ຂປລ.ວິທະຍຸ ສາກົນ ແຫ່ງ ສປ ຈີນ,ວັນທີ12 ກໍລະກົດນີ້, ການປະຕິຮູບ ແລະ ເປີດປະຕູ ສູ່ພາຍນອກ ເປັນນະໂຍບາຍ ພື້ນຖານ ແຫ່ງຊາດ ຂອງພັກກອມມູນິດຈີນ ໃນການບໍລິຫານປະເທດ. ນະໂຍບາຍນີ້ ແມ່ນເລີ່ມ ສະເໜີອອກ ໃນກອງປະຊຸມ ຄົບຄະນະ ຄັ້ງທີ3 ຂອງສູນກາງພັກ ກອມມູນິດຈີນ ສະໄໝ ທີ11 ພາຍໃຕ້ ການເປັນປະທານ ຂອງ ທ່ານ ເຕີ້ງ ສ້ຽວຜິງເມື່ອປີ1978 ແລະ ໄດ້ຮັບການລົງເລິກ ຢ່າງຮອບດ້ານ ຈາກກອງປະຊຸມ ຄົບຄະນະຄັ້ງທີ3 ຂອງສູນກາງພັກກອມມູນິດຈີນ ສະໄໝທີ18 ພາຍໃຕ້ ການເປັນປະທານ ຂອງ ທ່ານ ສີ ຈິ້ນຜິງ ເມື່ອປີ2013. ສະນັ້ນ, ເນື່ອງໃນໂອກາດ ກອງປະຊຸມ ຄົບຄະນະຄັ້ງທີ3 ຂອງຄະນະ ກຳມະການ ສູນກາງພັກ ກອມມູນິດຈີນ ສະໄໝ ທີ20 ຈະຈັດຂຶ້ນ ລະຫວ່າງ ວັນທີ15-18ກໍລະກົດນີ້ ຢູ່ນະຄອນຫລວງ ປັກກິ່ງ ຈະຮັບຮູ້ ນະໂຍບາຍ ການປະຕິຮູບ ຂອງ ສປ ຈີນ ໃນຍຸກໃໝ່. ກອງປະຊຸມ ຄົບຄະນະຄັ້ງທີ 3 ຂອງຄະນະກຳມະການສູນກາງພັກ ກອມມູນິດຈີນ ສະໄໝທີ 20 ຈະຈັດຂຶ້ນ ລະຫວ່າງ ວັນທີ 15 ຫາ 18 ກໍລະກົດ 2024ຢູ່ນະຄອນຫລວງ ປັກກິ່ງ ປະເທດຈີນ ຊຶ່ງຈະລົງ ບົດຄວາມຕ່າງໆ, ເພື່ອບັນລະຍາຍ ນະໂຍບາຍ ການປະຕິຮູບ ຂອງ ສປ ຈີນ ໃນຍຸກໃໝ່ ແລະ ຖອດຖອນບົດຮຽນ ການພັດທະນາ ປະເທດຊາດ. ຕອນທີ 1: ຜ່ານຜ່າ ຂອດຫຍຸ້ງຍາກ ທີ່ສຸດ ສະແຫວງຫາ ເປົ້າໝາຍ ທີ່ຍິ່ງໃຫຍ່ ແລະ ສູງສົ່ງທີ່ສຸດຕົ້ນໄຮ ພູເຂົາ ເປັນຕົ້ນໄມ້ ຊະນິດໜຶ່ງ ທີ່ມັກເຫັນຢູ່ ເລື້ອຍໆ ຢູ່ພາກໃຕ້ຈີນ. ຕົ້ນໄມ້ ຊະນິດນີ້ ມີຄວາມເຂັ້ມແຂງ, ສາມາດ ຕ້ານທານ ຕໍ່ຄວາມແຫ້ງແລ້ງໄດ້, ປູກງ່າຍ ແລະ ລອດເຫລືອງ່າຍ ມີຄວາມໝາຍເຖິງ ຄວາມຈະເລີນຮຸ່ງເຮືອງ ແລະ ສ້າງຄວາມສຸກ ໃຫ້ແກ່ ທ້ອງຖິ່ນ. ນະຄອນເຊີ່ນເຈີ້ນ ແຂວງກວາງຕຸ່ງ ເປັນເຂດເສດຖະກິດ ພິເສດ ແຫ່ງທຳອິດ ຂອງ ສປ ຈີນ ທີ່ ທ່ານ ເຕີ້ງ ສ້ຽວຜິງ ຫົວໜ້າຊ່າງ ອອກແບບ ການປະຕິຮູບ ແລະ ເປີດປະຕູ ສູ່ພາຍນອກ ຂອງ ສປ ຈີນ ກຳນົດສ້າງຂຶ້ນ ເມື່ອປີ 1979. ເປັນເວລາ ພຽງແຕ່ 30ປີ ເທົ່ານັ້ນ, ຕົວເມືອງແຫ່ງນີ້ ຈາກເມືອງນ້ອຍ ແຄມຝັ່ງທະເລຈີນໃຕ້ ທີ່ມີປະຊາກອນ ບໍ່ຮອດ 30.000 ຄົນ ໄດ້ຖືກພັດທະນາ ໃຫ້ກາຍ ເປັນມະຫານະຄອນ ທີ່ທັນສະໄໝ ລະດັບໂລກ ທີ່ມີປະຊາກອນເກືອບ 18.000.000 ຄົນ. ອັດຕາ ການເຕີບໂຕ ຂອງລວມຍອດ ຜະລິດຕະພັນພາຍໃນ ຫລື GDP ສະເລ່ຍແລ້ວ ບັນລຸເຖິງ 24,8% ຕໍ່ປີ ຖືວ່າ ໄດ້ສ້າງສິ່ງມະຫັດສະຈັນ ເຊີ່ນເຈີ້ນທີ່ເຮັດໃຫ້ຊາວໂລກ ຮູ້ສຶກໜ້າ ງຶດງໍ້ຫລາຍ ແລະ ໄດ້ກາຍເປັນ ຕົວແບບ ຂອງການປະຕິຮູບ ແລະ ເປີດປະຕູ ສູ່ພາຍນອກຂອງ ສປ ຈີນ. ຕົ້ນໄຮພູເຂົາ ສອງຕົ້ນ ທີ່ມີເລື່ອງລາວ ທີ່ໜ້າສົນໃຈ ຢູ່ນະຄອນ ເຊີ່ນເຈີ້ນ ຕົ້ນໜຶ່ງແມ່ນ ທ່ານ ເຕີ້ງສ້ຽວຜິງ ປູກໃນເວລາ ລົງເຄື່ອນໄຫວ ຢ້ຽມຢາມ ແລະ ເຮັດວຽກ ຢູ່ເຊີ່ນເຈີ້ນ ເມື່ອເດືອນມັງກອນ ປີ1992. ອີກຕົ້ນໜຶ່ງ ແມ່ນທ່ານ ສີ ຈິ້ນຜິງ ຜູ້ນຳສູງສຸດ ຂອງ ສປ ຈີນ ປູກໃນເວລາ ທີ່ເພິ່ນລົງເຄື່ອນໄຫວ ຢ້ຽມຢາມ ແລະ ເຮັດວຽກ ຢູ່ແຂວງກວາງຕຸ້ງ ເມື່ອວັນທີ8 ທັນວາ2012 ເຊິ່ງເປັນມື້ ທີ24 ຫລັງຈາກເພິ່ນໄດ້ຮັບ ເລືອກຕັ້ງ ເປັນເລຂາ ທິການໃຫຍ່ ຄະນະ ກຳມະການ ສູນກາງພັກ ກອມມູນິດຈີນ ເປັນຄັ້ງທຳອິດ. ມື້ນັ້ນ, ທ່ານ ສີ ຈິ້ນຜິງ ໄດ້ວາງກະຕ່າ ດອກໄມ້ ຢູ່ຕໍ່ໜ້າ ຮູບປັ້ນທອງ ຂອງທ່ານ ເຕີ້ງ ສ້ຽວຜິງ ແລ້ວໄດ້ກົ້ມຫົວ ໄວ້ອາໄລ ດ້ວຍຄວາມເຄົາລົບ ນັບຖື ເປັນຢ່າງສູງ ພ້ອມທັງ ໄດ້ຈ້ອງມອງ ເບິ່ງພາບ ຂອງທົ່ວນະຄອນ ເຊີ່ນເຈີ້ງ ຢູ່ເທີງຈອມພູ. ໃນການຢ້ຽມຢາມເຊີ່ນເຈີ້ນຄັ້ງນີ້, ທ່ານ ສີ ຈິ້ນຜິງ ໄດ້ເວົ້າໂດຍກົງວ່າ: “ມາກວາງຕຸ້ງເທື່ອນີ້ ຈຸດປະສົງ ກໍເພື່ອ ທົບທວນຄືນ ຂະບວນ ວິວັດປະຫວັດ ການປະຕິຮູບ ແລະ ເປີດປະຕູ ສູ່ພາຍນອກ ຂອງ ສປ ຈີນ ຢູ່ກັບບ່ອນທີ່ ນຳໜ້າ ດຳເນີນ ການປະຕິຮູບ ແລະ ເປີດປະຕູ ສູ່ພາຍນອກ ກ່ອນໝູ່ ໃນທົ່ວປະເທດຈີນ ເພື່ອສືບຕໍ່ ຊຸກຍູ້ ພາລະກິດ ການປະຕິຮູບ ແລະ ເປີດປະຕູ ສູ່ພາຍນອກໃຫ້ຂະຫຍາຍຕົວ ໄປຂ້າງໜ້າ.” ກໍແມ່ນການເຄື່ອນໄຫວ ຢ້ຽມຢາມ ເພື່ອຕາມຫາຮອຍ ບາດກ້າວ ຍ່າງຂອງຄົນຮຸ່ນກ່ອນ ເທື່ອນັ້ນເອງ, ທ່ານ ສີ ຈິ້ນຜິງ ໄດ້ຊີ້ໃຫ້ເຫັນ ຢ່າງຈະແຈ້ງວ່າ “ການປະຕິຮູບ ແລະ ເປີດປະຕູ ສູ່ພາຍນອກ ເປັນມາດຕະການ ທີ່ເປັນຂໍກຸນແຈ ສຳຄັນ ທີ່ຕັດສິນຊາຕາກຳ ຂອງ ສປ ຈີນ ໃນຍຸກ ປັດຈຸບັນ”, ເພິ່ນໄດ້ອອກຄຳສັ່ງ ເພື່ອປຸກລະດົມຂົນຂວາຍ ທົ່ວພັກ ແລະ ປະຊາຊົນ ທົ່ວປະເທດ ໃຫ້ປະຕິບັດ ການປະຕິຮູບ ແລະ ເປີດປະຕູ ສູ່ພາຍນອກ ຢ່າງບໍ່ຢຸດຢັ້ງ ໃນຍຸກໃໝ່. ຈາກການ“ຢັ່ງຫີນຂ້າມນ້ຳ” ຈົນຮອດ ການແກ້ໄຂບັນຫາ “ຂົວ ແລະ ເຮືອ” ສປ ຈີນ ມີຄຳສຸພາສິດວ່າ: “ຢັ່ງຫີນ ຂ້າມນ້ຳ” ເປັນຄຳເວົ້າ ທີ່ສ່ອງແສງ ໃຫ້ເຫັນເຖິງ ສະຕິປັນຍາ ຂອງປະຊາຊົນຈີນ, ໝາຍຄວາມວ່າ: ເວລາ ຂ້າມນ້ຳ, ຢັ່ງກ້ອນຫີນ ເພື່ອຢຽບ ໃຫ້ໝັ້ນກ່ອນແລ້ວ ຈຶ່ງຢ່ວງບາດກ້າວຕໍ່ໄປ. ນີ້ແມ່ນວິທີສຳຄັນ ທີ່ໃຊ້ໃນການປະຕິຮູບ ແລະ ເປີດປະຕູ ສູ່ພາຍນອກ ທີ່ນຳພາໂດຍ ທ່ານ ເຕີ້ງ ສ້ຽວຜິງ. ຕໍ່ກັບການປະຕິຮູບ ແລະ ເປີດປະຕູ ສູ່ພາຍນອກ ທີ່ເປັນພາລະກິດໃໝ່ໆ ທີ່ບໍ່ເຄີຍມີ ມາກ່ອນ ໃນປະຫວັດສາດ, “ປັດຈຸບັນ ຍັງຢູ່ໃນໄລຍະ ການທາບທາມ, ນ້ຳເລິກ ຫລື ຕື້ນ ຍັງບໍ່ຮູ້ແຈ້ງເທື່ອ, ຕ້ອງຄ່ອຍຍ່າງໄປເບິ່ງ ໄປແຕ່ລະກ້າວ, ຂາສອງເບື້ອງ ຕ້ອງຍ່າງໄປ ຢ່າງໝັ້ນທ່ຽງ ຫາກໄປຜິດແລ້ວ ຕ້ອງຖອຍຄືນຫລັງແລ້ວ ຍ່າງໄປໃໝ່, ຢ່າສູ່ລົ້ມລົງນ້ຳໄປ.”ອັນນີ້ ກໍແມ່ນຄຳອະທິບາຍຢ່າງມີຊີວິດ ຊີວາ ກ່ຽວກັບ ວິທີການແບບ “ຢັ່ງຫີນຂ້າມນ້ຳ” ເຊິ່ງໄດ້ລະບຸໄວ້ ໃນເອກະສານ ທາງການ ຕອນທີ່ ສປ ຈີນ ຫາກໍ່ ປະຕິບັດ ການປະຕິຮູບ ແລະ ເປີດປະຕູ ສູ່ພາຍນອກ ເມື່ອຕົ້ນ ຊຸມປີ1980, ຄຳອະທິບາຍ ດັ່ງກ່າວ ໄດ້ຊີ້ແຈງ ຢ່າງຖືກຕ້ອງ ລະອຽດວ່າ ພາຍໃຕ້ ກໍລະນີ ທີ່ບໍ່ມີປະສົບ ການພຽງພໍ ແມ່ນຄວນ ກ້າວເດີນໄປ ຂ້າງໜ້າ ແບບທາບທາມ ຄືແນວໃດ. ຜູ້ທີ່ຮູ້ດີ ກ່ຽວກັບ ພັກກອມມູນິດຈີນ ບໍລິຫານ ປະເທດ ຄືແນວໃດ ອາດຈະຮູ້ວ່າ: ກອງປະຊຸມໃຫຍ່ ຜູ້ແທນ ທົ່ວປະເທດ ຂອງພັກກອມມູນິດຈີນ ແມ່ນ ທຸກໆ 5 ປີ ຈັດຂຶ້ນຄັ້ງໜຶ່ງເພື່ອ ເປິກສາຫາລື ແລະ ຕົກລົງບັນຫາ ສຳຄັນຂອງພັກ, ຕາມປົກກະຕິແລ້ວ, ລະຫວ່າງ ກອງປະຊຸມໃຫຍ່ ຜູ້ແທນ ທົ່ວປະເທດຈີນ ສອງຄັ້ງ, ຈະຈັດກອງປະຊຸມ ຄົບຄະນະ ຂອງຄະນະກຳມະການ ສູນກາງພັກ ກອມມູນິດຈີນ 7 ເທື່ອ, ຈະວາງແຜນການກ່ຽວ ບຸກຄະລາກອນ, ສັງຄົມ, ເສດຖະກິດ, ການກໍ່ສ້າງພັກ ແລະ ຂົງເຂດອື່ນໆ, ແຕ່ສິ່ງທີ່ທ່ານ ອາດຈະບໍ່ຮູ້ນັ້ນກໍຄື: ເດືອນທັນວາປີ 1978, ກອງປະຊຸມ ຄົບຄະນະ ຄັ້ງທີ 3 ຂອງຄະນະ ກຳມະການ ສູນກາງພັກ ກອມມູນິດຈີນ ສະໄໝທີ 11 ທີ່ຈັດຂຶ້ນ ພາຍໃຕ້ ການເປັນປະທານ ຂອງ ທ່ານເຕີ້ງ ສຽວຜິງ ໄດ້ເປີດໄລຍະທີ່ “ປະຕິຮູບ ຢູ່ພາຍໃນ ແລະ ເປີດປະຕູ ສູ່ພາຍນອກ” ແບບໄຂສັງກາດໃໝ່, ຊຸກຍູ້ ໃຫ້ເສດຖະກິດ ສັງຄົມຈີນ ພັດທະນາ ຢ່າງຕໍ່ເນື່ອງ ແລະ ວ່ອງໄວ. ຫລັງຈາກນັ້ນ, ຫົວຂໍ້ປຶກສາຫາລື ຂອງກອງປະຊຸມ ຄົບຄະນະ ຄັ້ງທີ 3 ຂອງຄະນະກຳມະການສູນກາງພັກ ກອມມູນິດຈີນ ແຕ່ລະສະໄໝ ລ້ວນແຕ່ ໄດ້ສຸມໃສ່ ການລົງເລິກ ແລະ ຊຸກຍູ້ ການປະຕິຮູບ ແລະ ເປີດປະຕູ ສູ່ພາຍນອກ ຄືແນວໃດ. ຕົວຢ່າງວ່າ ກອງປະຊຸມ ຄົບຄະນະຄັ້ງທີ 3 ຂອງຄະນະ ກຳມະການ ສູນກາງພັກ ກອມມູນິດຈີນ ສະໄໝທີ 12 ທີ່ຈັດຂຶ້ນໃນປີ 1984 ໄດ້ວາງແຜນນະໂຍບາຍ ການປະຕິຮູບ ໂຄງປະກອບ ເສດຖະກິດ ທີ່ຖືເອົາ ຕົວເມືອງ ເປັນຈຸດສຸມ; ກອງປະຊຸມຄັ້ງທີ 3 ຂອງຄະນະກຳມະການສູນກາງພັກ ກອມມູນິດຈີນສະໄໝທີ 14 ທີ່ຈັດຂຶ້ນໃນປີ 1993, ໄດ້ຊຸກຍູ້ ການປະຕິຮູບ ໂຄງປະກອບ ເສດຖະກິດ ຕະຫລາດ ສັງຄົມນິຍົມ. ການປະຕິຮູບ ແລະ ເປີດປະຕູ ສູ່ພາຍນອກ ຈຶ່ງໄດ້ກາຍເປັນນະໂຍບາຍ ພື້ນຖານແຫ່ງຊາດ ດ້ານການບໍລິຫານ ປະເທດ ຂອງພັກກອມມູນິດຈີນ. ມາຮອດ ປີ2013 ຄືປີຕໍ່ມາທີ່ ທ່ານ ສີ ຈິ້ນຜິງ ເດີນທາງໄປປູກຕົ້ນໄຮ ພູເຂົາ ຢູ່ນະຄອນ ເຊີ່ນເຈີ້ນ，ກອງປະຊຸມ ຄົບຄະນະຄັ້ງທີ3 ຂອງຄະນະ ກຳມະການ ສູນກາງພັກ ກອມມູນິດຈີນ ສະໄໝທີ18 ໄດ້ໄຂຂຶ້ນ，ຄະນະນຳຊຸດໃໝ່ ຂອງພັກກອມມູນິດຈີນ ຈະສືບຕໍ່ ຊຸກຍູ້ ການປະຕິຮູບ ຄືແນວໃດ, ເຊິ່ງໄດ້ກາຍເປັນ ຈຸດສຸມທີ່ດຶງດູດ ຄວາມສົນໃຈ ຂອງທົ່ວໂລກ. ເພາະວ່າ ໃນເວລານັ້ນ, ຈີນໄດ້ກ້າວໄປເຖິງຈຸດເວລາທີ່ສຳຄັນອັນໃໝ່ໃນປະຫວັດສາດ ແລະພວມປະເຊີນກັບ ບັນຫາໃໝ່ ທີ່ສຳຄັນຕ່າງໆ. ຢູ່ພາຍໃນປະເທດຈີນ, ຫລັງຈາກ ໄດ້ຜ່ານການເຕີບໂຕ ຢ່າງວ່ອງໄວ ມາເປັນເວລາ ຫລາຍສິບປີແລ້ວ, ບັນຫາ ຫຍຸ້ງຍາກ ດ້ານການເຕີບໂຕໄດ້ຄ່ອຍໆປາກົດຂຶ້ນ, ຄວາມຕ້ອງການຂອງປະຊາຊົນ ທີ່ມີຕໍ່ຊີວິດ ການເປັນຢູ່ ທີ່ດີງາມ ໄດ້ປາກົດມີ ຈຸດພິເສດ ທີ່ມີຫລາຍຮູບແບບ, ບັນຫາດ້ານການພັດທະນາ ທີ່ບໍ່ດຸນດ່ຽງ ແລະ ບໍ່ເຕັມສ່ວນ ໄດ້ພົ້ນເດັ່ນຂຶ້ນ. ເມື່ອເບິ່ງ ໃນທົ່ວໂລກແລ້ວ ເຫັນວ່າ: ໂລກ ພວມປະເຊີນກັບ ສະພາບ ການປ່ຽນແປງ ຢ່າງໃຫຍ່ຫລວງ ແບບບໍ່ເຄີຍມີ ມາກ່ອນ ໃນຮອບຮ້ອຍປີ, ການປະຕິວັດ ດ້ານວິທະຍາສາດ ເຕັກນິກ ແລະ ອຸດສາຫະກຳ ຮອບໃໝ່ ພວມພັດທະນາຂຶ້ນ, ລັດທິ ປົກປ້ອງ ການຄ້າ ກັບກະແສ ແນວຄິດ ຕ້ານໂລກາພິວັດ ໄດ້ເພີ່ມຂຶ້ນ. ໂດຍປະເຊີນໜ້າກັບສິ່ງທ້າທາຍຕ່າງໆ ຈາກທັງ ພາຍໃນປະເທດ ແລະ ຕ່າງປະເທດ, ທ່ານ ສີ ຈິ້ນຜິງ ທີ່ຫາກໍ່ດຳລົງຕຳແໜ່ງ ເປັນເລຂາທິການໃຫຍ່ ຄະນະກຳມະການ ສູນກາງພັກ ກອມມູນິດຈີນ ໄດ້ 1 ປີ ໄດ້ໄຈ້ແຍກ ສະພາບການ, ກຳແໜ້ນທິດ ທາງປະຫວັດສາດ ອັນໃໝ່ ແຫ່ງການພັດທະນາຈີນ, ໂດຍນຳໃຊ້ ຄຳປຽບທຽບ ອັນມີຊີວິດ ຊີວາ ມາພັນລະນາ ຂະບວນການ ປະຕິຮູບຂອງ ສປ ຈີນ ວ່າ ໄດ້ເຂົ້າສູ່ “ເຂດນ້ຳເລິກ”ແລ້ວ. ກອງປະຊຸມ ຄົບຄະນະຄັ້ງທີ 3 ຂອງຄະນະ ກຳມະການ ສູນກາງພັກ ກອມມູນິດຈີນ ສະໄໝທີ 18 ໄດ້ຜ່ານຮັບຮອງ “ຂໍ້ຕົກລົງຂອງພັກ ກອມມູນິດຈີນ ກ່ຽວກັບ ບາງບັນຫາ ສຳຄັນ ດ້ານການລົງເລິກ ການປະຕິຮູບ ຢ່າງຮອບດ້ານ” ທີ່ ທ່ານ ສີ ຈິ້ນຜິງ ຮ່າງຂຶ້ນ ດ້ວຍຕົນເອງ. ຫລັງຈາກ ກອງປະຊຸມ ຄົບຄະນະຄັ້ງທີ 3 ຂອງຄະນະກຳ ມະການສູນກາງພັກ ກອມມູນິດຈີນ ສະໄໝທີ 11 ເມື່ອປີ 1978, ໄດ້ຊຸກຍູ້ ການປະຕິຮູບ ຂອງ ສປ ຈີນ ແບບໄຂ ສັງກາດໃໝ່ ອີກຄັ້ງໜຶ່ງ, ເປີດຍຸກໃໝ່ ແຫ່ງການລົງເລິກ ການປະຕິຮູບ ຢ່າງຮອບດ້ານ ແລະ ຊຸກຍູ້ ການປະຕິຮູບ ດ້ວຍການອອກແບບ ຢ່າງເປັນລະບົບ ໂດຍລວມ ແລະ ຖືເອົາ ຂໍ້ຕົກລົງ ດັ່ງກ່າວ ເປັນຈຸດເລີ່ມຕົ້ນໃໝ່ ແລະ ຢູ່ພາຍໃຕ້ການນຳພາ ຂອງ ທ່ານ ສີ ຈິ້ນຜິງ, ສປ ຈີນ ໄດ້ເປີດຂະບວນການ ລົງເລິກ ການປະຕິຮູບ ຢ່າງຮອບດ້ານ, ລົງໄປເຖິງ ບ່ອນເລິກ ທີ່ສຸດຂອງ “ເຂດນ້ຳເລິກ”. ມີຄົນຢາກຖາມວ່າ: ການລົງເລິກ ການປະຕິຮູບ ຢ່າງຮອບດ້ານ, ຈະຮອບດ້ານຢູ່ບ່ອນໃດ? ແລະ ເລິກລົງຮອດໃສ? ໃນຖານະເປັນຜູ້ນຳພາ ການປະຕິຮູບ ໃນຍຸກໃໝ່, ທ່ານ ສີ ຈິ້ນຜິງ ໄດ້ໃຫ້ຄຳຕອບ.ໃນເມື່ອການປະຕິຮູບ ຂອງ ສປ ຈີນ ໄດ້ກ້າວເຂົ້າສູ່ “ເຂດນ້ຳເລິກ” ແລ້ວ, ທາງດ້ານໜ້າ ຂອງການປະຕິຮູບ ໄດ້ເຕັມໄປດ້ວຍ ອຸປະສັກ ແລະ ຄວາມຫຍຸ້ງຍາກ ລຳບາກ, ຜູ້ປະຕິຮູບ ຈະແບກຫາບພາລະກຳ ອັນໜັກໜ່ວງຫລາຍ. ທ່ານ ສີ ຈິ້ນຜິງ  ເຄີຍຍົກເອົາ ບົດກະວີ ຂອງ ທ່ານ ຊູຊື້, ທີ່ເປັນນັກກະວີ ທີ່ມີ ຊື່ສຽງ ໃນລາຊະວົງຊົ້ງ ເມື່ອ 900 ກວ່າປີກ່ອນຄື: “ຟ້ານສີຈື້ໜານ ເອີຖູສີຈື້ຢວນ”, ເຊິ່ງໄດ້ສະແດງ ໃຫ້ເຫັນເຖິງ ສຽງໃນໃຈ ຂອງຜູ້ປະຕິຮູບ ໃນຍຸກໃໝ່ຄື: ຜ່ານຜ່າ ຂອດຫຍຸ້ງຍາກ ທີ່ສຸດ, ສະແຫວງຫາ ເປົ້າໝາຍ ອັນຍິ່ງໃຫຍ່ ແລະ ສູງສົ່ງທີ່ສຸດ.  ໃນຖານະ ເປັນນັກທິດສະດີ ແລະ ນັກປະຕິບັດ ຕົວຈິງ, ທ່ານ ສີ ຈິ້ນຜິງ ໄດ້ຈັດວາງໜ້າທີ່ ການປະຕິຮູບ ທີ່ພວມຢູ່ໃນ “ເຂດນ້ຳເລິກ”ນັ້ນຄວນ “ຂ້າມນ້ຳ”ຄືແນວໃດ, ທັງໄດ້ອອກແຮງແກ້ໄຂບັນຫາຍຸ້ງຍາກດ້ານເລິກຄື: “ຂົວ ຫຼື ເຮືອ”, ແຜນຍຸດທະສາດ ການລົງເລິກ ການປະຕິຮູບ ຢ່າງຮອບດ້ານ ທີ່ເພິ່ນສະເໜີ ອອກມານັ້ນ ມີບ່ອນອີງ ດ້ານທິດສະດີ ວິທະຍາສາດ, ທັງມີຊ່ອງທາງ ທີ່ມີປະສິດທິຜົນ.ໄດ້ສ້າງໃຫ້ເປັນ ແຜນການ ປະຕິຮູບ ທີ່ມີເນື້ອໃນ ອຸດົມສົມບູນ ທີ່ສຸດ, ຮອບດ້ານທີ່ສຸດ ແລະ ເປັນລະບົບ ທີ່ສຸດ ນັບແຕ່ ສປ ຈີນ ປະຕິບັດນະໂຍບາຍ ການປະຕິຮູບ ແລະ ເປີດປະຕູ ສູ່ພາຍນອກ ເມື່ອປີ1978 ເປັນຕົ້ນມາາ. ອີງຕາມ ແຜນການ ດັ່ງກ່າວ, ໂດຍໝາຍໝັ້ນ ເປົ້າໝາຍລວມ ແຫ່ງການລົງເລິກ ການປະຕິຮູບ ຢ່າງຮອບດ້ານ, ກ່ອນອື່ນ, ທ່ານ ສີ ຈິ້ນຜິງ ໄດ້ສ້າງແຜນວາດ ການຊຸກຍູ້ ການກໍ່ສ້າງ ລະບຽບການ ແລະ ລະບົບ ການບໍລິຫານ ປະເທດ ໃນຍຸກໃໝ່, ຖືເອົາການຊຸກຍູ້ ການຫັນເປັນ ທັນສະໄໝ ດ້ານລະບົບ ແລະ ຄວາມສາມາດ ການບໍລິຫານ ປະເທດ ເປັນແກນກາງ, ເພິ່ນໄດ້ຍຶດໝັ້ນ ຫລັກການ “ຜູ້ມີປັນຍານ້ອຍ ຊ່າງແກ້ໄຂ ບັນຫາຕົວຈິງ ບາງຢ່າງເທົ່ານັ້ນ, ຜູ້ມີປັນຍາໃຫຍ່ ຈະແກ້ໄຂ ບັນຫາ ດ້ວຍການສ້າງ ລະບຽບການ” ເຊິ່ງເປັນປັດຊະຍາ ຂອງຄົນຈີນ ໃນການບໍລິຫານ ປະເທດແບບ ດັ້ງເດີມ, ເນັ້ນໜັກ ການກໍ່ສ້າງ ດ້ານລະບຽບ ການທີ່ເປັນຫລັກ. ນີ້ກໍຄື ຈຸດພິເສດ ທີ່ພົ້ນເດັ່ນ ທີ່ສຸດ ຂອງນະໂຍບາຍ ການລົງເລິກ ການປະຕິຮູບ ຢ່າງຮອບດ້ານ. ສຳລັບ ການບໍລິຫານ ປະເທດ, ລະບຽບການ ຈະເສີມຂະຫຍາຍ ບົດບາດທີ່ມີລັກສະນະ ເປັນພື້ນຖານ, ໂດຍລວມ ແລະ ຍາວນານ. ຈາກນັ້ນ, ທ່ານ ສີ ຈິ້ນຜິງ ໄດ້ສະເໜີ ມາດຕະການ ປະຕິຮູບ 190 ຂໍ້ ທີ່ມີຄວາມໝາຍສຳຄັນ ຕໍ່ການປົກຄອງ ປະເທດ ຕາມກົດໝາຍ, ເຮັດໃຫ້ການປົກຄອງ ປະເທດ ຕາມກົດໝາຍ ກາຍເປັນ ການຮັບປະກັນ ດ້ານລະບຽບການ ທີ່ເຂັ້ມແຂງ ທີ່ສຸດ ຂອງການລົງເລິກ ການປະຕິຮູບ ຢ່າງຮອບດ້ານ, ນີ້ສາມາດເວົ້າໄດ້ວ່າ ໄດ້ແກ້ໄຂ ບັນຫາ ກ່ຽວກັບ “ຂົວ” ແລ້ວ. ກອງປະຊຸມ ຄົບຄະນະຄັ້ງທີ 3 ຂອງຄະນະ ກຳມະການ ສູນກາງພັກ ກອມມູນິດຈີນ ສະໄໝທີ 19 ໄດ້ພິຈາລະນາ ແລະ ຮັບຮອງ ຂໍ້ຕົກລົງ ແລະ ແຜນການກ່ຽວກັບ ການລົງເລິກ ການປະຕິຮູບ ຂອງພັກ ແລະ ອົງການ ຈັດຕັ້ງຂອງລັດ, ໄດ້ເປີດສາກ ການປະຕິຮູບ ອົງການຈັດຕັ້ງ ຂອງລັດ ທີ່ມີຂະໜາດໃຫຍ່ ທີ່ສຸດພາຍຫລັງ ປະຕິບັດ ນະໂຍບາຍ ການປະຕິຮູບ ແລະ ເປີດປະຕູ ສູ່ພາຍນອກ, ເຊິ່ງໄດ້ຮັບປະກັນ ດ້ານອົງການຈັດຕັ້ງ ເພື່ອລົງເລິກ ການປະຕິຮູບ ຢ່າງຮອບດ້ານ, ທັງສາມາດ ເວົ້າໄດ້ວ່າ ໄດ້ແກ້ໄຂ ບັນຫາ “ເຮືອ” ແລ້ວ. ປີນີ້, ກ່ອນຈະຈັດກອງປະຊຸມ ຄົບຄະນະຄັ້ງທີ 3 ຂອງຄະນະ ກຳມະການ ສູນກາງພັກ ກອມມູນິດຈີນ ສະໄໝທີ 20, ທ່ານ ສີ ຈິ້ນຜິງ ໄດ້ໂອ້ລົມກັບ ນັກວິສາຫະກິດ, ທັງເປັນປະທານ ພິຈາລະນາ ແຜນການປະຕິຮູບ ຫລາຍສະບັບເຊັ່ນ: “ຄວາມເຫັນກ່ຽວກັບ ການບູລະນະ ລະບຽບການ ວິສາຫະກິດ ຍຸກປັດຈຸບັນ ທີ່ມີສີສັນ ພິເສດຂອງ ສປ ຈີນ” ເປັນຕົ້ນ, ເພິ່ນໄດ້ສະເໜີວ່າ: “ການລົງເລິກ ການປະຕິຮູບ ຢ່າງຮອບດ້ານ, ຕ້ອງກຳແໜ້ນ ຫົວຂໍ້ຫລັກ ທີ່ວ່າ ຄວາມທັນສະໄໝ ແບບຈີນ.” ເຊິ່ງໄດ້ສົ່ງສັນຍານ ອັນຈະແຈ້ງ ຂອງກອງປະຊຸມ ຄົບຄະນະ ຄັ້ງທີ3 ຂອງຄະນະ ກຳມະການ ສູນກາງພັກ ກອມມູນິດຈີນ ສະໄໝ ທີ20. ສະນັ້ນ ສາມາດ ເຫັນໄດ້ຢ່າງ ງ່າຍດາຍວ່າ: ໃນໄລຍະ 10ກວ່າປີ ຜ່ານມາ ພາຍຫລັງ ສປ ຈີນ ກ້າວເຂົ້າສູ່ ຍຸກໃໝ່, ທ່ານ ສີ ຈິ້ນຜິງ ໄດ້ຈັດເອົາ ການລົງເລິກ ການປະຕິຮູບ ຢ່າງຮອບດ້ານ ເຂົ້າໃນແຜນ ຍຸດທະສາດລວມ ແຫ່ງການ ບໍລິຫານ ປະເທດ, ອອກແບບ ຈາກຂັ້ນເທິງ ສູງສຸດ ຕໍ່ການລົງເລິກ ການປະຕິຮູບ ຢ່າງຮອບດ້ານ, ໄດ້ຊຸກຍູ້ ການປະຕິຮູບ ທີ່ຮອບດ້ານ, ເລິກເລິ່ງ ແລະ ມີລັກສະນະ ຂັ້ນພື້ນຖານ, ເຮັດໃຫ້ການປະຕິຮູບ ຂອງ ສປ ຈີນ ໄດ້ເກີດການປ່ຽນແປງ ຢ່າງມີລັກສະນະ ປະຫວັດສາດ ຈາກການ ທາບທາມ ໃນບາງພາກສ່ວນ, ຜ່ານຜ່າ ອຸປະສັກ ຈົນກາຍເປັນ ລະບົບ ແລະ ລົງເລິກ ຢ່າງຮອບດ້ານ./.

(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ

KPL