ຂປລ.ຕາມ​ຂ່າວ ຊິນ​ຮວາ​ຂອງ ຈີນ, ​ເມື່ອ​ບໍ່​ດົນ​ມາ​ນີ້ ບໍ່​ນໍ້າມັນ ທາຣິມ ສັງກັດ​ບໍລິສັດ ປິ​ໂຕຣລ່ຽມ​ແຫ່ງ​ຊາດ ຈີນ (CNPC) ໃຫ້ຮູ້ວ່າ ບໍ່​ນໍ້າມັນ ຟູ້ໝາ​ນ (Fuman Oilfield) ​ເປັນ​ບໍ່​ນໍ້າມັນ ​ແຫ່ງ​ໃໝ່ ຈະມີ​ ກຳລັງ​ ການ​ຜະລິດ 2 ລ້ານ​ໂຕນ​ຕໍ່​ປີ, ຢູ່ໃກ້​ບໍລິເວນ ໃຈກາງ ທະ​ເລ​ຊາຍ ທາກ​ລິ​ມາ​ກັນ(Taklimakan) ເປັນບໍ່​ນໍ້າມັນ ຟູ້ໝາ​ນ ກວມເອົາ ພື້ນ​ທີ່ ຫລາຍ​ກວ່າ 10.000 ຕາລາງ​ກິ​ໂລ​ແມັດ, ມີ​ແຫ​ລ່ງນໍ້າມັນ ​ແລະ ​ແກັດ​ ຢູ່​ເລິກ​ລົງ​ໄປ​ ກວ່າ 7.500 ​ແມັດ ​ແລະ ມີ​ປະລິມານ ນໍ້າມັນ ແລະ ​ແກັດ​ ຫລາຍ​ກວ່າ 1 ພັນ​ລ້ານ​ໂຕນ. ນີ້ຖື​ເປັນ ​ການ​ຄົ້ນ​ພົບ ​ແຫ​ລ່ງນໍ້າມັນ ​ຂະໜາດ​ໃຫຍ່ ທີ່​ສຸດ​ ຂອງ ​ແອ່ງ​ທາຣິມ​ໃນ​ໄລຍະ 10 ປີຜ່ານມາ .

ທ່ານ ຈ່າງ​ອິ໋ນ​ເທົ່າ ຜູ້ອຳນວຍການ ຝ່າຍ​ການ​ປະ​ເມີນ ​ແຫ່ງ​ສະ​ຖາ​ບັນ​ ວິ​ໄຈ ການ​ສຳ​ຫລວດ ​ແລະ ພັດທະນາ ບໍ່​ນໍ້າມັນ ທາຣິມ ​ແຫ່ງ​ປະ​ເທດ ​ຈີນ (RIPED) ກ່າວ​ວ່າ ໃນປີ​ນີ້ ບໍ່​ນໍ້າມັນ ທາຣິມ ​ແນ​ໃສ່ ໄດ້ສຳ​ຫລວດ ​ນໍ້າມັນ ​ແລະ ​ແກັດ ທີ່​ມີ ລະດັບ ຄວາມ​ເລິກ ​ພິ​ເສດ ​ຢູ່​ທະ​ເລ​ຊາຍ, ພ້ອມ​ກັນນັ້ນ ຍັງໄດ້ ​ຂຸດ​ເຈາະ ບໍ່​ນໍ້າມັນອີກ 5 ແຫ່ງ ທີ່​ມີ​ ກຳລັງ ການ​ຜະລິດ 1.000 ​ໂຕນ ຕໍ່​ວັນ ​ແລະ ບໍ່​ນໍ້າມັນ​ທົ່ວໄປອີກ 32 ແຫ່ງ ທີ່​ມີ​ກຳລັງ ການ​ຜະລິດ 100 ​ໂຕນ​ຕໍ່​ວັນ. ນັບຕັ້ງແຕ່ປີ 2018 ເປັນຕົ້ນມາ, ບໍ່​ນໍ້າມັນ ຟູ້ໝາ​ນ  ໄດ້ຂຸດ​ເຈາະ ບໍ່​ນໍ້າມັນ ດ້ວຍ​ກຳລັງ ການ​ຜະລິດ 100 ​ໂຕນ​ຕໍ່​ວັນ ແລະອື່ນໆ./.

KPL