ຂປລ
ຂປລ. ໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX, ວັນທີ 26 ມິຖຸນາ 2024 ຜ່ານມາ, ທ່ານ ໄຊຍະເດດ ຜຸຍຍະວົງ ສາມະຊິກສະພາແຫ່ງຊາດ ເຂດເລືອກຕັ້ງທີ 13 ແຂວງສະຫວັນນະເຂດ ໄດ້ມີຄຳເຫັນແລກປ່ຽນ ໃສ່ຮ່າງກົດໝາຍວ່າດ້ວຍ ການສົ່ງເສີມການລົງທຶນ ສະບັບປັບປຸງ ໂດຍສະເໜີໃຫ້ເອົາວຽກເຂດເສດຖະກິດພິເສດເຂົ້າໃສ່ຕື່ມ, ພ້ອມທັງ ສະເໜີໃຫ້ລັດຖະບານ ລົງເລິກຂຸດຄົ້ນເອົາລາຍຮັບ ຈາກການດຳເນີນທຸລະກິດ ໃນຂົງເຂດບໍລິການ-ໂລຈິສຕິກ ທີ່ເປັນທ່າແຮງຂອງປະເທດເຮົາ.
![](https://kpl.gov.la/Media/Upload/News/Thumb/2024/06/27/14.jpg)
ຂປລ. ໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX, ວັນທີ 26 ມິຖຸນາ 2024 ຜ່ານມາ, ທ່ານ ໄຊຍະເດດ ຜຸຍຍະວົງ ສາມະຊິກສະພາແຫ່ງຊາດ ເຂດເລືອກຕັ້ງທີ 13 ແຂວງສະຫວັນນະເຂດ ໄດ້ມີຄຳເຫັນແລກປ່ຽນ ໃສ່ຮ່າງກົດໝາຍວ່າດ້ວຍ ການສົ່ງເສີມການລົງທຶນ ສະບັບປັບປຸງ ໂດຍສະເໜີໃຫ້ເອົາວຽກເຂດເສດຖະກິດພິເສດເຂົ້າໃສ່ຕື່ມ, ພ້ອມທັງ ສະເໜີໃຫ້ລັດຖະບານ ລົງເລິກຂຸດຄົ້ນເອົາລາຍຮັບ ຈາກການດຳເນີນທຸລະກິດ ໃນຂົງເຂດບໍລິການ-ໂລຈິສຕິກ ທີ່ເປັນທ່າແຮງ ຂອງປະເທດເຮົາ.
ທ່ານ ໄຊຍະເດດ ຜຸຍຍະວົງ ໄດ້ສະແດງຄວາມຊົມເຊີຍ ແລະ ເຫັນດີເປັນເອກະພາບ ຕໍ່ການປັບປຸງກົດໝາຍວ່າດ້ວຍການສົ່ງເສີມການລົງທຶນ ເພື່ອໃຫ້ສອດຄ່ອງຕາມແນວທາງນະໂຍບ່າຍຂອງພັກ, ລັດ ວາງອອກ ໂດຍໄດ້ສະເໜີ ໃຫ້ປັບປຸງບາງໝວດ, ບາງມາດຕາ ເພື່ອເຮັດໃຫ້ກົດໝາຍສະບັບນີ້, ຖືກຕ້ອງ, ຄົບຖ້ວນ, ຮັດກຸມ ແລະ ສອດຄ່ອງ ສາມາດນຳໄປຈັດຕັ້ງປະຕິບັດໄດ້ຢ່າງມີປະສິດທິພາບ, ປະສິດທິຜົນ. ພ້ອມນີ້, ທ່ານຍັງໄດ້ຮຽກຮ້ອງໃຫ້ລັດຖະບານ ລົງເລິກຂຸດຄົ້ນເອົາລາຍຮັບ ຈາກການດຳເນີນທຸລະກິດ ໃນຂົງເຂດການ ບໍລິການ-ໂລຈິສຕິກ ເຊິ່ງເປັນທ່າແຮງຂອງປະເທດພວກເຮົາ, ຫາກກຳນົດເປັນເຂດ ຫລື ເຂດການບໍລິການ, ເຂດພັດທະນາ ໂລຈິສຕິກ ທີ່ມີການຍົກເວັ້ນພາສີອາກອນໝົດທຸກຢ່າງ ແຕ່ມາໃຫ້ບໍລິການພາຍນອກ ເຫັນວ່າມັນບໍ່ມີຄວາມຍຸຕິທຳ ທາງດ້ານການດຳເນີນ ທຸລະກິດພາຍໃນປະເທດ ຈະເຮັດໃຫ້ບໍລິສັດຂົນສົ່ງພາຍໃນປະເທດ ລົ້ມລະລາຍໝົດ ແລະ ຈະເຮັດໃຫ້ພວກເຮົາບໍ່ມີລາຍຮັບ ທີ່ຈະມາສ້າງ-ສ້ອມແປງຖະໜົນຫົນທາງ ແລ້ວພາລະຈະຕົກເປັນຄວາມແບກຫາບຂອງສັງຄົມ, ສະເພາະການປັບປຸງ ລະບົບໂລຈິສຕິກ ໃຫ້ໄດ້ມາດຕະຖານສາກົນ ແມ່ນເຫັນດີ ແລະ ຊົມເຊີຍ ແຕ່ຕ້ອງໃຫ້ມີລາຍຮັບ ມາສ້າງ-ສ້ອມແປງທາງ ບໍ່ແມ່ນເຮົາຈະເຮັດທາງ-ສ້ອມແປງທາງ ໃຫ້ຜູ້ປະກອບການມາຫາເງິນ ໂດຍທີ່ພາກລັດ ບໍ່ໄດ້ຫຍັງຫລາຍ ເຊິ່ງເປັນທີ່ມາຂອງຄຳວ່າ ພວກເຮົາໄດ້ແຕ່ GDP ແຕ່ບໍ່ໄດ້ເມັດເງິນມາພັດທະນາ.
ທ່ານ ໄຊຍະເດດ ຜຸຍຍະວົງ ຍັງໃຫ້ຮູ້ອີກວ່າ: ການສ້າງຕັ້ງເຂດເສດຖະກິດພິເສດ ໃນໄລຍະຜ່ານມາ ແມ່ນພວກເຮົາບໍ່ເຄີຍມີ, ບໍ່ທັນມີບົດຮຽນ ແຕ່ຢາກໄດ້ ເພື່ອພັດທະນາປະເທດ, ຕົກມາເຖິງປັດຈຸບັນ ພວກເຮົາກໍເຮັດມາໄດ້ 21 ປີແລ້ວ, ມີບົດຮຽນຫລາຍແລ້ວ. ສະນັ້ນ, ຄວນຖອດຖອນບົດຮຽນ ເພື່ອບໍ່ໃຫ້ໝູ່ເອົາປຽບເຮົາຫລາຍເກີນໄປ, ໃຫ້ມີການອັດຊ່ອງວ່າງທີ່ເກີດຂຶ້ນ ຕາມຜົນການກວດສອບ ຂອງອົງການກວດສອບແຫ່ງລັດ. ສະເພາະການສະເໜີກຳນົດໃນກົດໝາຍ ເພື່ອຍົກເວັ້ນອາກອນກຳໄລ ໃຫ້ຜູ້ພັດທະນາ ຈາກ 10 ປີ ເປັນ 14 ປີ ນັ້ນເຫັນຄວນຮັກສາໄວ້ຄືເກົ່າ ເພາະທີ່ຜ່ານມາ ພວກເຮົາກໍບໍ່ໄດ້ ຜົນປະໂຫຍດໂດຍກົງຫຍັງຫລາຍ ຈາກເຂດເສດຖະກິດພິເສດ ແລະ ມາເຖິງປັດຈຸບັນ ພວກເຮົາກໍຕ້ອງການເມັດເງິນມາແກ້ໄຂ ຄວາມຫຍຸ້ງຍາກທາງ ດ້ານເສດຖະກິດ-ການເງິນ ກໍຄື ຊີວິດການເປັນຢູ່ຂອງປະຊາຊົນບັນດາເຜົ່າ.
ຕໍ່ກັບການສະເໜີກຳນົດອະນຸຍາດ ໃຫ້ເຂດເສດຖະກິດພິເສດ-ເຂດເສດຖະກິດສະເພາະ ສາ ມາດ ນຳເອົາສິ່ງເສດເຫລືອມາບຳບັດ-ໃຊ້ຄືນ ແມ່ນບໍ່ເຫັນດີ ແລະ ສະເໜີຕັດອອກ ເພື່ອໃຫ້ໄປລວງດຽວກັບ ຮ່າງກົດໝາຍວ່າດ້ວຍ ສິ່ງແວດລ້ອມ ມາດຕາ 81 ຂໍ້ 3 ເຊິ່ງໄດ້ນຳມາຜ່ານກອງປະຊຸມສະພາ ໃນອາທິດຜ່ານມາ ທີ່ໄດ້ກຳນົດວ່າ ຫ້າມເອົາຂີ້ເຫຍື້ອທົ່ວໄປ, ຂີ້ເຫຍື້ອເອເລັກໂຕຣນິກ, ໝໍ້ໄຟເກົ່າເຂົ້າມາໃນ ສປປ ລາວ, ບັນພະບູລຸດຂອງພວກເຮົາ ໂດຍສະເພາະ ປະທານ ໄກສອນ ພົມວິຫານ ແລະ ບັນດານັກຮົບປະຕິວັດ ໄດ້ເສຍສະຫລະເຫື່ອແຮງ, ສະຕິປັນຍາ ແລະ ເລືອດເນື້ອ ຍາດເອົາເອກະລາດມາໃຫ້ພວກເຮົາພັດທະນາ ໄປສູ່ສັງຄົມນິຍົມ ບໍ່ແມ່ນເພື່ອພັດທະນາເປັນຖັງຂີ້ເຫຍື້ອໃຫ້ປະເທດອື່ນ.
ຂ່າວ: ກິດຕາ
KPL