*ບໍ່ວ່າຍຸກສະໃໝໃດ ການສຶກສາຖືວ່າເປັນສິ່ງທີ່ສຳຄັນ ແລະ ຈຳເປັນຢ່າງຍິ່ງສຳລັບທຸກໆຄົນ ເພາະມັນຊ່ວຍໃຫ້ຄົນເຮົາມີຄວາມຮູ້ຄວາມສາມາດ, ກາຍເປັນຊັບພະຍາກອນທີ່ສຳຄັນໃນການສ້າງສາພັດທະນາປະເທດຊາດ ແລະ ກາຍເປັນພົນລະເມືອງດີຂອງປະເທດນັ້ນໆ. ໃນປັດຈຸບັນ, ສປຈີນ ໄດ້ກາຍເປັນຈຸດໝາຍໜຶ່ງຂອງນັກສຶກສາລາວທີ່ຕ້ອງການຢາກຈະໄປຮຽນເພື່ອຕໍ່ຍອດການສຶກສາຂອງຕົນ ສ່ວນໜຶ່ງກໍຍ້ອນວ່າ ສປປ ລາວ ມີນັກທ່ອງທ່ຽວຈາກ ສປ ຈີນ ເຂົ້າມາທ່ຽວເປັນຈຳນວນຫລວງຫລາຍ, ມີນັກທຸລະກິດຈີນຈຳນວນໜຶ່ງເຂົ້າມາລົງທຶນ ແລະ ມາເຮັດທຸລະກິດຢູ່ລາວນັບມື້ນັບຫລາຍ.  ສຳລັບຢູ່ ສປປ ລາວ ກໍມີໂຮງຮຽນສອນພາສາຈີນ ແລະ ບາງໂຮງຮຽນກໍມີຊ່ົວໂມງຮຽນພາສາຈີນນຳ ສະເພາະຢູ່ມະຫາວິທະຍາໄລແຫ່ງຊາດພາສາຈີນ ໄດ້ກາຍເປັນວິຊາທີ່ເປັນທີ່ນິຍົມສູງໃນໝູ່ນັກສຶກສາໃນສີ່ຫ້າປີຜ່ານມາ.

    ມະຫາວິທະຍາໄລພູເອີ (Pu’er University) ແຂວງຢຸນນານ ເປັນອີກສະຖາບັນການສຶກສາໜຶ່ງທີ່ນ້ອງໆນັກສຶກສາລາວຢາກເຂົ້າໄປສຶກສາຫາຄວາມຮູ້ໃສ່ຕົນ, ທັງນີ້ກໍຍ້ອນວ່າມະຫາວິທະຍາໄລພູເອີ ຕັ້ງຢູ່ບໍ່ໄກຈາກ ສປປ ລາວ ສະດວກໃນການໄປມາຫາສູ່ກັນລະຫວ່າງພໍ່ແມ່ຜູ້ປົກຄອງທີ່ຢາກໄປຢ້ຽມຢາມລູກຫລານ ຫລື ນັກສຶກສາກັບມາຢຽມບ້ານ, ຖ້າເດີນທາງດ້ວຍເສັ້ນທາງລົດໄຟ ລາວ-ຈີນ ຈາກນະຄອນຫລວງວຽງຈັນ ຫາ ນະຄອນພູເອີ ແຂວງຢຸນນານ ໃຊ້ເວລາປະມານ 7-8 ຊົ່ວໂມງເທົ່ານັ້ນ. ນະຄອນພູເອີ ແຂວງຢຸນນານ ເປັນເມືອງທີ່ມີຫລາຍຊົນຊາດຊົນເຜົ່າ ແລະ ບາງເຜົ່າກໍມີພາສາ ແລະ ວັດທະນະທຳຄ້າຍຄືລາວເຮົາເຊັ່ນ: ເຜົ່າອາຄ່າ ແລະ ໄຕລື້. 

    ມະຫາວິທະຍາໄລພູເອີ ເປັນສະຖາບັນການສຶກສາໜຶ່ງທີ່ມີຊື່ສຽງຂອງຈີນ ສາມາດຍາດໄດ້ຫລາຍລາງວັນໃນລະດັບໂລກກໍຄືລະດັບປະເທດ. ແຜ່ນພິມສິລະປະສິ້ນສຸດທ້າຍທີ່ເປັນຜົນງານຄົ້ນຄວ້າວິໄຈຂອງນັກສຶກສາມະຫາໄລພູເອີ ໄດ້ຖືກອົງການອຸຍແນັສໂກຮັບຮອງເປັນມໍລະດົກໂລກ; ໃນປີ 2024 ມະຫາວິທະຍາໄລແຫ່ງນີ້ ຊະນະການປະກວດແຂ່ງຂັນເຊຍລີດເດີໄດ້ຮັບລາງວັນອັນດັບໜຶ່ງ ແລະ ໃນປີ 2022 ມະຫາວິທະຍາໄລໄດ້ຮັບລາງວັນເປັນສະຖາບັນຊ່າງສີມືດີເດັ່ນແຂວງຢຸນນານ. ນອກຈາກນີ້, ມະຫາວິທະຍາໄລພູເອີ ຍັງຖືກຂະໜານນາມວ່າເປັນມະຫາວິທະຍາໄລ 5 ສໍ - ສະຫງົບ, ສະອາດ, ສີຂຽວ, ສະຫວ່າງ ແລະ ສີວິໄລ  ເຊິ່ງແຕ່ລະປີມີນັກທ່ອງທ່ຽວເຂົ້າມາທ່ຽວຊົມ ແລະ ທັດສະນະສຶກສາເປັນຈຳນວນຫລວງຫລາຍ.

    ມະຫາວິທະຍາໄລພູເອີ ສ້າງຕັ້ງຂຶຶ້ນໃນປີ 1978, ປັດຈຸບັນເປີດສອນໃນລະດັບປະລິນຍາຕີໃນ 30 ກວ່າວິຊາ (13 ຄະນະ) ໃນນັ້ນມີຫລັກສູດການສຶກສາສາກົນ, ການສຶກສາກ່ອນໄວຮຽນ, ການສຶກສາປະຖົມ, ການສຶກສາພິເສດ, ພາສາອັງກິດ, ພາສາອັງກິດສຳລັບທຸລະກິດ, ການບໍລິຫານໂຮງແຮມ, ປຸງແຕ່ງແລະການສຶກສາດ້ານໂພຊະນາການ, ການບັນຊີ, ວິທະຍາສາດຂໍ້ມູນ ແລະ ເຕັກໂນໂລຊີບິກດາຕາ, ເຕັກໂນໂລຊີສື່ດິຈີຕອນ, ວິສະວະກຳອິນເຕີເນັດຊັບພະສິ່ງ, ພາລະສຶກສາ ແລະ ກະສິກຳ ແລະ ອີກຫລາຍວິຊາ.

    ນອກຈາກນີ້, ມະຫາໄລຍັງມີສູນຝຶກອົບຮົມແລະສູນທົດລອງວຽກ 300 ກວ່າແຫ່ງ;ໃນນີ້ມີ 197 ແຫ່ງຕັ້ງຢູ່ນອກມະຫາວິທະຍາໄລ ແລະ 105 ແຫ່ງຢູ່ໃນມະຫາວິທະຍາໄລ. ທັງໝົດນີ້ແມ່ນລວມທັງຫໍພິພິທະພັນວິທະຍາສາດຊີວະນາໆພັນ, ສູນຝຶກຜູ້ປະກອບການຂອງລັດພາຍໃຕ້ໂຄງການໜຶ່ງແລວໜຶ່ງເສັ້ນທາງ ແລະ ສູນສອບເສັງພາສາຈີນ. ນອກຈາກມີການສິດສອນທີ່ດີແລ້ວມະຫາວິທະຍາໄລພູເອີຍັງເປັນບ່ອນແລກປ່ຽນທາງດ້ານວັດທະນະທຳ ທີ່ສຳຄັນອີກແຫ່ງໜຶ່ງໂດຍທາງໂຮງຮຽນຈະຈັດກິດຈະກຳໃຫ້ນັກສຶກສາຈາກຫລາຍເຊື້ອຊາດ ຫລາຍທ້ອງຖິ່ນ ໄດ້ມີໂອກາດແລກປ່ຽນ-ຮຽນຮູ້ສິລະປະວັດທະນະທຳທີ່ແຕກຕ່າງ ສ້າງຄວາມຮັກແພງໃນໝູ່ນັກຮຽນນັກສຶກສາເປັນຢ່າງດີ.  ຢູ່ໃນມະຫາວິທະຍາໄລແຫ່ງນີ້ມີນັກສຶກສາທັງໝົດ10.000 ກວ່າຄົນສະເພາະນັກສຶກສາລາວມີປະມານ 300 ກວ່າຄົນຖືເປັນຈຳນວນທີ່ຫລາຍກວ່າໝູ່ ໃນບັນດາປະເທດອາຊຽນທີ່ໄດ້ຮັບທຶນຈາກມະຫາວິທະຍາໄລພູເອີ.

   ສຳລັບຜູ້ທີ່ຢາກຈະໄປສຶກສາຮ່ຳຮຽນຢູ່ມະຫາວິທະຍາໄລແຫ່ງນີ້ ສາມາດສະໝັກເສັງເອົາທຶນການສຶກສາຈາກພະແນກສຶກສາແຂວງຢຸນນານ ຫລື ຈາກມະຫາວິທະຍາໄລພູເອີ ໂດຍກົງ.  ສ່ວນນັກສຶກສາລາວຢູ່ແຂວງຜົ້ງສາລີ ແມ່ນສາມາດສະໝັກເອົາທຶນການສຶກສາເມືອງຊີມາວ ເພື່ອຮຽນຢູ່ມະຫາວິທະຍາໄລພູເອີ ຜ່ານຫ້ອງການສຶກສາເມືອງຜົ້ງສາລີ ແຂວງຜົ້ງສາລີ. ນັກສຶກສາທີ່ໄດ້ຮັບທຶນຈະບໍ່ໄດ້ຈ່າຍຄ່າຮຽນ ແລະ ຄ່າພັກເຊົາຢູ່ມະຫາວິທະຍາໄລ ແລະ ຄ່າປຶ້ມຮຽນ; ສ່ວນລາຍຈ່າຍອື່ນໆນອກເໜືອຈາກນີ້ແມ່ນນັກຮຽນຮັບຜິດຊອບເອງ ເຊິ່ງທາງມະຫາວິທະຍາໄລມີແຜນຮັບນັກຮຽນທີ່ຮຽນດ້ວຍທຶນຕົນເອງຈາກປະເທດອາຊີ ແລະ ອາຊີຕາເວັນອອກສຽງໃຕ້. ໂດຍນັກຮຽນຈະຕ້ອງຮັບຜິດຊອບຄ່າໃຊ້ຈ່າຍດ້ວຍຕົນເອງ ແລະ ຈະຕ້ອງຍື່ນໃບສະໝັກເຖິງມະຫາໄລໂດຍກົງ. ສຳລັບຄ່າຮຽນກຽມພາສາຈີນນັກສຶກສາຈະຕ້ອງໄດ້ຈ່າຍ 20.000 ຢວນຕໍ່ປີ; ຫລັງຈາກຈົບກຽມພາສາຈີນ ແລ້ວຈະໄດ້ຈ່າຍ 24.000 ຢວນຕໍ່ປີ, ແຕ່ສຳລັບນັກສຶກສາທີ່ມາຈາກຄອບຄົວລາຍຮັບຕ່ຳຢູ່ໃນປະເທດອາຊີຕາເວັນອອກສຽງໃຕ້ ແມ່ນຈະໄດ້ຮັບສິດທິພິເສດ ຄືຈະໄດ້ຈ່າຍຄ່າຮຽນກຽມພາສາຈີນພຽງ 5.000 ຢວນຕໍ່ປີ ແລະ ເມື່ອຜ່ານການກຽມພາສາຈີນ ແລ້ວຈະໄດ້ຈ່າຍ 6.500 ຢວນຕໍ່ປີ.

ໂດຍ ແສງທອງ ພະສະຫວັດ

KPL