*ຄົນລາວເປັນຜູ້ທີ່ມີມູນເຊື້ອດຸໝັ່ນຂະຫຍັນພຽນ ແລະ ມີຫົວຄິດປະດິດສ້າງ ມາແຕ່ບູຮານນະການ ມີການອອກແຮງງານ ທີ່ຕິດພັນກັບທຳມະຊາດ ແລະ ວິຖີຊີວິດອັນຈົບງາມ ຊຶ່ງໄດ້ສ້າງແຮງບັນດານໃຈ ແລ້ວຖືກຖ່າຍທອດ ເປັນງານສິລະ ປະຫລາຍຮູບແບບໜຶ່ງ ໃນນັ້ນກໍແມ່ນ ເຄື່ອງຫັດຖະກຳຕ່າງໆ ທີ່ບໍ່ມີຄຸນປະໂຫຍດ ໃນການໃຊ້ສອຍ ທັງຍັງໃຫ້ຄຸນຄ່າ ທາງວັດທະນະທຳ ແລະ ຈິດໃຈ. ນອກນັ້ນຍັງສາມາດ ສ້າງອາຊີບ ແລະ ລາຍຮັບ ໃຫ້ນາຍຊ່າງ ຜູ້ຜະລິດຕື່ມອີກ ໂດຍສະເພາະ ຢູ່ນະ ຄອນຫລວງພະບາງ ບ່ອນທີ່ເປັນອາດີດ ເມືອງຫລວງໃນສະໄໝບູຮານ ເຮັດໃຫ້ມີຮ່ອງຮອຍ ອະລິຍະທຳເກົ່າແກ່ ຢ່າງຫລວງຫລາຍ ແລະ ເປັນແຫລ່ງຮວບຮວມ ເອົາບັນດາສະກຸນ ຊ່າງສີມືດີ ທີ່ໄດ້ສົ່ງທອດ ວິຊາຄວາມຮູ້ ໃຫ້ລູກຫລານ ສືບຕໍ່ກັນມາຈົນ ເຖິງປັດຈຸບັນ.

ຂັນນໍ້າກ້ຽງ ຫລື ທ້ອງຖິ່ນເອີ້ນ ຊ້ານໍ້າກ້ຽງ ຖືເປັນຜະລິດຕະພັນຫັດຖະກຳທີ່ຂຶ້ນຊື່  ແລະ ມີຄວາມເປັນເອກະລັກ ສະເພາະຂອງຫລວງພະບາງ ໃນສະໄໝບູຮານ ຄົນຫລວງພະບາງ ເຊື່ອວ່າເປັນສົມບັດມຸງຄຸນ ຂອງເຈົ້າຂຸນມຸນນາຍ ໂດຍເພິ່ນ ຈະໃຊ້ໃສ່ເບ້ຍ, ໃສ່ເງິນ ຫລື ຊັບສິນມີຄ່າຕ່າງໆ ແລະ ໃຊ້ຫິ້ວເອ້ໄປງານບຸນ ປະເພນີຕ່າງໆ ເພື່ອເສີມບາລະມີ. ມາເຖິງປັດຈຸບັນ, ຂັນນໍ້າກ້ຽງ ບໍ່ໄດ້ຈຳກັດວ່າ ເປັນສົມບັດຂອງ ເຈົ້າໃຫຍ່ນາຍໂຕ ແຕ່ບຸກຄົນທົ່ວໄປ ກໍສາມາດຊົມໃຊ້ໄດ້ ຊຶ່ງສ່ວນຫລາຍ ແມ່ນແມ່ຍ່າແມ່ຍິງ ຈະນິຍົມມາໃສ່ເຄື່ອງ ບຸນຂອງທານ ເວລາຕັກບາດຢາດນໍ້າ ຫລື ໄປວັດວາ. ການເຮັດຂັນ ເຮັດໂອນໍ້າກ້ຽງ ມີຫລາຍຂັ້ນຕອນພິຖີພິຖັນ ເກີນກວ່າຄົນ ທຳມະດາຈະສາມາດ ວິເຄາະໄດ້ດ້ວຍຕາເປົ່າ ນັບແຕ່ການຊອກສີນໍ້າກ້ຽງ ຊຶ່ງເປັນຕົ້ນ ໄມ້ທີ່ມີພິດ ຫາກໃຜຖືກລະອອງເກສອນແລ້ວ ຈະຄັນທີ່ສຸດ, ເມື່ອໄດ້ມາແລ້ວ ກໍມາຜ່ານກຳມາ ວິທີສະເພາະ ເພື່ອໃຫ້ໄດ້ສີທີ່ສວຍງາມ. ຂັ້ນຕອນການ ເຮັດຂັນນຳກ້ຽງ ຕາມແບບພື້ນເມືອງແທ້ໆ ແມ່ນຈະເອົາຂີ້ງົວ ປະສົມກັບດິນໜຽວ ຊະນິດພິເສດ ເພື່ອປັ້ນຫລໍ່ ໃຫ້ໄດ້ຮູບຊົງ ທີ່ແຂງແກ່ນທົນທານ, ສີດຳ ຫລື ສີນໍ້າຕານແກ່ ດ້ານນອກ ໄດ້ຈາກສີນໍ້າກ້ຽງ, ສ່ວນສີແດງດ້ານໃນ ໄດ້ຈາກສີໝາກຮາດ ປະສົມກັບດິນແດງ ຊຶ່ງແມ່ນສີເອກະລັກ ຂອງຂັນນໍ້າກ້ຽງ. ສ່ວນບັນດາລວດລາຍ ຂອງຂັນທີ່ເກີດ ຈາກ ການຕິດຄຳປິວ ຢູ່ພື້ນຜິວຂັນນັ້ນ ບໍ່ໄດ້ສ້າງ ເພື່ອຄວາມສວຍງາມຢ່າງດຽວ ແຕ່ແຝງດ້ວຍ ຄວາມໝາຍເຊັ່ນ: ລາຍບູຮານແທ້ໆ ຈະນິຍົມຮູບແມງກະເບື້ອ ເພາະເປັນຕົວແທນ ໃຫ້ຊື່ສຽງອັນຫອມຫວນ ແລະ ສວຍງາມ, ລາຍໂຕຫອຍ ສະແດງເຖິງ ຄວາມ ຊື່ສັດສຸດຈະລິດ ແລະ ຈິດໃຈດີງາມ. ນອກນັ້ນ ຍັງມີລາຍເຄືອເຂົາ, ຜັກແວ່ນ, ດອກກະດັນງາ ແລະ ອື່ນໆ. 

ປັດຈຸບັນຄວາມຮູ້ໃນການຜະລິດເຄື່ອງຫັດຖະກຳສີນໍ້າກ້ຽງ ຈາກຄົນບູຮານ ໄດ້ຖືກສົ່ງຕໍ່ຈາກຮຸ້ນສູ່ຮຸ້ນ ພ້ອມຍັງສ້າງວຽງເຮັດງານທຳ ໃຫ້ບັນດາຍາດພີ່ນ້ອງ ແລະ ປະຊາຊົນບ້ານໃກ້ຄຽງ ທີ່ສຳຄັນຜະລິດຕະພັນ ຫັດຖະກຳສີນໍ້າກ້ຽງ ຍັງຖືກນຳ ໄປເຜີຍແຜ່ ຕາມງານວາງສະແດງ ສິນຄ້າຫັດຖະກຳ ທັງພາຍໃນ ແລະ ຕ່າງປະເທດໃນຖານະ ເປັນເຄື່ອງຫັດຖະກຳ ທີ່ຂຶ້ນຊື່ຂອງນະຄອນຫລວງພະບາງ.

ໂດຍ: ໄໝຄຳນ້ອມສິນ

KPL