ຂປລ. ວັນທີ 11 ຕຸລາ 2024 ນີ້, ໄວໜຸ່ມ ແລະ ເດັກນ້ອຍຫລາຍຮ້ອຍຄົນໃນເມືອງຮຸນ, ເມືອງປາກແບງ ແລະ ເມືອງປາກທາ ພ້ອມກັນສະເຫລີມສະຫລອງວັນເດັກຍິງສາກົນ, ຈຸດປະສົງເພື່ອປູກຈິດສໍານຶກກ່ຽວກັບ ຜົນກະທົບທີ່ເປັນອັນຕະລາຍ ຂອງການແຕ່ງດອງ ແລະ ການຢູ່ຮ່ວມກັນແບບຜົວເມຍ ກ່ອນໄວອັນຄວນ ຕໍ່ຮ່າງກາຍ ແລະ ອະນາຄົດຂອງພວກເຂົາ.

          ທຸກໆປີ, ບັນດາສະມາຊິກສະໂມສອນນັກຮຽນ ຢູ່ເມືອງດັ່ງກ່າວ, ໄດ້ຈັດກິດຈະກໍາຕ່າງໆ ເພື່ອສະແດງໃຫ້ເຫັນເຖິງຄວາມຕັ້ງໃຈ ທີ່ຈະຂັບເຄື່ອນການປ່ຽນແປງໃນໂຮງຮຽນ ແລະ ຊຸມຊົນຂອງພວກເຂົາ, ພາຍໃຕ້ຫົວຂໍ້ທີ່ແຕກຕ່າງກັນໃນແຕ່ລະປີ ແລະ ຫົວຂໍ້ປີນີ້ແມ່ນເວົ້າເຖິງ ວິໄສທັດຂອງເດັກຍິງ ເພື່ອອະນາຄົດຂອງພວກເຂົາ ຊິ່ງມັນໄດ້ ສະທ້ອນໃຫ້ເຫັນຄວາມຫວັງ ຂອງເຂົາເຈົ້າ ໃນໂລກທີ່ເດັກຍິງສາມາດກໍານົດ ຈຸດໝາຍປາຍທາງຂອງຕົນເອງໄດ້.

          ງານສະເຫລີມສະຫລອງ ວັນເດັກຍິງສາກົນ ໃນປີ 2024 ທີ່ຈັດຂຶ້ນຢູ່ແຕ່ລະໂຮງຮຽນມັດທະຍົມ ເລີ່ມແຕ່ວັນທີ 10-18 ຕຸລາ 2024 ເຊິ່ງມີກິດຈະກຳສ້າງສັນຫລາຍຢ່າງ ທີ່ຖືກອອກແບບໂດຍ ໄວໜຸ່ມຍິງ ແລະ ຊາຍ ໂດຍໄດ້ຍົກໃຫ້ເຫັນເຖິງອັນຕະລາຍ ຂອງການເຄື່ອນຍ້າຍແຮງງານທີ່ບໍ່ປອດໄພ, ຊຸກຍູ້ໃຫ້ບັນດາເພື່ອນມິດຂອງເຂົາເຈົ້າຊອກຫາຊ່ອງທາງທີ່ປອດໄພ ແລະ ເປັນທາງການໃນຊອກວຽກເຮັດຢູ່ຕ່າງປະເທດ ຜ່ານການສະແດງລະຄອນ, ງານສິລະປະ, ການຖາມ-ຕອບ ແລະ ລາຍການອື່ນໆ ໂດຍໄດ້ຮັບການສະໜັບສະໜູນຈາກ ອົງການແພລນສາກົນ ປະຈຳ ສປປ ລາວ.

          ທ່ານ ນາງ ແຄໂຣລ ໂມເທນສັນ ຜູ້ອໍານວຍອົງການແພລນສາກົນ ປະຈຳ ສປປລາວ ໄດ້ກ່າວວ່າ: ພວກເຮົາເຊື່ອໝັ້ນໃນຄວາມສາມາດຂອງໄວໜຸ່ມ ໂດຍສະເພາະແມ່ນໄວໜຸ່ມຍິງ ແລະ ເດັກຍິງ. ໃນແຕ່ລະປີ, ພວກເຮົາສະໜັບສະໜູນເຂົາເຈົ້າ ໃນການສ້າງແຮງຈູງໃຈ ເພື່ອການປ່ຽນແປງທີ່ເຂົາເຈົ້າ ຢາກເຫັນໃນໂຮງຮຽນ ແລະ ຊຸມຊົນຂອງພວກເຂົາເຈົ້າ. ອົງການແພລນສາກົນ ປະຈຳ ສປປ ລາວ ຮ່ວມມືກັບ UNFPA ແລະ ອົງການຈັດຕັ້ງສາກົນອື່ນໆ, ສະໜັບສະໜູນລັດຖະບານແຫ່ງ ສປປ ລາວ ໃນການສະເຫລີມສະຫລອງວັນເດັກຍິງສາກົນ ໃນລະດັບຊາດ. ຂໍ້ລິເລີ່ມນີ້ປະກອບສ່ວນເຂົ້າໃນ ການບັນລຸເປົ້າໝາຍ ການພັດທະນາແບບຍືນຍົງ (SDGs), ລວມທັງ SDG 1 (ບໍ່ມີຄວາມທຸກຍາກ), SDG 2 (ປາສຈາກຄວາມອຶດຫິວ), SDG 3 (ສຸຂະພາບດີ ແລະ ສະຫວັດດີການ), SDG 4 (ການສຶກສາຄຸນນະພາບ), SDG 5 (ຄວາມສະເໝີພາບລະຫວ່າງຍິງ-ຊາຍ), ແລະ SDG 8 (ການເຮັດວຽກທີ່ເໝາະສົມ ແລະ ການເຕີບໂຕທາງດ້ານເສດຖະກິດ) ຜ່ານແຜນງານນາງນ້ອຍ.

          ໃນຂະນະທີ່ໄວໜຸ່ມທົ່ວໂລກກຳລັງ ສະເຫລີມສະຫລອງ ວັນເດັກຍິງສາກົນ, ອົງການແພລນສາກົນ ປະຈຳ ສປປ ລາວ ເຊິ່ງເປັນອົງກອນສິດທິເດັກ ແລະ ມະນຸດສະທຳ, ກໍາລັງເຜີຍແຜ່ການຄົ້ນຄວ້າໃໝ່ທົ່ວໂລກ ໂດຍອີງໃສ່ປະສົບການຂອງເດັກ ແລະ ໄວໜຸ່ມຫລາຍກວ່າ 10.000 ຄົນຈາກ 10 ປະເທດ. ການຄົ້ນຄວ້າດັ່ງກ່າວໄດ້ເປີດເຜີຍວ່າ ບົດບາດຍິງ-ຊາຍມີບົດບາດສໍາຄັນ ໃນເວລາເກີດ ຄວາມຂັດແຍ້ງ ໂດຍເດັກຍິງ ແລະ ໄວຫໜຸ່ມຍິງ ໄດ້ຜະເຊີນກັບຄວາມສ່ຽງ ແລະ ສິ່ງທ້າທາຍສະເພາະ ເຊິ່ງບົດການສຶກສາດັ່ງກ່າວໄດ້ ສຳພາດເດັກອາຍຸ ແຕ່ 15-24 ປີ ຈາກ 10 ປະເທດ ຕົວຢ່າງ ປະເທດໂຄລໍາເບຍ, ຊູດານ, ແລະ ອູແກຣນ ເຊິ່ງໄດ້ຊີ້ໃຫ້ເຫັນເຖິງຄວາມຂັດແຍ້ງ ພາກເອົາໄວເດັກໄປຈາກພວກເຂົາ ແລະ ມັນຖືກແແທນທີ່ ດ້ວຍຄວາມຢ້ານກົວ ແລະ ຄວາມຮຸນແຮງຕ່າງໆ ໂດຍສະເພາະເດັກຍິງແມ່ນມີຄວາມສ່ຽງ ທີ່ຈະໄດ້ຮັບຄວາມຮຸນແຮງທາງເພດ ສູງເຖິງ 27%. ນອກຈາກນັ້ນ, 44% ຂອງເດັກຍິງແມ່ນມີຂໍ້ຈຳກັດໃນການເຂົ້າເຖິງນໍ້າ, ແຕ່ເດັກຊາຍແມ່ນ  39%. ຕົວເລກດັ່ງກ່າວໄດ້ ຊີ້ໃຫ້ເຫັນເຖິງຄວາມບໍ່ເທົ່າທຽມກັນ ລະຫວ່າງ ຍິງ ແລະ ຊາຍ ໃນສະຖານະການຂັດແຍ້ງ.

ຂໍ້ມູນ-ພາບ: ອົງການເພລນສາກົນ ປະຈຳລາວ

KPL