*ງານວາງສະແດງສິນຄ້ານຳເຂົ້າສາກົນຈີນຄັ້ງທີ7 ຫລື ເວທີເປິກສາຫາລື ເສດຖະກິດສາກົນຮົງຊຽວຢູ່ນະຄອນຊຽງໄຮໄດ້ຈັດຂື້ນລະຫວ່າງວັນທີ 5-10 ພະຈິກ 2024 ຢູ່ນະຄອນຊຽງໄຮຂອງຈີນ ໄດ້ຮັບຜົນສຳເລັດຢ່າງຫລວງຫລາຍ, ທ່າມກາງບັນດາຜູ້ແທນ ແລະ ແຂກຮັບເຊີນຈາກ 152 ປະເທດ ເຂດແຄວ້ນ ແລະ ອົງການຈັດຕັ້ງສາກົນໄດ້ເຂົ້າຮ່ວມງານໃນຄັ້ງນີ້. ໃນນັ້ນມີວິສາຫະກິດ3.496 ແຫ່ງເຂົ້າຮ່ວມ,ທຽບໃສ່ຈຳນວນວິສາຫະກິດແມ່ນມີຫຼາຍກວ່າ 6 ຄັ້ງທີ່ຜ່ານມາ. ໃນນີ້ມີວິສາຫະກິດຊັ້ນນຳ 500 ແຫ່ງຂອງໂລກ ແລະ ວິສາຫະກິດແຖວໜ້າໃນຂະແໜງການຕ່າງໆຂອງໂລກ 297 ແຫ່ງໄດ້ເຂົ້າຮ່ວມ, ສະເພາະວິສາຫະກິດ ແລະ ອົງການ 186 ແຫ່ງໄດ້ເຂົ້າຮ່ວມງານ 7 ຄັ້ງລຽນຕິດເຊິ່ງສ້າງສະຖິຕິໃໝ່ເປັນຄັ້ງປະຫວັດ ສາດ. ນີ້ເປັນການຈັດງານທີ່ອະລັງການທີ່ສຸດກ່ອນ 6 ຄັ້ງ ທີ່ຜ່ານມາແລະກາຍເປັນກາລະໂອກາດເສລີໃໝ່ທີ່ມີການເປີດປະຕູທີ່ຍິ່ງໃຫຍ່ກວ່າເກົ່າຂອງໂລກ. ພວກເຮົາມາວິເຄາະນໍາກັນວ່າເປັນຫຍັງ ສປ ຈີນ ຈິ່ງມີແນວຄິດລິເລີ່ມຈັດງານວາງສະແດງສິນຄ້ານຳເຂົ້າສາກົນຄືແນວນີ້? ຄຳຕອບທີ່ຊັດເຈນກໍຄື ສປ ຈີນ ແລະ ປະເທດອື່ນໆ ລ້ວນແລ້ວແຕ່ແມ່ນສະມາຊິກຂອງສາກົນ, ເຖິງຈະຢູ່ທະວີບທີ່ແຕກຕ່າງກັນແຕ່ການພົວພັນ ແລະ ການຮວ່ມມືແມ່ນຕ້ອງອາໃສຊຶ່ງກັນແລະກັນ, ເພາະແຕລະປະເທດເຖິງຈະໃຫຍ່ຫຼືນ້ອຍກໍຕ້ອງໄດ້ແລກປ່ຽນບົດຮຽນ, ປະສົບການ, ໄປມາຄ້າຂາຍຮ່ວມກັນ, ບົນພື້ນຖານຕ່າງຝ່າຍຕ່າງໄດ້ຮັບຜົນປະໂຫຍດ ແລະ ບໍ່ສາມາດຕັດແຍກອອກຈາກກັນໄດ້.
ພິເສດອັນທີ່ຜູ້ຂຽນຢາກເວົ້າແມ່ນ, ພາຍຫຼັງຈີນໄດ້ຮັບຜົນສຳເລັດໃນການເປີດປະຕູສູ່ໂລກພາຍນອກ, ຈີນພາຍໃຕ້ການນຳພາຂອງພັກກອມມູນິດຈີນອັນມີ ທ່ານ ສີຈິ້ນຜິງ ປະທານປະເທດແຫ່ງ ສປ ຈີນ ເປັນແກນກາງທີ່ມີແນວຄິດສາກົນກຳມະຊີບ, ທີ່ເບິ່ງເຫັນກວ້າງເຫັນໄກກໍຢາກສົ່ງບົດຮຽນແລະຜົນສຳເລັດນີ້ໃຫ້ບັນດາປະເທດຕ່າງໆຂອງໂລກໄດ້ຮັບຮູ້ນຳ. ດັ່ງທ່ານປະທານ ສີຈິ້ນຜິງ ໄດ້ກ່າວຕໍ່ກອງປະຊຸມລະດັບສູງວ່າດ້ວຍການຮ່ວມມືສາກົນຂອງພາກພື້ນອາຊີປາຊີຟິກເມື່ອຫຼາຍປີກ່ອນກ່ຽວກັບ“ໜຶ່ງແລວໜຶ່ງເສັ້ນທາງ”ວ່າ:ຂໍ້ລິເລີ່ມ ໜຶ່ງແລວໜຶ່ງເສັ້ນທາງເປັນຂອງຈີນ, ແຕ່ໂອກາດເປັນຂອງໂລກ.ຈີນຍິນດີຮ່ວມມືກັບຝ່າຍຕ່າງໆ,ສ້າງສາຍພົວພັນຄູ່ຮ່ວມມື ‘ໜຶ່ງແລວໜຶ່ງເສັ້ນທາງ’ ທີ່ໃກ້ຊິດກວ່າເກົ່າ, ຍຶດໝັ້ນການເດີນຕາມເສັ້ນທາງທີ່ສາມັກຄີແລະຮ່ວມກັນ, ເຊື່ອມຈອດກັນພັດທະນາຮ່ວມກັນ, ທັງຮ່ວມກັນຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.”
ເວົ້າສະເພາະໃນງານວາງສະແດງສິນຄ້ານຳເຂົ້າສາກົນຈີນ ຄັ້ງທີ7 ໄດ້ມີການພົວພັນການຄ້າທີ່ກວມເອົາທົ່ວທຸກມຸມໂລກເຂົ້າຮວ່ມລວມທັງບັນດາປະເທດທະວີບອາຟຣິກາ, ຕາເວັນອອກກາງ, ອາເມຣິກາໃຕ້ ແລະ ເຂດອາຊີຕາເວັນອອກ ສ່ຽງໃຕ້ເຂົ້າຮວ່ມບັນລຸເຖິງ 86.6%, 88.2% ແລະ 77.9% ແລະ 78.6% ຕາມລຳດັບ. ສ່ອງແສງໃຫ້ເຫັນວ່າການເປີດປະຕູສູ່ພາຍນອກໃຫ້ດີກວ່າເກົ່າຂອງຈີນ, ຄຽງຄູ່ກັບການຍຶດໝັ້ນເຄົາລົບຄວາມຊື່ສັດ, ຮັກສາຄຳໝັ້ນສັນຍາ, ຕ່າງຝ່າຍຕ່າງໄດ້ຮັບຜົນປະໂຫຍດໃນຖານະຄູ່ຮ່ວມຊາຕາກຳນຳກັນແລ້ວ, ໃນສະພາບການຂອງໂລກໃນປັດຈຸບັນຍັງມີຂໍ້ຂັດແຍ່ງ ແລະ ສັບສົນຫຼາຍຢ່າງ, ພວກເຮົາຍິ່ງຈະຕ້ອງເພີ່ມທະວີການຊຸກຍູ້ການຮ່ວມກັນສ້າງ "ໜຶ່ງແລວໜຶ່ງເສັ້ນທາງ", ພ້ອມເປີດກວ້າງການຮ່ວມມືໃນຂົງເຂດເສດຖະກິດ - ການຄ້າ, ການເຊື່ອມໂຍງເຊື່ອມຈອດກັນ ແລະ ອື່ນໆໃຫ້ດີຂື້ນກວ່າເກົ່າ, ປົກປັກຮັກສາການຄ້າເສລີ. ຊຸກຍູ້ຄວາມສະເໝີພາບ, ຄວາມກ້າວໜ້າ ແລະ ການພັດທະນາແບບຍືນຍົງຢູ່ໃນໂລກສືບຕໍ່ໄປ.
ໜຶ່ງໃນຄວາມໂດດເດັ່ນຂອງງານນີ້, ນອກຈາກມີຈຳນວນວິສາຫະກິດຈາກທົ່ວທຸກມຸມໂລກເຂົ້າຮວ່ມເພີ່ມຂື້ນແລ້ວ, ຜູ້ຕາງໜ້າວົງການການເມືອງການຄ້າ, ນັກວິຊາການແລະວິສາຫະກິດທີ່ເຂົ້າຮວ່ມກໍເພີ່ມຂື້ນເຖິງ1,500 ທ່ານທີ່ມາຈາກ 100ກວ່າປະເທດ, ເຂດແຄວ້ນ ແລະ ອົງການຈັດຕັ້ງສາກົນ .ໃນນັ້ນ, ພາຍໃນງານຍັງໄດ້ຈັດກິດຈະກຳສົ່ງເສີມການຄ້າ ແລະ ການລົງທຶນເກືອບ 50 ຄັ້ງ,ລວມທັງມີການພົບປະດ້ານການຄ້າ ແລະ ການລົງທຶນເພື່ອການຮ່ວມມືກັບ260 ກວ່າລາຍການ, ຄິດເປັນມູນຄ່າຫຼາຍກວ່າ 9,4 ຕື້ໂດລາ. ຜ່ານການຊຸກຍູ້ການປະດິດສ້າງໃໝ່ດ້ວຍການເປີດປະຕູສູ່ພາຍນອກ, ງານວາງສະແດງສິນຄ້ານຳເຂົ້າສາກົນຈີນຄັ້ງນີ້ໄດ້ສ້າງເວທີການຮ່ວມມືອັນໃໝ່ໃຫ້ແກ່ວິສາຫະກິດທົ່ວໂລກ ເຊິ່ງໄດ້ນຳສະເໜີຜະລິດຕະພັນໃໝ່ເປັນຄັ້ງທຳອິດ ວາງສະແດງເຕັກໂນໂລຊີທີ່ທັນສະໄໝເປັນຄັ້ງທຳອິດ ແລະ ນຳສະເໜີການບໍລິການປະດິດສ້າງໃໝ່ເປັນຄັ້ງທຳອິດ, ຢູ່ເຂດວາງສະແດງທີ່ມີເນື້ອທີ 420.000 ຕາແມັດນັ້ນ, ວິສາຫະກິດຂ້າມຊາດຕ່າງໆ ໄດ້ນຳສະເໜີຜະລິດຕະພັນໃໝ່ ເຕັກໂນໂລຊີໃໝ່ ແລະ ການບໍລິການໃໝ່ 400 ກວ່າຊະນິດ. ຜົນສຳເລັດນີ້ໄດ້ສະແດງໃຫ້ເຫັນເຖິງການຊຸກຍູ້ການຮ່ວມກັນສ້າງ "ໜຶ່ງແລວໜຶ່ງເສັ້ນທາງ"ຂອງຈີນໄດ້ເປີດກວ້າງການຮ່ວມມືໃນຂົງເຂດ ເສດຖະກິດ - ການຄ້າ, ການເຊື່ອມໂຍງເຊື່ອມຈອດກັນແລະອື່ນໆ, ປົກປັກຮັກສາການຄ້າເສລີ., ຊຸກຍູ້ຄວາມສະເໝີພາບ, ຄວາມກ້າວໜ້າ ແລະ ການພັດທະນາແບບຍືນຍົງຢູ່ໃນໂລກເວົ້າລວມ, ກໍຄືບັນດາປະເທດ “ເຂດໂລກໃຕ້” ສາມາດຄົ້ນຫາໂອກາດຫຼາຍກວ່າເກົ່າ ແລະ ໄດ້ຮັບການພັດທະນາໃຫຍ່ກວ່າເກົ່າຈາກຕະຫຼາດຈີນຢ່າງກ້າວກະໂດດ.
ນັບຕັ້ງແຕ່ງານວາງສະແດງສິນຄ້ານຳເຂົ້າສາກົນຈີນ ຄັ້ງທຳອິດທີ່ຈັດຂຶ້ນໃນ ປີ2018 ເປັນຕົ້ນມາ, ງານວາງສະແດງດັ່ງກ່າວໄດ້ເສີມຂະຫຍາຍບົດບາດກາຍເປັນເວທີສາກົນຢ່າງຕໍ່ເນື່ອງໃນດ້ານການຈັດຊື້, ການສົ່ງເສີມການຄ້າ, ການລົງ ທຶນ, ການແລກປ່ຽນດ້ານວັດທະນະທຳ ແລະ ການຮ່ວມມືດ້ານການເປີດປະຕູສູ່ພາຍນອກ. ອີງຕາມສະຖິຕິ, ງານວາງສະແດງສິນຄ້ານຳເຂົ້າສາກົນຈີນໃນ ຄັ້ງທີ7 ນີ້ໄດ້ ກາຍເປັນເວທີການຮ່ວມມືອັນໃໝ່ໃຫ້ແກ່ວິສາຫະກິດທົ່ວໂລກ ເຊິ່ງໄດ້ນຳສະເໜີຜະລິດຕະພັນໃໝ່ເປັນຄັ້ງທຳອິດ, ພ້ອມວາງສະແດງເຕັກໂນໂລຊີທີ່ທັນສະໄໝເປັນຄັ້ງທຳອິດ ແລະ ນຳສະເໜີການບໍລິການປະດິດສ້າງໃໝ່ເປັນຄັ້ງທຳອິດ, ຢູ່ເຂດວາງສະແດງທີ່ມີເນື້ອທີ 420.000 ຕາແມັດນັ້ນ, ວິສາຫະກິດຂ້າມຊາດຕ່າງໆໄດ້ນຳສະເໜີຜະລິດຕະພັນໃໝ່ ເຕັກໂນໂລຊີໃໝ່ ແລະ ການບໍລິການໃໝ່ 400 ກວ່າຊະນິດ.ໃນນັ້ນ,ຍັງໄດ້ຈັດກິດຈະກຳສົ່ງເສີມການຄ້າ ແລະ ການລົງທຶນເກືອບ 50 ຄັ້ງ, ໃນນັ້ນຢູ່ໃນງານພົບປະການຄ້າ ແລະການລົງທຶນໄດ້ບັນລຸເຈດຈຳນົງການຮ່ວມມືລວມ 260 ກວ່າລາຍການ, ຄິດເປັນມູນຄ່າຫຼາຍກວ່າ 9,4 ຕື້ໂດລາ.
ການເປີດກວ້າງການເປີດປະຕູສູ່ພາຍນອກຂອງຈີນ, ບໍ່ພຽງແຕ່ຜູ້ເຂົ້າຮວ່ມໂຄງການໄດ້ຮັບຜົນປະໂຫຍດ, ລວມທັງທົ່ວໂລກກໍໄດ້ຮັບຜົນປະໂຫຍດເຊັ່ນດຽວກັນ. ສິ່ງນີ້ຢັ້ງຢືນຈາກໂຄງການລົດໄຟລາວ-ຈີນ, ເພາະເຈົ້າຂອງໂຄງການແມ່ນລາວແລະຈີນ,ແຕ່ຜູ້ໄດ້ຮັບຜົນປະໂຫຍດຈາກໂຄງການນີ້ໃນການຂົນສົ່ງຜູ້ໂດຍສານເພື່ອການທ່ອງທ່ຽວແລະຂົນສົ່ງສິນຄ້າຕ່າງໆແມ່ນບັນດາປະເທດອ້ອມຂ້າງ,ພາກພື້ນແລະທົ່ວໂລກແມ່ນໄດ້ຊົມໃຊ້ຮວ່ມກັນຢ່າງມີປະສິດທິພາບ,ຕ່າງຝ່າຍຕ່າງໄດ້ຮັບຜົນປະໂຫຍດຮວ່ມກັນ. ສັງລວມແລ້ວ, ງານວາງສະແດງສິນຄ້ານຳເຂົ້າສາກົນຈີນກາຍເປັນແຮງພັກດັນການພັດທະນາ “ໜຶ່ງແລວໜຶ່ງເສັ້ນທາງ”ດວ້ຍການສະໜອງໂອກາດອັນກວ້າງໃຫຍ່ໄພສານເພື່ອແບ່ງປັນຕະຫຼາດຈີນໃຫ້ແກ່ປະເທດຕ່າງໆໃນໂລກ, ກາຍເປັນງານອັນສຳຄັນຫຼາຍທີ່ສຸດເພື່ອການເຊື່ອມຕໍ່ກັບຜູ້ວາງສະແດງສິນຄ້າເຂົ້າກັບຕະຫຼາດຈີນ ໄດ້ຢ່າງມີປະສິດທິພາບ. ນີ້ກໍໝາຍຄວາມວ່າຈີນໄດ້ເປີດກວ້າງການແບ່ງປັນຜົນປະໂຫຍດຈາກການພັດທະນາຂອງຕົນໃຫ້ກັບປະເທດດ້ອຍພັດທະນາໃນທົ່ວໂລກ, ດັ່ງຄຳເວົ້າຂອງຈີນທີ່ວ່າ:“ເມື່ອໂລກພັດທະນາໄດ້ດີແລ້ວ, ຈີນຈຶ່ງຈະພັດທະນາໄດ້ດີ, ເມືີ່ອຈີນພັດທະນາໄດ້ດີແລ້ວ, ໂລກຈຶ່ງຈະດີຂຶ້ນກວ່າເກົ່າ. ”.
