*ດັ່ງຄຳຂວັນຂອງແຂວງສາລະວັນ ທີ່ຂຽນວ່າໄວ້ວ່າ:“ໝາກພ້າວນາໄຊ ປີ້ງໄກ່ນາປົ່ງ ເຫລົ້າຂາວເມືອງຄົງ ລຳວົງສາລະວັນ” ເຊິ່ງພິເສດຄຳຂວັນດັ່ງກ່າວ ໂດຍສະເພາະແມ່ນ ປີ້ງໄກ່ນາປົ່ງໄດ້ກາຍເປັນທ່າແຮງອັນສຳຄັນໃນການຈັດຕັ້ງປະຕິບັດ ມະຕິວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ (ສອຈ) ໃຫ້ມີການຂະຫຍາຍຕົວຂຶ້ນເທື່ອລະກ້າວ.

     ຖ້າເອີຍເຖິງແຂວງສາລະວັນ ສິ່ງທີ່ພວກເຮົາຄິດໄວ້ໃນໃຈທຳອິດກໍ່ແມ່ນປີ້ງໄກ່ນາປົ່ງ, ເຫລົ້າຂາວເມືອງຄົງ ເນື່ອງຈາກປີ້ງໄກ່ນາປົ່ງຂອງປະຊາຊົນບ້ານນາປົ່ງ ເປັນມູນລະດົກທີ່ສືບທອດກັນມາເປັນເວລາປະມານ 100 ປີຈຶ່ງເຮັດໃຫ້ປີ້ງໄກ່ນາປົ່ງ ມີຊື່ສຽງໂດ່ງດັງໄປທົ່ວທຸກມູນຂອງປະເທດລາວເຮົາ ອັນໄດ້ເຮັດໃຫ້ການທ່ອງທ່ຽວຢູ່ແຂວງສາລະວັນ ມີຄວາມຟົດຟື້ນ. ເມື່ອເຮົາເດີນທາງບໍ່ວ່າທາງເໜືອລົງໄປແຂວງສາລະວັນ, ແຕ່ໃຕ້ຂຶ້ນມາ ພໍແຕ່ຮອດສາມແຍກບ້ານນາປົ່ງ ກໍ່ຈະເຫັນຢູ່ໃນສອງຝາກທາງມີຮ້ານປີ້ງໄກ່ຕິດຕໍ່ກັນຍາວເປັນ 100 ແມັດ ທັງສົ່ງກິ່ນຫອມປີ້ງໄກ່ເຂົ້າຕໍາດັງອັນດຶງດູດຈິດໃຈຫິວເຂົ້າທັນທີດ້ວຍຄວາມຢາກລອງຄວາມແຊບທີ່ເລົ່າລືກັນມາແທ້ຫລືບໍ່?.ສໍາລັບຜູ້ຂຽນໄດ້ມີໂອກາດໄປແຂວງສາລະວັນເມື່ອມໍ່ໆນີ້ ເພື່ອເກັບກຳຂໍ້ມູນຂ່າວສານໃນງານມະຫະກຳກິລານັກຮຽນມັດທະ ຍົມສຶກສາທົ່ວປະເທດ ຄັ້ງທີ 7 ທີ່ແຂວງດັ່ງກ່າວ, ພາຍຫລັງສໍາເລັດພາລະໜ້າທີ່ແລ້ວ ຕອນຂາກັບ  ພໍມາຮອດບ້ານນາປົ່ງ ກໍ່ມີແມ່ຄ້າເອົາປີ້ງໄກ່ນາປົ່ງມາຂາຍໃຫ້ຜູ້ໂດຍສານ ເຊິ່ງຜູ້ຂຽນກໍ່ບໍ່ລໍ່ຊ້າຈົກເງິນ 250.000 ກີບ ຊື້ປີ້ງໄກ່ 5ໂຕຕິດໄມ້ຕິດມືເປັນຂອງຝາກຂອງຕ້ອນ. ຂະນະທີ່ຢາກລອງຄວາມແຊບທີ່ເລົ່າລືກັນນັ້ນ ກໍ່ໄດ້ເອົາປີ້ງໄກ່ໂຕໜຶ່ງບວກກັບຫໍ່ເຂົ້າໜຽວຮ້ອນມາກິນຮ່ວມກັບໝູ່ອີກ 2 ຄົນ. ໂອ !ແຊບສົມເພິ່ນເວົ້າແທ້ດ້ວຍລົດຊາດການເອືອບໄກ່ທີ່ແຊບແບບມີເອກະລັກສະເພາະທີ່ບໍ່ຄືໃຜຫລືໄປກິນບ່ອນໃດກໍ່ບໍ່ຄືບ່ອນນີ້.

ແນວໃດກໍ່ຕາມການໃຫ້ສຳພາດຂອງ ທ່ານ ດາວວົງ ພອນແກ້ວ ເຈົ້າແຂວງສາລະວັນ ຕໍ່ນັກຂ່າວໜັງສືພິມປະເທດລາວວ່າ: ມະຕິວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ (ສອຈ) ເປັນວຽກໜຶ່ງທີ່ສ່ອງແສງໃຫ້ພວກເຮົາຮູ້ເຖິງການສົ່ງເສີມເປັນສິນຄ້າ ໃຫ້ກຸ້ມຕົນເອງ ແລະ ຊົມໃຊ້ສິນຄ້າພາຍໃນ ເພື່ອຫລຸດຜ່ອນການນຳເຂົ້າສິນຄ້າຈາກພາຍນອກ. ສຳລັບແຂວງສາລະວັນກໍ່ໄດ້ເອົາໃຈໃສ່ເຜີຍແຜ່ ໂຄສະນາມະຕິດັ່ງກ່າວຫລາກຫລາຍສີສັນອອກສູ່ຊາວແຂວງສາລະວັນ ໄດ້ຮັບຮູ້ ເພື່ອເຮັດໃຫ້ປະຊາຊົນມີສະຕິເປັນເຈົ້າຕົນເອງ ຕໍ່ການຈັດຕັ້ງປະຕິບັດໃຫ້ເກີດດອກອອກຜົນ.​ ຢ່າງໃດກໍ່ຕາມແຂວງສາລະວັນກໍ່ມີຫລາຍດ້ານທີ່ປະກອບສ່ວນຕໍ່ການຈັດຕັ້ງປະຕິບັດ ສອຈ ທັງສົ່ງເສີມຜະລິດສິນຄ້າພາຍໃນໃຫ້ຫລາຍຂຶ້ນ ຕາມທ່າແຮງຂອງແຂວງ ເພື່ອສາມາດພຽງພໍຕໍ່ການບໍລິໂພກພາຍໃນ ແລະ ສາມາດເວົ້າໄດ້ວ່າ ການຜະລິດກະສິກຳຂອງແຂວງແມ່ນສາມາດຜະລິດກຸ້ມຕົນເອງໄດ້. ອັນພົ້ນເດັ່ນແມ່ນໄດ້ມີການຊຸກຍູ້ສົ່ງເສີມການລ້ຽງໄກ່ລາດເປັນສິນຄ້າ. ດັ່ງທີ່ພວກເຮົາຮູ້ແລ້ວວ່າ ແຂວງສາລະວັນ ແມ່ນມີຊື່ສຽງທາງດ້ານການປີ້ງໄກ່ຂາຍ ໂດຍສະເພາະແມ່ນປີ້ງໄກ່ນາປົ່ງ ແມ່ນມີຊື່ສຽງລະດັບປະເທດກໍ່ວ່າໄດ້. ສະນັ້ນ, ຈຶ່ງໄດ້ຖືເອົາສິນຄ້າປະເພດປີ້ງໄກ່ນາປົ່ງ ເປັນຜະລິດຕະພັນ ພັດດັນໃຫ້ແກ່ການລ້ຽງໄກ່ລາດໃຫ້ຫລາຍຂຶ້ນ ສາມາດຕອບສະໜອງຕໍ່ຄວາມຕ້ອງການຂອງສັງຄົມ ແລະ ສາມາດຂະຫຍາຍຕະຫລາດປີ້ງໄກ່ນາປົ່ງໃຫ້ກວ້າງຂວາງໄປສູ່ຕ່າງແຂວງ ເພື່ອໃຫ້ສັງຄົມໄດ້ບໍລິໂພກທົ່ວເຖິງ ໂດຍບໍ່ຈຳເປັນຕ້ອງມາບ້ານນາປົ່ງຫັ້ນ. ນອກຈາກນີ້, ການຊື້-ຂາຍແບບອອນໄລກໍ່ສາມາດສົ່ງໄປຮອດພາຍໃນ 2-3 ວັນໃນທົ່ວປະເທດ, ແຕ່ກໍ່ຍັງພົບຄວາມຫຍຸ້ງຍາກແດ່. ຂະນະທີ່ປັດຈຸບັນກຳລັງເລີ່ມຝຶກອົບຮົມທາງດ້ານການຫຸ້ນຫໍ່ ໃຫ້ແກ່ຜູ້ປະກອບການປີ້ງໄກ່ນາປົ່ງຢ່າງຂຸ້ນຂ້ຽວ, ເຮັດແນວໃດຮັກສາຄຸນນະພາບຂອງປີ້ງໄກ່ນາປົ່ງ ເພື່ອສາມາດສົ່ງໄປໄດ້ໄກ ໝາຍຄວາມວ່າປຸງແຕ່ງເຄື່ອງແລ້ວ, ແຕ່ຍັງບໍ່ທັນປີ້ງເທື່ອ ສົ່ງໄປໃຫ້ຜູ້ສັ່ງຊື້ນັ້ນ ຈຶ່ງປີ້ງກິນເອງໄດ້, ເພື່ອຮັກສາລົດຊາດຂອງປີ້ງໄກ່ນາປົ່ງຕົ້ນດຳລັດຄືເກົ່າ.

ທ່ານ ດາວວົງ ພອນແກ້ວ ຍັງກ່າວຕື່ມວ່າ:  ນອກຈາກທີ່ກ່າວມານັ້ນແລ້ວ, ຍັງໄດ້ຊຸກຍູ້ບັນດາຄອບຄົວລ້ຽງໄກ່ລາດໃຫ້ຫລາຍຂຶ້ນຕິດພັນກັບການສົ່ງເສີມຜູ້ປະກອບການປີ້ງໄກ່ໄປຮັບຊື້ ໝາຍຄວາມວ່າສົ່ງເສີມຜູ້ລ້ຽງ ແລະ ຜູ້ຮັບຊື້ ໄປພ້ອມໆກັນ ເພື່ອໃຫ້ແຕ່ລະກຸ່ມມີຄວາມຊຳນານໃນການລ້ຽງ, ການປຸງແຕ່ງປີ້ໄກ່ໃຫ້ຖືກອົກຖືກໃຈຈາກສັງຄົມ ເພື່ອສ້າງລາຍຮັບເຂົ້າຄອບຄົວຂອງຊາວແຂວງສາລະວັນທີ່ໝັ້ນຄົງ. ສິ່ງເຫລົ່ານີ້ ກໍ່ແມ່ນທ່າແຮງອັນໜຶ່ງໃນການຈັດຕັ້ງປະຕິບັດມະຕິວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ (ສອຈ) ຢູ່ແຂວງສາລະວັນ ໃຫ້ມີຄວາມເຂັ້ມແຂງ, ປະຊາຊົນມີການພັດທະນາດີຂຶ້ນ ໄປຕາມນະໂຍບາຍເພິ່ງຕົນເອງ ກຸ້ມຕົນເອງເປັນກ້າວໆ.

ໂດຍ: ເຂົ້າຈານນ້ຳ. 

KPL