ຂປລ
“ທ່ານ ຈາວາດ ອາວຈີ ລັດຖະມົນຕີ ກະຊວງ ນໍ້າມັນ ຂອງ ອີຣານ ປະກາດວ່າ ອີຣານ ຄົ້ນພົບ ແຫລ່ງນໍ້າມັນ ແລະ ແຫລ່ງແກັສ 4 ແຫ່ງໃໝ່ ໄລຍະ 2 ປີຜ່ານມາ.
ຂປລ. ສຳນັກຂ່າວ ຊິນຮວາ ຂອງ ສປຈີນ, ວັນທີ 5 ເດືອນຕຸລາ, ທ່ານ ຈາວາດ ອາວຈີ ລັດຖະມົນຕີ ກະຊວງ ນໍ້າມັນ ຂອງ ອີຣານ ປະກາດວ່າ ອີຣານ ຄົ້ນພົບ ແຫລ່ງນໍ້າມັນ ແລະ ແຫລ່ງແກັສ 4 ແຫ່ງໃໝ່ ໄລຍະ 2 ປີຜ່ານມາ. ສຳນັກຂ່າວ ໄອເອສ ເອັນເອ ຂອງ ອີຣານ (ISNA) ລາຍງານວ່າ: ທ່ານ ຈາວາດ ອາວຈີ ໄດ້ເປີດເຜີຍ ປະເດັນ ດັ່ງກ່າວ ໃນລະຫວ່າງ ກອງປະຊຸມ ຄະນະລັດຖະມົນຕີ ໃນນະຄອນຫລວງ ເຕເຮຣັງ ຂອງ ອີຣານ ໂດຍລະບຸວ່າ ແຫລ່ງນໍ້າມັນ ແລະ ແຫລ່ງແກັສ ທີ່ ຄົ້ນພົບໃໝ່ນີ້ ມີປະລິມານ ສຳຮອງ ທີ່ ສາມາດ ຜະລິດໄດ້ (recoverable reserves) ໂດຍສະເພາະ ປະລິມານ ສຳຮອງ ນໍ້າມັນ ແລະ ແກັສ ທີ່ມີ ຄວາມເປັນໄປໄດ້ ວ່າຈະນໍາມາ ສະກັດ ທາງດ້ານ ເສດຖະກິດ ແລະ ເຕັກນິກ ຕາມລາຄາ ນໍ້າມັນ ທີ່ມີຢູ່ ໃນປັດຈຸບັນ ລວມມີ 2,6 ຕື້ຖັງ.
ທ່ານ ຈາວາດ ອາວຈີ ກ່າວວ່າ ແຫລ່ງນໍ້າມັນ ແລະ ແຫລ່ງແກັສ ແຫ່ງໃໝ່ນີ້ ໄດ້ແກ່ ແຫລ່ງແກັສ ເຊຊເມ ຊວາ (Cheshmehshour) ໃນແຂວງໂຄຣາຊານ ຣາຊາວີ ທາງພາກຕາເວັນອອກສຽງເໜືອ, ບໍ່ນໍ້າມັນ ເຮີຣກັນ (Hirkan) ແຂວງ ໂກເລສຕັນ ທາງພາກເໜືອ ລວມເຖິງ ແຫລ່ງນໍ້າມັນ ເທນກູ (Tengoo) ແລະ ເກນາເວ (Genaveh) ແຂວງ ບູເຊຣ ທາງພາກໃຕ້ ຂອງປະເທດ. /
KPL
