ຂປລ. ໃນວັນ​ທີ 5 ທັນວາ​ 2024 ນີ້, ບໍລິສັດ​ ​ສາຍ​ສົ່ງ​ໄຟຟ້າແຫ່ງ​ຊາດ​ລາວ ​ຈຳກັດ​ (EDL-T) ໄດ້ນຳເອົາອຸປະກອນ ການຮຽນ-ການສອນ ເປັນຕົ້ນ ປຶ້ມ, ຊັ້ນວາງ​ປຶ້ມ, ບິກ, ສໍ, ສໍສີ, ​ອຸປະກອນ​ກິລາ, ອາຫານ ​ແລະ ​ອຸປະກອນ​ການ​ສຶກສາ​ອື່ນໆ ລວມມູນຄ່າ 7 ພັນກວ່າ​ໂດ​ລາ​ສະຫະລັດ ​ມາມອບໃຫ້ສູນ​ການ​ສຶກສາ “ສູນມື​ແຫ່ງ​ຄວາມ​ຫວັງ” ເພື່ອຊຸກຍູ້ສົ່ງເສີມນັກຮຽນ ທີ່ບົກພ່ອງທາງການໄດ້ຍິນ (ພິການທາງຫູ) ຕາງໜ້າມອບໂດຍ ທ່ານ ລີ່ຈິງລູ່ (LI JINGRU) ຜູ້ອຳນວຍການ ບໍລິສັດສາຍ​ສົ່ງ​ ໄຟຟ້າແຫ່ງ​ຊາດ​ລາວ​ ຈຳກັດ  ແລະ ຮັບໂດຍ  ທ່ານ ນາງ ສຸພາພອນ ເຮືອງລິດ ຜູ້ອຳນວຍການສູນ​ການ​ສຶກສາ “ສູນມື​ແຫ່ງ​ຄວາມ​ຫວັງ” ໂດຍມີພາກສ່ວນກ່ຽວຂ້ອງ ແລະ ນ້ອງນັກຮຽນ ເຂົ້າຮ່ວມ.

ໂອກາດດັ່ງກ່າວ, ທ່ານ ນາງ ສຸພາພອນ ເຮືອງລິດ ໄດ້ສະແດງຄວາມຂອບໃຈ ຢ່າງຈິງໃຈມາຍັງ ບໍລິສັດສາຍສົ່ງໄຟຟ້າແຫ່ງຊາດລາວ ຈໍາກັດ ທີ່ໄດ້ເຫັນໄດ້ຄວາມສຳຄັນ ນຳເອົາອຸປະກອນ ການຮຽນ-ການສອນ ມາມອບໃຫ້ໃນຄັ້ງນີ້, ພ້ອມທັງຢືນຢັນວ່າ ຈະນຳເອົາອຸປະກອນ ທີ່ໄດ້ຮັບ ໄປໝູນໃຊ້ໃຫ້ເກີດຜົນປະໂຫຍດສູງສຸດ ກໍຄື ນຳໃຊ້ເຂົ້າໃນການຮຽນ-ການສອນ ຢູ່ພາຍໃນສູນ​ການ​ສຶກສາ ໃຫ້ມີປະສິດທິພາບ-ປະສິດທິຜົນ ຂຶ້ນເລື້ອຍໆ.

ສູນການສຶກສາ "ສູນມືແຫ່ງຄວາມຫວັງ" ຕັ້ງຢູ່ບ້ານໜອງບົວ ເມືອງໄຊທານີ ນະຄອນຫລວງວຽງຈັນ, ເປັນສະຖາບັນການສຶກສາ ເອກະຊົນແຫ່ງດຽວ ໃນນະຄອນຫລວງວຽງຈັນ ສຳລັບເດັກພິການ ທາງການໄດ້ຍິນ. ປັດຈຸບັນ, ສູນດັ່ງກ່າວ, ມີຄູສອນປະມານ 10 ຄົນ ແລະ ເດັກນ້ອຍພິການທາງຫູ 25 ຄົນ ເຊິ່ງມີອາຍຸແຕ່ 6-12 ປີ ແລະ ສ່ວນຫລາຍແມ່ນເດັກກຳພ້າ ທີ່ຖືກປະຖິ້ມຍ້ອນຄວາມພິການທາງຫູ.

ທ່ານ ລີ່ຈິງລູ່ ໄດ້ໃຫ້ຮູ້ວ່າ: ການຊ່ວຍເຫລືອຄັ້ງນີ້, ຈະສາມາດປະກອບສ່ວນ ເຂົ້າໃນການປັບປຸງຊີວິດ ຂອງນ້ອງນັກຮຽນ, ເຮັດໃຫ້ສາມາດອາໄສ ຢູ່ໃນສັງຄົມໄດ້ຢ່າງປົກກະຕິ ແລະ ປຸກອາລົມ ທາງດ້ານສິລະປະໃຫ້ນ້ອງນັກ ຮຽນ ແລະ ປູກຝັງຄວາມອົດທົນ ໃຫ້ມີຄວາມສຸກໃນຊີວິດ. ພ້ອມນີ້, ຍັງເປັນການ ປຸກລະດົມຄວາມ​ເອົາໃຈໃສ່ ແລະ ສະໜັບສະໜູນ ກຸ່ມການສຶກສາພິເສດ, ຮ່ວມກັນສ້າງສະພາບແວດລ້ອມ ທີ່ເຕັມໄປດ້ວຍການຮຽນຮູ້ ແລະ ການດຳລົງຊີວິດທີ່ມີຄວາມສາມັກຄີ, ມີຄວາມຮັກແພງກັບ ບັນດານ້ອງນ້ອຍນັກຮຽນ. ບໍລິສັດສາຍສົ່ງໄຟຟ້າ ແຫ່ງຊາດລາວ ຈຳກັດ ຈະຕັ້ງໜ້າສະແຫວງຫາ ກາລະໂອກາດການຮ່ວມມື, ເຕົ້າໂຮມຄວາມສາມັກຄີກັນຫລາຍຂຶ້ນ ແລະ ຮ່ວມກັນປະກອບສ່ວນເຂົ້າໃນ ການພັດທະນາການສຶກສາຢູ່ລາວ ແລະ ປັບປຸງຊີວິດການເປັນຢູ່ຂອງສັງຄົມ ແລະ ປະຊາ ຊົນໃຫ້ດີຂຶ້ນ.

ບໍລິສັດສາຍສົ່ງໄຟຟ້າແຫ່ງຊາດລາວ ຈຳກັດ ສ້າງຕັ້ງຢູ່ທີ່ປະເທດລາວ ໂດຍການຮ່ວມທຶນລະຫວ່າງ ບໍລິສັດຕ່າຂ່າຍໄຟຟ້າພາກໃຕ້ຈີນ ແມ່ນ້ຳຂອງ-ແມ່ນ້ຳລ້ານຊ້າງ ພະລັງງານສາກົນ ຈຳກັດ ແລະ ບໍລິສັດລັດວິສາຫະກິດໄຟຟ້າລາວ ພາຍໃຕ້ການຊີ້ນຳ ແລະ ຕິດຕາມກວດກາຂອງລັດຖະບານລາວ, ໂດຍ EDL-T ເປັນຜູ້ຮັບຜິດຊອບໃນການລົງທຶນ, ກໍ່ສ້າງ ແລະ ດຳເນີນງານ ສາຍສົ່ງໄຟຟ້າຫລັກ 230 kV ຂຶ້ນໄປທີ່ມີຢູ່ແລ້ວ ແລະ ການກໍ່ສ້າງໃໝ່ໃນລາວ ເຊິ່ງລວມເຖິງຕາຂ່າຍສາຍສົ່ງຜ່ານແດນ. EDL-T ແມ່ນລວມຢູ່ໃນ "ຖະແຫລງການຮ່ວມຂອງ ສາທາລະນະລັດ ປະຊາຊົນຈີນ ແລະ ສາທາລະນະລັດ ປະຊາທິປະໄຕປະຊາຊົນລາວ".

ພາບ: ຂັນໄຊ

KPL