ຂປລ
ຂປລ. ເປັນທີ່ຮັບຮູ້ກັນ ຢ່າງກວ້າງຂວາງແລ້ວວ່າ ໄຕ້ຫວັນແມ່ນສ່ວນໜຶ່ງ ຂອງປະເທດຈີນ ມາແຕ່ບູ ຮານນະການ ເຊິ່ງເປັນຄວາມຈິງຢ່າງຈະແຈ້ງ ທາງດ້ານປະຫວັດສາດ ແລະ ທາງດ້ານກົດໝາຍ ທີ່ບໍ່ສາ ມາດປະຕິເສດໄດ້. ປີ 1971 ອົງການສະຫະປະຊາຊາດ ໄດ້ຮັບຮອງເອົາຍັດຕິສະບັບ 2758 ວ່າດ້ວຍການຟື້ນຟູຖານະ ທາງດ້ານກົດໝາຍຂອງ ສປ ຈີນ
ຂປລ. ເປັນທີ່ຮັບຮູ້ກັນ ຢ່າງກວ້າງຂວາງແລ້ວວ່າ ໄຕ້ຫວັນແມ່ນສ່ວນໜຶ່ງ ຂອງປະເທດຈີນ ມາແຕ່ບູ ຮານນະການ ເຊິ່ງເປັນຄວາມຈິງຢ່າງຈະແຈ້ງ ທາງດ້ານປະຫວັດສາດ ແລະ ທາງດ້ານກົດໝາຍ ທີ່ບໍ່ສາ ມາດປະຕິເສດໄດ້. ປີ 1971 ອົງການສະຫະປະຊາຊາດ ໄດ້ຮັບຮອງເອົາຍັດຕິສະບັບ 2758 ວ່າດ້ວຍການຟື້ນຟູຖານະ ທາງດ້ານກົດໝາຍຂອງ ສປ ຈີນ ຢູ່ອົງການສະຫະປະຊາຊາດ ເຊິ່ງຍັດຕິສະບັບດັ່ງກ່າວໄດ້ຮັບຮູ້ຈີນດຽວ ໝາຍເຖິງໃນໂລກນີ້ມີພຽງຈີນດຽວ. ລັດຖະບານ ແຫ່ງ ສາທາລະນະລັດ ປະຊາຊົນຈີນ ແມ່ນລັດຖະບານທີ່ຖືກຕ້ອງ ຕາມກົດໝາຍແຕ່ພຽງໜຶ່ງດຽວ, ໄຕ້ຫວັນແມ່ນສ່ວນໜຶ່ງຂອງຈີນ.
ພັກ ແລະ ລັດຖະບານ ຈີນ ຍາມໃດກໍຖືວ່າປະຊາຊົນໄຕ້ຫວັນ ເປັນພີ່ນ້ອງຮ່ວມຊາດດຽວກັນ ແລະ ໄດ້ປັບປຸງສົ່ງເສີມ ການພົວພັນ ລະຫວ່າງ ສອງຝັ່ງຊ່ອງແຄບໄຕ້ຫວັນເປັນກ້າວໆມາ, ເຮັດໃຫ້ການແລກປ່ຽນ ແລະ ການຮ່ວມມື ລະຫວ່າງ ສອງຝັ່ງນັບມື້ນັບກວ້າງອອກ ແລະ ເປັນຮູບປະທຳ, ການໄປມາ ຫາສູ່ກັນຂອງປະຊາຊົນ ສອງຝັ່ງກໍນັບມື້ນັບຫລາຍ, ນຳເອົາຜົນປະໂຫຍດຕົວຈິງ ມາໃຫ້ແກ່ພີ່ນ້ອງຮ່ວມຊາດ ສອງຝັ່ງຊ່ອງແຄບໄຕ້ຫວັນ. ເຖິງຢ່າງໃດກໍຕາມ ໃນໄລຍະຫລັງມານີ້ ໄດ້ມີກຸ່ມກ້ອນຈຳນວນໜຶ່ງ ໄດ້ສ້າງຂະບວນການແນໃສ່ ແບ່ງແຍກໄຕ້ຫວັນໃຫ້ເປັນ ເອກະລາດຈາກ ສປ ຈີນ ເຊິ່ງເປັນການຂັດກັບຫລັກການຈີນດຽວ ກໍຄືເຈດຕະນາລົມ ຂອງວົງຄະນະຍາດສາກົນ, ສົ່ງຜົນກະທົບ ຕໍ່ການພົວພັນຮ່ວມມື ລະຫວ່າງສອງຝັ່ງຊ່ອງແຄບໄຕ້ຫວັນ, ເຮັດໃຫ້ສະຖານະການ ຢູ່ຊ່ອງແຄບໄຕ້ຫວັນ ກໍຄືສະຖານະການ ຢູ່ພາກພື້ນອາຊີຕາເວັນອອກ ມີຄວາມເຄັ່ງຕຶງ, ອັນຂັດກັບທ່າອ່ຽງລວມ ຂອງຍຸກສະໄໝ ທີ່ສະແຫວງຫາສັນຕິພາບ ແລະ ການພັດ ທະນາ.
ບັນຫາໄຕ້ຫວັນ ແມ່ນພົວພັນເຖິງຜົນປະໂຫຍດຕົ້ນຕໍ ທີ່ສຳຄັນທີ່ສຸດຂອງ ສປ ຈີນ, ຫລັກການຈີນດຽວ ແມ່ນຫລັກການພື້ນຖານ ຂອງການພົວພັນສາກົນ ແລະ ເປັນທີ່ຮັບຮູ້ ຢູ່ໃນວົງຄະນະຍາດສາກົນ. ລັດຖະບານຈີນ ຍາມໃດ ກໍຮຽກຮ້ອງໃຫ້ມີ ການເຄົາລົບຫລັກການຈີນດຽວຢ່າງແທ້ຈິງ, ຫລີກລ່ຽງທຸກຮູບການ ການພົວພັນແບບທາງ ການກັບໄຕ້ຫວັນ, ແກ້ໄຂບັນຫາທີ່ກ່ຽວພັນ ເຖິງໄຕ້ຫວັນຢ່າງຮອບຄອບ, ບໍ່ສົ່ງສັນ ຍານທີ່ຜິດພາດໃດໆ ໃຫ້ແກ່ອິດທິກຳລັງ ແບ່ງແຍກໄຕ້ຫວັນ ເປັນເອກະລາດ, ສົ່ງເສີມການພົວພັນ ລະ ຫວ່າງ ສອງຝັ່ງຊ່ອງແຄບໄຕ້ຫວັນ ເພື່ອນຳຜົນປະໂຫຍດ ແລະ ຄວາມຜາສຸກມາໃຫ້ປະຊາຊົນ ສອງຝັ່ງຊ່ອງແຄບໄຕ້ຫວັນ ແລະ ເຮັດທຸກຄວາມສາມາດ ເພື່ອທ້ອນໂຮມສອງ ຝັ່ງເປັນເອກະພາບໂດຍສັນຕິວິທີ.
ໃນໄລຍະຜ່ານມາ, ປະຊາຄົມໂລກໄດ້ຍຶດໝັ້ນ ຫລັກການຈີນດຽວ, ເຂົ້າໃຈ ແລະ ສະໜັບສະໜູນ ພາລະກິດທ້ອນໂຮມປະເທດ ຂອງປະຊາຊົນຈີນ, ຄັດຄ້ານການແບ່ງແຍກ ໄຕ້ຫວັນເປັນເອກະລາດ. ສຳລັບ ສປປ ລາວ ແມ່ນປະຕິບັດ ນະໂຍບາຍອັນສະເໝີຕົ້ນ ສະເໝີປາຍຂອງຕົນ ໃນການສະໜັບສະໜູນ ນະໂຍບາຍຈີນດຽວ ແລະ ຖືວ່າໄຕ້ຫວັນ ເປັນສ່ວນໜຶ່ງທີ່ຕັດແຍກອອກບໍ່ໄດ້ ຂອງ ສປ ຈີນ, ຄັດຄ້ານທຸກເຈດຈຳນົງ ທີ່ມຸ່ງຫວັງສ້າງສະຖານະການ ເພື່ອສ້າງ “ສອງປະເທດຈີນ” ຫລື “ໜຶ່ງຈີນ, ໜຶ່ງໄຕ້ຫວັນ”, ພ້ອມທັງສະໜັບສະໜູນ ນະໂຍບາຍຂອງລັດຖະບານ ສປ ຈີນ ໃນການທ້ອນໂຮມປະເທດຊາດໂດຍສັນຕິວິທີ.
ການທ້ອນໂຮມສອງຝັ່ງຊ່ອງແຄບໄຕ້ຫວັນ ເປັນເອກະພາບໂດຍສັນຕິຕາມທິດ “ປະເທດດຽວສອງລະບອບ” ແມ່ນສອດຄ່ອງກັບຜົນປະໂຫຍດ ແລະ ຄວາມມຸ່ງຫວັງຂອງປະຊາຊົນ ສອງຝັ່ງຊ່ອງແຄບໄຕ້ຫວັນ, ພາຍຫລັງປະເທດຊາດ ໄດ້ຮັບການທ້ອນໂຮມ ຈະສ້າງພື້ນຖານອັນໃໝ່ ໃຫ້ແກ່ການພັດທະນາຂອງຈີນ ແລະ ການຟື້ນຟູຄວາມຈະເລີນ ຮຸ່ງເຮືອງອັນຍິ່ງໃຫຍ່ ຂອງປະຊາຊາດຈີນ, ສ້າງໂອກາດໃຫ້ແກ່ການພັດທະນາ ເສດຖະກິດ-ສັງຄົມ ຂອງໄຕ້ຫວັນ, ຈະນຳເອົາຜົນປະໂຫຍດຕົວຈິງ ມາໃຫ້ແກ່ພີ່ນ້ອງຮ່ວມຊາດ ໄຕ້ຫວັນຢ່າງມະຫາສານ. ພ້ອມນັ້ນ, ເມື່ອສອງຝັ່ງຊ່ອງແຄບ ໄຕ້ຫວັນທ້ອນໂຮມເປັນ ເອກະພາບໂດຍສັນຕິ, ບໍ່ພຽງແຕ່ຈະເປັນຜົນປະໂຫຍດຕໍ່ ສປ ຈີນ ເທົ່ານັ້ນ, ຍັງເປັນຜົນປະໂຫຍດ ຕໍ່ປະຊາຄົມໂລກເຊັ່ນດຽວກັນ.
ໂດຍ: ສະຖາບັນການຕ່າງປະເທດ
KPL
