໄດ້ມາຮຽນຮູ້ຊີວິດ ​ແລະ ການ​ເຄື່ອນ​ໄຫວ ກໍ​ຄື ຄຸນສົມບັດສິນທໍາປະຕິວັດ ຂອງ ປະທານໄກສອນ ພົມວິຫານ ວ່າເພິ່ນເກີດແນວໃດ, ຢູ່ແນວໃດ ແລະ ວິຖີການດຳລົງຊີວິດຂອງເພິ່ນ ເປັນແນວໃດ ແລະ ອື່ນໆ.

ຂ່າວ: ຈັນທະ​ລອນ

ພາບ: ອ່າຍຄໍາ

KPL