ຂປລ
ຂປລ. ວັນທີ 20 ທັນວາ 2024 ຜ່ານມາ, ສະຫາຍ ຮ້ອຍເອກ ມະນີລາ ບຸນທະວີ ຊ່ວຍວຽກພະແນກຊາວໜຸ່ມ ໄດ້ນໍາພາສະມາຊິກຊາວໜຸ່ມ ທົ່ວໂຮງຮຽນວັດທະນະທຳ ຊົນເຜົ່າກອງທັບ (ຮວຜທ) ເຂົ້າຢ້ຽມຊົມ ອະນຸສອນສະຖານ ປະທານ ໄກສອນ ພົມວິຫານ ເນື່ອງໃນໂອກາດ ວັນເກີດ ປະທານ ໄກສອນ ພົມວິຫານ ຄົບຮອບ 104 ປີ ແລະ ວັນສ້າງຕັ້ງກອງທັບ ປະຊາຊົນລາວ ຄົບຮອບ 76 ປີ.
ຂປລ. ວັນທີ 20 ທັນວາ 2024 ຜ່ານມາ, ສະຫາຍ ຮ້ອຍເອກ ມະນີລາ ບຸນທະວີ ຊ່ວຍວຽກພະແນກຊາວໜຸ່ມ ໄດ້ນໍາພາສະມາຊິກຊາວໜຸ່ມ ທົ່ວໂຮງຮຽນວັດທະນະທຳ ຊົນເຜົ່າກອງທັບ (ຮວຜທ) ເຂົ້າຢ້ຽມຊົມ ອະນຸສອນສະຖານ ປະທານ ໄກສອນ ພົມວິຫານ ເນື່ອງໃນໂອກາດ ວັນເກີດ ປະທານ ໄກສອນ ພົມວິຫານ ຄົບຮອບ 104 ປີ ແລະ ວັນສ້າງຕັ້ງ ກອງທັບ ປະຊາຊົນລາວ ຄົບຮອບ 76 ປີ.
ໂອກາດນີ້, ໄດ້ຮັບຟັງການບັນຍາຍເຖິງເຫດການ, ເລື່ອງລາວຕ່າງໆ ຂອງປະທານ ໄກສອນ ພົມວິຫານ ແຕ່ລະພາກ, ແຕ່ລະຂັ້ນ ທີ່ມີເນື້ອໃນເລິກເຊິ່ງ, ຄົບຖ້ວນ, ຊີ້ໃຫ້ເຫັນເຖິງ ນໍ້າໃຈຮັກຊາດ ອັນສູງສົ່ງ, ຄຸນສົມບັດສິນທຳປະຕິວັດຫລາຍດ້ານ ຂອງປະທານ ໄກສອນ ພົມວິຫານ. ທັງນີ້, ກໍເພື່ອເຮັດໃຫ້ສະມາຊິກຊາວໜຸ່ມ ທົ່ວໂຮງຮຽນວັດທະນະທຳ ຊົນເຜົ່າກອງທັບ ໄດ້ຮຽນຮູ້ ກ່ຽວກັບ ປະຫວັດການ ເຄື່ອນໄຫວປະຕິວັດຂອງ ປະທານ ໄກສອນ ພົມວິຫານ ໃນເມື່ອກ່ອນ ເພາະວ່າປະທານ ໄກສອນ ພົມວິຫານ ແມ່ນໜຶ່ງໃນຜູ້ນໍາຂອງ ການປະຕິວັດ ທີ່ດີເດັ່ນ, ເປັນວິລະບູລຸດຂອງຊາດລາວ ແລະ ເປັນຜູ້ນໍາພາກໍ່ຕັ້ງກອງທັບລາວ ອິດສະຫລະໃນເມື່ອກ່ອນ ເຊິ່ງແມ່ນຕົ້ນກຳເນີດ ຂອງກອງທັບປະຊາຊົນລາວ ໃນປັດຈຸບັນ.
ພ້ອມນີ້, ຍັງເປັນການສຶກສາອົບຮົມ ໃຫ້ສະມາຊິກຊາວໜຸ່ມ ເຫັນໄດ້ຄຸນສົມບັດສິນທຳ ປະຕິວັດອັນໂດດເດັ່ນ ຂອງປະທານ ໄກສອນ ພົມວິຫານ ເພື່ອເປັນບ່ອນອີງໃຫ້ແກ່ ການເຝິກຝົນ ຫລໍ່ຫລອມຕົນເອງ ໃນຂະບວນການວຽກງານຕົວຈິງ ໃຫ້ກາຍເປັນຊາວໜຸ່ມ ທີ່ດີເດັ່ນຂອງກົມກອງ, ຂອງກອງທັບ ແລະ ຂອງຊາດ, ພ້ອມທັງເປັນກຳລັງແຮງຕົ້ນຕໍ ໃນການປັບປຸງ ພັດທະນາ ກົມກອງໃຫ້ນັບມື້ເຂັ້ມແຂງ, ໜັກແໜ້ນ ແລະ ມີແບບແຜນທັນສະໄໝ.
ຂ່າວ: ໂອລິນ ມິ່ງມີໄຊ
KPL
