ຂປລ
ຂປລ. ສະມາຄົມນັກຂ່າວແຫ່ງ ສປປ ລາວ ຮ່ວມກັບ ອົງການແຄຣ໌ນາໆຊາດ ປະຈໍາ ສປປ ລາວ ນໍາໂດຍ ທ່ານ ນາງ ບົວຄໍາ ດວງປັນຍາ ຫົວໜ້າໂຄງການ ແກມຊິວ (GAMCIL), ອົງການແຄຣ໌ ນາໆຊາດ ປະຈໍາ ສປປ ລາວ ພ້ອມຄະນະ ໄດ້ນໍາພາສື່ມວນຊົນທັງສູນກາງ ແລະ ທ້ອງຖິ່ນ ທັດສະນະສຶກສາ ແລະ ຢ້ຽມຢາມ ກິດຈະກຳຕ່າງໆຂອງໂຄງການ ໃນລະຫວ່າງ ວັນທີ 3-6 ທັນວາ ທີ່ເມືອງຂວາ ແຂວງຜົ້ງສາລີ
ຂປລ. ສະມາຄົມນັກຂ່າວແຫ່ງ ສປປ ລາວ ຮ່ວມກັບ ອົງການແຄຣ໌ນາໆຊາດ ປະຈໍາ ສປປ ລາວ ນໍາໂດຍ ທ່ານ ນາງ ບົວຄໍາ ດວງປັນຍາ ຫົວໜ້າໂຄງການ ແກມຊິວ (GAMCIL), ອົງການແຄຣ໌ ນາໆຊາດ ປະຈໍາ ສປປ ລາວ ພ້ອມຄະນະ ໄດ້ນໍາພາສື່ມວນຊົນທັງສູນກາງ ແລະ ທ້ອງຖິ່ນ ທັດສະນະສຶກສາ ແລະ ຢ້ຽມຢາມ ກິດຈະກຳຕ່າງໆຂອງໂຄງການ ໃນລະຫວ່າງວັນທີ 3-6 ທັນວາ ທີ່ເມືອງຂວາ ແຂວງຜົ້ງສາລີ ພາຍໃຕ້ໂຄງການສ້າງຄວາມເຂັ້ມແຂງໃຫ້ແກ່ສື່ມວນຊົນ ໂດຍການມີສ່ວນຮ່ວມ ຂອງອົງການຈັດຕັ້ງມະຫາຊົນ ແລະ ອົງການຈັດຕັ້ງທາງສັງຄົມ ເພື່ອພັດທະນາສີຂຽວໃນ ສປປ ລາວ ໂດຍໄດ້ຮັບການສະໜັບສະໜູນ ຈາກສະຫະພາບເອີຣົບ.
ໂອກາດທັດສະນະສຶກສາ ຄັ້ງນີ້, ບັນດາສື່ມວນຊົນໄດ້ເຂົ້າພົບປະ ພະນັກງານອົງການແຄຣ໌ນາໆຊາດ ປະຈໍາເມືອງຂວາ ເພື່ອຮັບຟັງການລາຍງານຫຍໍ້ ກ່ຽວກັບການປະຕິບັດໂຄງການ, ຈາກນັ້ນໄປຢ້ຽມ ຢາມກິດຈະກໍາການສ້າງຄວາມເຂັ້ມແຂງ ໃຫ້ແມ່ຍິງຊົນເຜົ່າ ເພື່ອປັບໂຕເຂົ້າກັບການປ່ຽນແປງ ຂອງສະພາບດິນຟ້າ ອາກາດແບບຍືນຍົງ (WECR), ກິດຈະກຳຄໍ້າສະບຽງອາຫານ (KFSP), ຢ້ຽມຢາມ, ສໍາພາດຄອບຄົວຕົວແບບກິດຈະກໍາ ປູກຜັກສວນຄົວເຮືອນຮົ່ມ, ຄອບຄົວຕົວແບບລ້ຽງເຜິ້ງ ທີ່ບ້ານກຸງເກືອຍ, ໂຄງການນໍ້າລິນທີ່ບ້ານໃໝ່ ແລະ ອື່ນໆ. ພ້ອມນີ້, ທີມສື່ມວນຊົນຍັງຈະໄດ້ເດີນທາງ ໄປທັດສະນະ ແລະ ຢ້ຽມຢາມວັດ ພະເຈົ້າສິງຄໍາ ທີ່ເມືອງຫລາ, ທ່ຽວຊົມສະຖານທີ່ທ່ອງທ່ຽວທໍາມະຊາດນໍ້າກັດຢໍລະປາ ເມືອງ ໄຊ ແຂວງ ອຸດົມໄຊ. ຫລັງຈາກນັ້ນ, ຈະໄດ້ສະຫລຸບ, ຖອດຖອນບົດຮຽນຮ່ວມກັນ.
ການທັດສະນະສຶກສາຄັ້ງນີ້, ສື່ມວນຊົນໄດ້ເກັບກຳຮູບພາບ, ວິດີໂອ ແລະ ສຳພາດພາກສ່ວນຕ່າງໆ ເພື່ອເກັບກໍ້າຂໍ້ມູນມາຂຽນຂ່າວ, ຂຽນບົດ ລົງເຜີຍແຜ່ໃນຜະລິດຕະພັນຕ່າງໆ ຂອງຕົນ ແລະ ຍັງຈະໄດ້ສົ່ງ ໃຫ້ທາງໂຄງການ ເປັນຜົນງານນໍາໄປຄັດເລືອກ ເຂົ້າຮ່ວມກິດຈະກໍາຂອງໂຄງການໃນຂັ້ນຕໍ່ໄປ.
ຂ່າວ-ພາບ: ເກດສະໜາ
KPL
