ຂປລ
ຂປລ. ທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ແຫ່ງ ສປປ ລາວ ໄດ້ອວຍພອນ ເນື່ອງໃນໂອກາດສົ່ງທ້າຍປີເກົ່າ ພ.ສ 2565, ຕ້ອນຮັບປີໃໝ່ ພ.ສ 2566 ເຊິ່ງມີເນື້ອໃນດັ່ງນີ້:
ຂປລ. ທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ແຫ່ງ ສປປ ລາວ ໄດ້ອວຍພອນ ເນື່ອງໃນໂອກາດສົ່ງທ້າຍປີເກົ່າ ພ.ສ 2565, ຕ້ອນຮັບປີໃໝ່ ພ.ສ 2566 ເຊິ່ງມີເນື້ອໃນດັ່ງນີ້:
ພີ່ນ້ອງຮ່ວມຊາດ ທີ່ນັບຖື ແລະ ຮັກແພງທັງຫລາຍ !
ປີຂານ ພ.ສ 2565 ທີ່ກຳລັງຈະຜ່ານພົ້ນໄປນີ້, ກໍເປັນອີກປີໜຶ່ງ ທີ່ປວງຊົນລາວທັງຊາດ ໄດ້ເປັນຈິດໜຶ່ງໃຈດຽວກັນຜ່ານຜ່າຄວາມຫຍຸ້ງຍາກ ແລະ ສິ່ງທ້າທາຍທົດສອບນາໆປະການ ແລະ ເປັນປີທີ່ປະເທດຊາດຂອງພວກເຮົາ ຍັງສືບຕໍ່ມີສະຖຽນລະພາບທາງດ້ານການເມືອງ, ມີຄວາມສະຫງົບຮຽບຮ້ອຍທາງດ້ານສັງຄົມ, ການພັດທະນາເສດ ຖະກິດສືບຕໍ່ຂະຫຍາຍຕົວ ດ້ວຍຈັງຫວະທີ່ຕໍ່ເນື່ອງ, ຊີວິດການເປັນຢູ່ຂອງປະຊາຊົນກໍໄດ້ມີບາດກ້າວທີ່ດີຂຶ້ນ ຍ້ອນປະເທດເຮົາສາມາດເປີດກວ້າງການຮ່ວມມືກັບປະເທດເພື່ອນມິດ, ເປີດກວ້າງການລົງທຶນ ແລະ ການທ່ອງທ່ຽວ, ພາຍຫລັງ ທີ່ສາມາດຄວບຄຸມການແພ່ລະບາດຂອງໂຄວິດ-19 ໄດ້ໃນລະດັບອັນແນ່ນອນ. ບັນດາຜົນສຳເລັດດັ່ງທີ່ກ່າວມານັ້ນ, ກໍຍ້ອນຄວາມເປັນເຈົ້າຂອງປະຊາຊົນບັນດາເຜົ່າ ໃນທົ່ວປະເທດເຮົາ, ໄດ້ຮັກສາ ແລະ ເສີມຂະຫຍາຍມູນເຊື້ອອັນດີງາມຂອງຊາດເຮົາ, ສາມັກຄີເປັນປຶກແຜ່ນ, ປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ ສະບັບທີ IX ຢ່າງແຂງແຮງແລະ ຕໍ່ເນື່ອງສະເໝີມາ. ຂ້າພະເຈົ້າ ຂໍຖືໂອກາດນີ້ ຍ້ອງຍໍ, ຊົມເຊີຍ ຕໍ່ຜົນສຳເລັດ ທີ່ຍາດມາໄດ້ຕະຫລອດປີຂານທີ່ຜ່ານມານັ້ນ ຢ່າງສຸດອົກສຸດໃຈ!
ບັນດາທ່ານ, ບັນດາສະຫາຍ, ພີ່ນ້ອງຮ່ວມຊາດ ທີ່ຮັກແພງທັງຫລາຍ!
ປີເຖາະ ພ.ສ 2566 ທີ່ຈະກ້າວເຂົ້າມານີ້, ກໍເປັນອີກປີໜຶ່ງ ທີ່ພວກເຮົາຍັງຕ້ອງໄດ້ປະເຊີນໜ້າກັບອຸປະສັກ ແລະ ສິ່ງທ້າທາຍທົດສອບຕໍ່ໄປອີກ. ດັ່ງນັ້ນ, ຂ້າພະເຈົ້າ ຂໍຮຽກຮ້ອງມາຍັງທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທຸກຖ້ວນໜ້າ ຕ້ອງໄດ້ພ້ອມກັນຮັກສາ ແລະ ເສີມຂະຫຍາຍມູນເຊື້ອອັນດີງາມ ຂອງຊາດເຮົາ, ເພີ່ມທະວີຄວາມສາມັກຄີ ອັນເປັນປຶກແຜ່ນແໜ້ນໜາ, ສຸມທຸກກຳລັງແຮງ, ກຳລັງໃຈ ແລະ ສະຕິປັນຍາ ເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດເຮົາ, ຍູ້ແຮງການປະຕິບັດສອງວາລະແຫ່ງຊາດ ໃຫ້ເປັນຮູບປະທຳຫລາຍຂຶ້ນ ເພື່ອແນໃສ່ສ້າງຄວາມເຂັ້ມແຂງດ້ວຍຕົນເອງ, ສ້າງການຫັນປ່ຽນທີ່ແຂງແຮງ ແລະ ເລິກ ເຊິ່ງ ໃນທຸກຂົງເຂດວຽກງານ ໃນຕະຫລອດປີເຖາະ ທີ່ຈະມາເຖິງນີ້.
ເນື່ອງໃນໂອກາດ ອັນເປັນສີຣິມຸງຄຸນ ເພື່ອຕ້ອນຮັບປີໃໝ່(ປີເຖາະ ພ.ສ 2566) ທີ່ຈະມາເຖິງນີ້, ຂ້າພະເຈົ້າ ຂໍສົ່ງຄຳອວຍພອນໄຊອັນປະເສີດ ມາຍັງພີ່ນ້ອງຮ່ວມຊາດ ຕະຫລອດເຖິງພີ່ນ້ອງເຊື້ອຊາດລາວ ທີ່ອາໄສຢູ່ຕ່າງປະ ເທດ ກໍຄື ຊາວຕ່າງປະເທດທີ່ດຳລົງຊີວິດ, ປະຕິບັດໜ້າທີ່ ແລະ ທຳມາຫາກິນ ຢູ່ ສປປ ລາວ ຂໍໃຫ້ທຸກໆທ່ານ ຈົ່ງມີຄວາມສຸກກາຍສະບາຍໃຈ, ປາສະຈາກໂລກໄພໄຂ້ເຈັບ, ມີພະລານາໄມສົມບູນ ແລະ ມີຄວາມຈະເລີນກ້າວໜ້າທຸກປະການ ຕະຫລອດປີໃໝ່ ພ.ສ 2566 ແລະ ຂໍໃຫ້ປີໃໝ່ລາວປີນີ້, ຈົ່ງເປັນປີທີ່ນໍາເອົາຜົນສຳເລັດໃໝ່ ໃຫຍ່ຫລວງກວ່າເກົ່າ ແລະ ຄວາມຢູ່ເຢັນເປັນສຸກ ມາສູ່ປວງຊົນລາວທັງຊາດດ້ວຍເຖີ້ນ!
ສະບາຍດີປີໃໝ່!
ພາບ: ຂັນໄຊ
KPL
