ຂປລ. ກົມໂຄສະນາເຜີຍແຜ່ກົດໝາຍ ກະຊວງ​ຍຸຕິ​ທໍາ ເປີດຝຶກອົບຮົມການດໍາເນີນ ລາຍການວິທະຍຸຄວາມຮູ້ທາງດ້ານກົດໝາຍ ພາກພາສາມົ້ງ ແລະ ພາສາກຶມຸ ​ໃນ​ວັນ​ທີ 30 ກັນຍາ 2024 ຜ່ານ​ມາ ​ໂດຍ​ມີນັກຝຶກອົບຮົມທີ່ມາຈາກກົມທະບຽນສານ, ກົມກົດໝາຍ, ກົມກວດກາ, ກົມຈັດຕັ້ງ ແລະ ພະນັກງານ ແລະ ສະຖາບັນຍຸຕິທໍາແຫ່ງຊາດ ​ເຂົ້າ​ຮ່ວມ​ອົງ​ຮົມ.

ຊຸດຝຶກອົບຮົມຄັ້ງນີ້, ຜູ້ເຂົ້າຮ່ວມໄດ້ຮຽນຮູ້ກ່ຽວກັບ ລັກສະນະສະເພາະ ແລະ ຈຸດພິເສດຂອງ ການດໍາເນີນລາຍການວິທະຍຸ, ເຕັກນິກການຜະລິດລາຍການວິທະຍຸ, ຂັ້ນຕອນການດໍາເນີນລາຍການ, ວິທີການດໍາເນີນລາຍການວິທະຍຸ, ການນໍາໃຊ້ຄໍາສັບທາງການ ແລະ ຄໍາສັບທາງດ້ານກົດໝາຍ, ສິ່ງທີ່ຄວນເອົາໃຈໃສ່ ແລະ ຂໍ້ຫ້າມໃນການດໍາເນີນລາຍການວິທະຍຸ, ແນະນໍາໂປຣແກຣມທີ່ນໍາໃຊ້ ເຂົ້າໃນການຕັດຕໍ່ (Adobe Audition cc 2017), ວິທີການຕັດຕໍ່ ແລະ ປະກອບລາຍການ. ພ້ອມນີ້, ຜູ້ເຂົ້າຮ່ວມຍັງຈະໄດ້ຝຶກຫັດຕົວຈິງ ຢູ່ຫ້ອງສະຕູດີໂອ ເປັນຕົ້ນ ການດໍາເນີນລາຍການວິທະຍຸ, ການສໍາພາດ ແລະ ການຂຽນຂ່າວ. ທັງ​ນີ້, ກໍ​ເພື່ອ​ແສ່ເຮັດໃຫ້ນັກຝຶກອົບຮົມໄດ້ຮັບຮູ້ເຂົ້າໃຈ ແລະ ນໍາໄປຈັດຕັ້ງປະ ຕິບັດເຂົ້າໃນວຽກງານ ທີ່ຕົນເອງຮັບຜິດຊອບ ໃຫ້ມີປະສິດທິຜົນສູງຂຶ້ນກວ່າເກົ່າ, ສາມາດເປັນກະບອກສຽງອັນແຫລມຄົມຂອງ  ພັກ-ລັດ ໃນການໂຄສະນາເຜີຍແຜ່ແນວທາງຂອງພັກ, ກົດໝາຍ ແລະ ນິຕິກໍາລຸ່ມກົດໝາຍ ທີ່ລັດປະກາດໃຊ້ແຕ່ລະໄລຍະ ໃຫ້ປະຊາຊົນໄດ້ຮັບຮູ້, ເຂົ້າໃຈ, ມີສະຕິເຄົາລົບ ແລະ ປະຕິບັດກົດໝາຍໃຫ້ນັບມື້ສູງຂຶ້ນ.

​


ໂອກາດ​ນີ້, ທ່ານ ບຸນລ້ອມ ດວງມາລາ ຮອງຫົວໜ້າກົມໂຄສະນາເຜີຍແຜ່ກົດໝາຍ ໄດ້ເນັ້ນໃຫ້ຄູຝຶກຊີ້ແຈງອະທິບາຍ ໃຫ້ເຫັນແຈ້ງເນື້ອໃນແຕ່ລະບົດຢ່າງມີຈຸດສຸມ, ສາມາດກຳໄດ້ແຕ່ລະບາດບາດກ້າວ ຂອງການເປັນນັກຈັດລາຍການວິທະຍຸ ແລະ ນັກຝຶກອົບຮົມກໍໃຫ້ເອົາໃຈໃສ່ ເຂົ້າຮ່ວມຝຶກອົບຮົມແຕ່ຕົ້ນຕະຫລອດປາຍ, ຄົ້ນຄ້ວາ ແລະ ແລກປ່ຽນຄໍາຄິດ ຄໍາເຫັນຢ່າງກົງໄປກົງມາ, ພາຍຫລັງສໍາເລັດການຝຶກອົບຮົມ ຜູ້ເຂົ້າຮ່ວມຝຶກອົບຮົມ ສາມາດດໍາເນີນລາຍການວິທະຍຸ ພາກພາສາມົ້ງ ແລະ ພາສາກຶມມຸ (ແບບບໍ່ປະຈໍາການ) ໄດ້ໃນອະນາຄົດ.

ຂ່າວ-ພາບ ກະຊວງຍຸຕິທໍາ

KPL