ຂປລ
ຂປລ. ສູນກາງຊາວໜຸ່ມປະຊາຊົນ ປະຕິວັດລາວ (ສຊປລ) ຈັດປາຖະກະຖາວັນເກີດປະທານ ຄໍາໄຕ ສີພັນດອນຄົບຮອບ 100 ປີ(8 ກຸມພາ 1924-8 ກຸມພາ 2024) ໃນວັນທີ 12 ກຸມພາ 2024
ຂປລ. ສູນກາງຊາວໜຸ່ມປະຊາຊົນ ປະຕິວັດລາວ (ສຊປລ) ຈັດປາຖະກະຖາວັນເກີດປະທານ ຄໍາໄຕ ສີພັນດອນຄົບຮອບ 100 ປີ(8 ກຸມພາ 1924-8 ກຸມພາ 2024) ໃນວັນທີ 12 ກຸມພາ 2024 ໂດຍການປາຖະກະຖາຂອງ ທ່ານ ມອນໄຊ ລາວມົວຊົ່ງ ເລຂາຄະນະບໍລິຫານງານ ສຊປລ, ມີບັນດາຫົວໜ້າກົມ-ຮອງກົມ, ພະນັກງານ-ລັດຖະກອນ ເຂົ້າຮ່ວມຮັບຟັງ. ທັງນີ້ ກໍເພື່ອລະນຶກເຖິງຄຸນງາມ ຄວາມດີຂອງປະທານ ຄຳໄຕ ສີພັນດອນ ທີ່ມີຕໍ່ປະເທດຊາດ ແນໃສ່ຮຽນຮູ້ ແລະ ນຳເອົາແບບຢ່າງທີ່ດີຂອງເພີ່ນ ມາໝູນໃຊ້ເຂົ້າໃນການຈັດຕັ້ງ, ເຄື່ອນໄຫວ ແລະ ການດຳລົງຊີວິດຂອງພະນັກງານ, ສະມາຊິກພັກ, ປະຊາຊົນ ແລະ ຊັ້ນຄົນຕ່າງໆ, ເພື່ອສືບຕໍ່ພັດທະນາປະເທດກ້າວຂຶ້ນຕາມອຸດົມການຂອງພັກຢ່າງມີໄຊ.
ໂອກາດນີ້, ທ່ານ ມອນໄຊ ລາວມົວຊົ່ງ ກໍໄດ້ຍົກໃຫ້ເຫັນເຖິງຊີວິດເຍົາໄວ ແລະ ຈຸດເລີ່ມຕົ້ນປະຫວັດການເຄື່ອນໄຫວຂອງ ປະທານ ຄຳໄຕ ສີພັນດອນ ໃນແຕ່ລະໄລຍະນັບຕັ້ງແຕ່ປີ 1931-2006 ຈົນເຖິງປັດຈຸບັນ, ປະທານ ຄຳໄຕ ສີພັນດອນ ແມ່ນຜູ້ໜຶ່ງໃນບັນດາຜູ້ນຳຮຸ່ນກໍ່ຕັ້ງຂະບວນການ ແລະ ບຸກເບີກເສັ້ນທາງປະຕິວັດຢູ່ປະເທດເຮົາ ຊຶ່ງເວລາໃດກໍໜັກແໜ້ນ ທາງດ້ານການເມືອງ, ສະຕິຕໍ່ການຈັດ ຕັ້ງ, ມີຄວາມຮັບຜິດຊອບສູງ ຕໍ່ໜ້າທີ່ທີ່ໄດ້ຮັບມອບໝາ ຍ ເລີ່ມຈາກພະນັກງານທຳມະດາ ກາຍເປັນຜູ້ຊີ້ນຳ-ບັນຊາ ແລະ ນຳພາຂະບວນການ ຕໍ່ສູ້ປົດປ່ອຍຊາດ ຄຽງບ່າຄຽງໄຫລ່ ກັບ ປະທານ ໄກສອນ ພົມ ວິຫານ, ປະທານ ສຸພານຸວົງ ແລະ ຜູ້ນໍາຄົນອື່ນໆ ຂອງແນວລາວຮັກຊາດ ໄດ້ຮັບໄຊຊະນະສະຖາປະນາ ສປປ ລາວ ຂຶ້ນຢ່າງສະຫງ່າຜ່າເຜີຍໃນວັນທີ 2 ທັນວາ 1975, ປະກອບສ່ວນຄົ້ນຄວ້າ ແລະ ກໍານົດທິດທາງຍຸດທະສາດປົກປັກຮັກສາ ແລະ ສ້າງສາພັດທະນາປະເທດຊາດ ລວມທັງແນວທາງ ປ່ຽນແປງໃໝ່ ຢ່າງຖືກຕ້ອງສອດຄ່ອງ, ທັງໄດ້ນຳພາ-ຊີ້ນຳການຈັດຕັ້ງປະຕິບັດ ໄດ້ຮັບຜົນສຳເລັດໃນຫລາຍດ້ານ.
ພ້ອມນີ້, ທ່ານ ມອນໄຊ ລາວມົວຊົ່ງ ຍັງໄດ້ເນັ້ນໃຫ້ສະມາຊິກພັກ, ພະນັກງານທັງໝົດຂອງ ສຊປລ ຈົ່ງພ້ອມກັນຕັ້ງໜ້າສຶກສາຄົ້ນຄວ້າຮໍ່າຮຽນ ເອົາຄຸນສົມບັດສິນທໍາປະຕິວັດ, ຄວາມຈົງຮັກພັກດີ, ຄວາມບໍລິສຸດຜຸດຜ່ອງ, ຄວາມມານະອົດທົນ, ອຸ່ນອ່ຽນທຸ່ນທ່ຽງ, ມີໄຫວພິບໃນການຈັດຕັ້ງປະຕິບັດ ບັນດາໜ້າທີ່ວຽກງານ ທີ່ຕົນຮັບຜິດຊອບ ເພື່ອອຸທິດຕົນໃຫ້ ພາລະກິດປະຕິວັດເພື່ອຊາດ ເພື່ອປະຊາຊົນຂອງ ປະທານ ຄຳໄຕ ສີພັນດອນ ຜູ້ນໍາທີ່ແສນເຄົາລົບຮັກ ເພື່ອມາໝູນໃຊ້ເຂົ້າໃນການປະຕິບັດໜ້າທີ່ວຽກງານໃນປັດຈຸບັນ.
KPL
