ຂປລ. ແຫລ່ງຂ່າວຈາກ ແຂວງອັດຕະປື ໃຫ້ຮູ້ວ່າ: ໃນ 6 ເດືອນຕົ້ນປີ 2024 ການຂະຫຍາຍຕົວຂອງເສດຖະກິດ (ຈີດີພີ) ຂອງແຂວງອັດຕະປື ຂະຫຍາຍຕົວຕໍ່ເນື່ອງໃນລະດັບ 5,23%, ທຽບໃສ່ມະຕິຂອງສະພາແຂວງຮັບຮອງໝົດປີ ຫລຸດພຽງແຕ່ 1,63% ໃນນີ້, ຜົນຜະລິດເປັນສິນຄ້າ ຕິດພັນກັບການປຸງແຕ່ງເພື່ອສົ່ງອອກ ເຊັ່ນ: ມັນຕົ້ນ 29.000 ເຮັກຕາ, ຜົນຜະລິດ 7 ແສນໂຕນ, ອ້ອຍ 9 ພັນກວ່າເຮັກຕາ, ຜົນຜະລິດ 3 ແສນກວ່າໂຕນ. ນອກນີ້, ຍັງມີປະເພດໄມ້ໃຫ້ໝາກ, ກາເຟ, ພືດຜັກ ແລະ ອື່ນໆ ໂດຍສະເພາະ ການລົງທຶນ ເພື່ອປູກຖົ່ວລຽນ ຢູ່ເຂດເມືອງສະໜາມໄຊ ແລະ ໄຊເສດຖາ ກວມເອົາເນື້ອທີ່ຫລາຍພັນກວ່າເຮັກຕາ ນັບທັງຂອງບໍລິສັດເອກະຊົນ ຕ່າງປະເທດ ແລະ ບຸກຄົນ.
  ທ່ານ ພົນໂທ ວັນທອງ ກອງມະນີ ເຈົ້າແຂວງໆອັດຕະປື ໄດ້ລາຍງານໃນກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນ ແຂວງອັດຕະປື ຊຸດທີ II ໃນວັນທີ 30 ກໍລະກົດ 2024 ນີ້ວ່າ: ເຖິງວ່າປະເທດພວກເຮົາ ຍັງສືບຕໍ່ປະເຊີນກັບສະພາບຄວາມຫຍຸ້ງຍາກ ທາງດ້ານເສດຖະກິດມະຫາພາກ ເປັນຕົ້ນ ບັນຫາອັດຕາແລກປ່ຽນເງິນ, ລາຄາສິນຄ້າຂຶ້ນສູງກໍຕາມ, ແຕ່ດ້ວຍຄວາມພະຍາຍາມສຸມທຸກກໍາລັງແຮງຊຸກຍູ້ສົ່ງເສີມການຜະລິດ, ການອໍານວຍຄວາມສະດວກ ແກ່ການລົງທຶນໃໝ່ ໃນກິດຈະການປຸງແຕ່ງຜະລິດຕະພັນພາຍໃນ ແຂວງອັດຕະປື ບວກໃສ່ການຕື່ນຕົວຮ່ວມມືຂອງພໍ່ແມ່ປະຊາຊົນ ເຂົ້າໃນການຜະລິດເປັນສິນຄ້າ ໃນຫລາຍພື້ນທີ່ທົ່ວແຂວງຕາມທ່າແຮງ ແລະ ເງື່ອນໄຂ, ເຊິ່ງໃນໄລຍະ 6 ເດືອນຜ່ານມາ, ທາງອົງການປົກຄອງ ແຂວງອັດຕະປື ໄດ້ສຸມໃສ່ແກ້ໄຂສະພາບການບຸກລຸກທີ່ດິນ ແລະ ປ່າໄມ້ ໃນ 3 ປະເພດປ່າ, ມາຮອດປັດຈຸບັນ ເຮັດໃຫ້ສະພາບປ່າໄມ້ ໃນເຂດດັ່ງກ່າວ ເລີ່ມກ້າວເຂົ້າສູ່ສະພາບປົກກະຕິ ຕາມການຄາດຄະເນຂອງວິຊາການ ຖ້າບໍ່ຖືກທໍາລາຍອີກສະພາບປ່າໄມ້ຈະຟື້ນຟູຄືນໃນອີກ 3-4 ປີຂ້າງໜ້ານີ້, ສ່ວນອຸດສາຫະກຳປຸງແຕ່ງອັນໃໝ່ ແມ່ນໄດ້ເລີ່ມຜະລິດແປ້ງມັນຕົ້ນ ເປັນໂຮງງານທໍາອິດ ແລະ ຄາດວ່າໃນທ້າຍປີນີ້ ຈະສາມາດຜະລິດເປັນທາງການຕື່ມອີກ 2 ໂຮງງານ, ຄຽງຄູ່ກັນນີ້ ຍັງໄດ້ລະດົມ, ຊຸກຍູ້ການສໍາຫລວດຈັດສັນທີ່ດິນ, ປ່າໄມ້ຄືນໃໝ່ ເປັນຕົ້ນ ການສໍາຫລວດປ່າໝາກຈອງ ແລະ ການສໍາຫລວດຟື້ນຟູປ່າໄມ້ຄືນ ເພື່ອຂາຍກາກບອນ, ສຸມໃສ່ແກ້ໄຂການລັກລອບຂຸດຄົ້ນແຮ່ທາດ ໂດຍສົມທົບກັບສູນກາງ ເພື່ອເຮັດໃຫ້ວຽກດັ່ງກ່າວ ກ້າວໄປສູ່ຄວາມເປັນລະບຽບ ທັງຮັບປະກັນບັນຫາສິ່ງແວດລ້ອມ ໂດຍສະເພາະ ອັນເລັ່ງດ່ວນໃນປັດຈຸບັນ ແມ່ນການເລັ່ງເກັບກູ້ແຮ່ຄໍາ ຢູ່ເຂດພູກ່ອງຢອງ ແລະ ປ້ອງກັນບໍ່ໃຫ້ສານເຄມີ ໄຫລລົງສູ່ອ່າງນໍ້າເຊກະໝານ 1, ການພັດທະນາພື້ນຖານໂຄງລ່າງ ແລະ ຄົມມະນາຄົມຂົນສົ່ງ ເປັນຕົ້ນ ສຸມໃສ່ປູຢາງເສັ້ນທາງ 18A ໄລຍະ 2 ມາຮອດປັດຈຸບັນ ແມ່ນສໍາເລັດປູຢາງຊັ້ນ 1 ໂດຍພື້ນຖານ ເຮັດໃຫ້ການກໍ່ສ້າງໄລຍະ 1 ແລະ ໄລຍະ 2 ເຊື່ອມຈອດໃສ່ກັນ, ສຸມໃສ່ກໍ່ສ້າງໂຄງການນໍ້າປະປາເທສະບານແຂວງ ແລະ ເມືອງສະໜາມໄຊ ເພື່ອຮອງຮັບ ແກ່ການພັດທະນາໃນຕໍ່ໜ້າ, ເປີດບໍລິການທົດລອງແລ່ນລົດໂດຍສານ ແບບລົດເມ ໃນສາຍທາງຕ່າງໆຂອງແຂວງ ແນໃສ່ຊຸກຍູ້ການຂົນສົ່ງໂດຍສານ ແລະ ຮອງຮັບການທ່ອງທ່ຽວ.

KPL